١ بُطْرُس 4 - كِتاب العَهد الجَّديد مِن الكِتاب المُقَدَّس

الشَّرِكَه في أتعاب المَسيح

¹ كِدا، عَلَشان المَسيح إتوَجَّع في جِسمو، كونو إنتو كَمان مَسَلَّحين بِنَفس الفِكِر دا. عَشان الإتوَجَّع في الجِّسِم، وَقَف مِن الخَطيَّه.

² عَشان ما يَعيش الوَكِت الباقي في الجِّسِم لِشَهوات النّاس، لَكِن لِإرادَة الله.

³ إنتو صَرَفتو وَكِت كِفايَه عامِلين إرادَة الأُمَم، ماشين في الفَضيحَه، و الشَّهوات، و السُّكر، و حَفلات لِشُرُب الخَمر، و السَّفاهَه، و عِبادَة الأصنام المَكروهَه.

⁴ هُم يِستَغرَبو أنَّكُم ما بِتَجرو مَعاهُم لِزيادَة السَّفاهَه زاتا. و يَشتِموكُم.

⁵ لَكِن هُم بِدّو حِساب ليهو، الهو جاهِز أن يَحكُم عَلى الحَيين و المَيِّتين.

⁶ بِالسَّبَب دا، بِشَّرو المَيِّتين هَسَّع كَمان بِالإنجيل. و دا عَشان يَحكُمو عَليهُم حَسَب النّاس في الجِّسِم، عَشان يَعِيشو الحَياة الحَسَب الله بِالرّوح.

⁷ نِهايَة كُلّو حاجَه قَرَّبَت. عَلَشان كِدا، كونو عاقلين و أحرِسو لِلصَّلَوات.

⁸ فوق كُلّو شي، حِبّو بَعضَكُم بَعض بِمَحَبَّه شَديدَه، عَشان المَحَبَّه تَغَطّي خَطايا كَتيرَه.

⁹ أفتَحو بُيوتكُم بَعضَكُم بَعض بِدون ما تَنَقنِقو.

¹⁰ خَلّي كُلّو واحِد مِنَّكُم يَخدِم التّانيين بِالهَدِيَّه القِبِلا، مِثِل وُكَلا طَيبين لِنِعمَة الله المُختَلِفَه.

¹¹ و إذا كان أي واحِد يتكَلَّم، خَليهو يَعمِلو زي اليتكَلَّم بِكِلمات الله. إذا كان أي واحِد يَخدِم، خَليهو يَخدِم بِالقُوَّه الأدّاها ليهو الله، عَشان يَمَجِّدو الله في كُلّو حاجَه بِيَسُوع المَسيح. ليهو المَجد و السُّلطان لِلأبَد. آمين.

¹² يا مَحبوبين، ما تِتعَجَّبو مِن التَجرِبَه النّاريَه الحَصَلَت ليكُم لِإمتِحانكُم، زي الحَصَلَت ليكُم هي حاجَه غَريبَه.

¹³ لَكِن أفرَحو، عَشان تَشتَرِكو في أتعاب المَسيح، حَتّى تَفرَحو في ظُهور مَجدو.

¹⁴ إن شَتَموكُم عَشان خاطِر إسم المَسيح، إنتو مُبارَكين، عَشان روح المَجد، روح الله، قاعِد عَليكُم.

¹⁵ لَكِن ما تَخَلّو واحِد يِتوَجَّع زي كاتِل، ولّا حَرامي، ولّا عامِل الشَّر، ولّا البِدخُل في حاجات التّانيين بِدون حَق.

¹⁶ و لَكِن إذا إتوَجَّعتَ زي مَسيحي، ما تَخجَل، لَكِن أحمَد الله عَشان خاطِر الإسم دا.

¹⁷ عَشان الوَكِت جا فِشان الحُكم يَبتَدي بأهل الله. و إن كان يَبتَدي بينَنا، كيف بِكون نِهايَة الما بِطيعُو إنجيل الله؟

¹⁸ و: ”إن كان البار يَخلَص بِالتَّعب، الما بِخاف الله و الخاطي نِهايَتُم بِتكون شِنو؟“

¹⁹ عَلَشان كِدا، البِتوَجَّعو بِحَسَب إرادَة الله، خَلّوهُم يَدّو نُفوسُم لِلخالِق الأمين، و يَعمِلو الخير.