١ تَسَالُونِيكِي 3 - كِتاب العَهد الجَّديد مِن الكِتاب المُقَدَّس

¹ عَلَشان كِدا، لَمّا ما قِدِرنا عَليهو وَكِت زِيادَه، كُنّا رَضيانين نِستَنّا في أَثِينَا بَرانا.

² و رَسَّلنا تِيمُوثَاوُس، أخونا و خَدّام الله مَعانا في إنجيل المَسيح، عَشان يَشَدِّدكُم في إيمانكُم و يَشَجِّعكُم،

³ عَشان واحِد ما يَرجَع بِسَبَب الضّيقات دي. إنتو نُفوسكُم تَعرِفو نِحنا مُختارين لِدا.

⁴ عَشان لَمّا كُنّا مَعاكُم، قُلنا ليكُم مِن قُبّال هُم ماشين يَطرُدونا. و حَصَل كِدا زي ما تَعرِفو.

⁵ عَلَشان كِدا، لَمّا ما قِدِرتَ عَليهو، رَسَّلتَ فِشان أعرِف إيمانكُم. أنا كُنتَ خايِف أن المُجَرِّب كان جَرَّبكُم بِأي طَريق و شُغُلنا بِكون بِدون فايدَه.

تِيمُوثَاوُس يَجيب خَبَرُم

⁶ و لَكِن هَسَّع تِيمُوثَاوُس جا لينا مِنَّكُم، و بَشَّرنا بِإيمانكُم و مَحَبَّتكُم. و هو خَبَّرنا كيف إنتو دايماً تِتذَكَّرونا بِلُطف، و عاوِزين بِشِدَّه تَشوفونا. و نِحنا كَمان عاوِزين بِشِدَّه نَشوفكُم.

⁷ عَلَشان كِدا، عِندَنا راحَه في قُلوبنا، يا أخوان، في خُصوصكُم، في كُلّو ضيقنا و تَعبنا بِسَبَب إيمانكُم.

⁸ عَشان هَسَّع نَعيش، إذا تِستَمِرّو شَديدين في الرَّب.

⁹ كيف نَقدَر نَشكُر الله كِفايَه عَشانكُم لِكُل الفَرَح النَّفرَح بيهو عَشانكُم قِدّام إلَهنا.

¹⁰ نَصَلّي بِاللّيل و بِالنَّهار بِشِدَّه أن نَشوف وشوشكُم و نَكَمِّل التَحتاجو ليهو في إيمانكُم.

¹¹ و إلَهنا نَفسو، أبونا، و رَبَّنا يَسُوع المَسيح يَقودنا في الطَّرِيق ليكُم.

¹² و الرَّب يَزيدكُم زِيادَه و زِيادَه في المَحَبَّه بَعضَكُم مَعَ بَعض و لِكُل النّاس، زي ما نِحنا نَحِبّكُم كَمان.

¹³ عَشان يَشَدِّد قُلوبكُم بِدون لوم في القَداسَه قِدّام الله أبونا لَمّا رَبَّنا يَسُوع المَسيح بِجي مَعَ كُلّو قِدِّسِينو.