١ بُطْرُس 5 - كِتاب العَهد الجَّديد مِن الكِتاب المُقَدَّس

لِلشُّيوخ و الشَّباب

¹ أنا بَطلُب لِلشُّيوخ البينكُم، أنا شيخ زيَكُم. و شاهِد لِأتعاب المَسيح و شَريك كَمان في المَجد الماشي يَظهَر.

² كونو رُعاه مُراح الله الهو أدّاكُم، مُش مِن الواجِب، لَكِن بِإختِيار، بِحَسَب إرادَة الله، و ما لِرِبِح وَسخان لَكِن بِنَشاط.

³ و ما زي أسياد عَلى النّاس الهُم مَسؤوليتكُم، لَكِن كونو مَثَل لِلمُراح.

⁴ و لَمّا يَظهَر رَئيس الرُّعاه، بِتاخدو تاج المَجد الما بِفوت.

⁵ يا شَباب، إنتو كَمان زي دا، طيعو الشُّيوخ. و كُلُّكُم، طيعو بَعضَكُم لِبَعض و ألبَسو توب التَّواضُع، عَشان: ”الله يَقاوِم المَتكَبِّرين، و لَكِن يَدّي المِتواضِعين نِعمَه.“

⁶ خُتّو نُفوسكُم تِحِت إيد الله القَوّيَّه، عَشان يَرفَعكُم في وَكتو الكوَيس.

⁷ و خُتّو عَليهو كُلّو هُمومكُم، عَشان هو بِهتَم بيكُم.

⁸ أمسِكو بِنُفوسكُم و أحرِسو عَشان إبْلِيس عَدوكُم زي أسَد بِكورِك، يَدَوِّر و يَفَتِّش عَن واحِد عَشان يَبلَعو.

⁹ قاوموهو، كونو ثابِتين في الإيمان، عارِفين أخوانكُم الفي الدُّنيا يِتحَمَّلَو زات الأتعاب دي.

¹⁰ و إلَه كُلّو نِعمَه ناداكُم لِمَجدو الأبَدي في المَسيح. و بَعَد ما إتوَجَّعتو وَكِت قَليل، هو نَفسو بِكَمِّلكُم و بِثَبِّتكُم، و بِشَدِّدكُم و بِيَعمِلكُم أُمَنا.

¹¹ ليهو السُّلطَه لِلأبَد. آمين.

¹² كَتَبتَ ليكُم بِكِلمات قَليلَه بِإيد سِلْوَانُس، الحَسبتو أخو أمين. أنا عاوِز أشَجِّعكُم و أشهَد ليكُم إنّو بِالحَق، دي نِعمَة الله. إستَمِرّو فيها.

¹³ المُختارَه مَعاكُم، الفي بابِل، تَسَلِّم عَليكُم، و مَرْقُس وَلَدي كَمان.

¹⁴ سَلِّمو بَعضَكُم لِبَعض بِسَلام المَحَبَّه. السَّلام لِكُلُّكُم، إنتو الفي المَسيح.