١ تَسَالُونِيكِي 2 - كِتاب العَهد الجَّديد مِن الكِتاب المُقَدَّس

خِدمَة بُولُس في تَسَالُونِيكِي

¹ عَشان إنتو نُفوسكُم بِتَعرِفو، يا أخوان، أن زيارَتنا ما كانَت بِدون فايدَه.

² و تِعِبنا قَبل كِدا، و شَتَمونا في فيلِبّي، زي ما إنتو عارفين. لَكِن شَجَّعنا في إلَهنا أن نَكَلِّمكُم بِإنجيل الله، و لَو هُم قاوَمونا شَديد.

³ أدّيناكُم الشَّجاعَه، و دا ما جا مِن غَلَط، ولّا مِن فِكر وَسخان، ولّا بِغِش.

⁴ و لَكِن زي ما الله كان مَبسوط مِنَّنا، و أدانا مسؤليَة الإنجيل، كِدا نِتكَلَّم. و بِنَعمِل دا، ما عَشان نَبسِط النّاس، لَكِن عَشان نَبسِط الله اليَجَرِّب قُلوبنا.

⁵ و زي ما تَعرِفو، ما شَكَرناكُم بِالكَضب أبَداً، ولّا بِالكَلام اليَدِس الطَّمَع. الله شاهِد.

⁶ و لَمّا كان مُمكِن لينا ناخُد سُلطَة رُسُل المَسيح، ما طَلَبنا شُكر مِن النّاس، ولّا مِنَّكُم ولّا مِن التّانيين.

⁷ و لَكِن كُنّا لُطاف في وَسِطكُم زي أُم تَرَبّي أولادا.

⁸ كِدا، عَشان مَحَبَّتنا ليكُم، كُنّا رَضيانين نَدّيكُم مُش إنجيل الله بَس، و لَكِن نُفوسنا كَمان، عَشانكُم بِقيتو مَحبوبين لينا.

⁹ و إنتو تِتزَكَّرو، يا أخوان، الشُّغل بِتاعنا و التَّعب. إشتَغَلنا بِاللّيل و بِالنَّهار عَشان ما نَكون حِمِل عَلى أي واحِد مِنَّكُم وَكِت ما بَشَّرنا بِإنجيل الله.

¹⁰ إنتو شاهِدين و الله كَمان، كيف مَشينا بِقَداسَه و بِبِر و بِدون لوم بينكُم إنتو المؤمِنين.

¹¹ عَشان تَعرِفو كيف كُنّا نَعَزّي كُلّو واحِد مِنَّكُم، زي أبو لِأولادو، و كُنّا نَشَجِّعكُم،

¹² و كُنّا نَوَرّيكُم كيف تَعيشو الحَياة المُستَحِقَّه لِلَّه، و هو اليَناديكُم لِمَلَكوتو و مَجدو.

¹³ و نِحنا كَمان نَشكُر الله دايماً لِلسَّبَب دا. لَمّا أخَدتو كِلمَة الله السِّمِعتو مِنَّنا، قِبِلتوها مُش زي كِلمَة النّاس، لَكِن زي ما هي بِالحَقيقَه، كِلمَة الله. و الكِلمَه دي تَشتَغِل فيكُم، إنتو المؤمِنين كَمان.

¹⁴ عَلَشان إنتو، يا أخوان، بِقيتو زي كَنايس الله الفي اليَهُودِيَّه الفي المَسيح يَسُوع. عَشان إتحَمَّلتو نَفس الحاجات مِن ناس بَلَدكُم زي ما هُم إتحَمَّلو مِن اليَهود.

¹⁵ الكَتَلو الرَّب يَسُوع و الأنبياء كَمان، و طَرَدونا نِحنا. و هُم ما يَبسِطو الله، و يَقاوِمو كُل النّاس.

¹⁶ و يَمنَع نَكَلِّم الأُمَم عَشان بِكونو مُخَلَّصين، عَشان يَكَمِّلو خَطاياهم كُلّو وَكِت. و لَكِن غَضَب الله جا عَليهُم بِدون نِهايَه.

بُولُس يَحِب يَزورُم

¹⁷ و لَكِن يا أخوان، لَمّا كُنّا بَعيدين مِنَّكُم لِوَكِت قِصَير، بِالوَش، مُش بِالقَلب، جَرَّبنا أكتَر بِمَحَبَّه كَتيرَه أن نَشوفكُم وَش لِوَش.

¹⁸ عَشان كُنّا عاوزين نَجي ليكُم — أنا، بُولُس، مَرَّه و مَرَّه تانيَه — و لَكِن الشّيطان مَنَعنا.

¹⁹ و رَجاءنا شِنو و فَرَحنا و تاج فَخرِنا قِدّام رَبَّنا يَسُوع لَمّا يَجي؟ مُش إنتو؟

²⁰ عَشان إنتو نُفوسكُم مَجدنا و فَرَحنا.