١ بُطْرُس 3 - كِتاب العَهد الجَّديد مِن الكِتاب المُقَدَّس

¹ يا زوجات، كِدا إنتو طيعو رُجالكُم، و إذا كان بَعضُم ما بِطيعُو الكِلمَه، تَربَحوهُم بِدون كِلمَه بِمَشيكُم

² لَمّا يَشوفو كيف مَشيكُم هو نَضيف و مُحتِرَم.

³ و جَمالكُم ما لازِم يَجي مِن بَرَّه زي تَرتيب الشَّعَر، و لِبِس الدَّهَب، و هِدوم غاليَه،

⁴ لَكِن خَليهو يَكون مِن إنسان القَلِب المَدسوس، الرّوح المِتواضَع و اللَّطيف، الما يَخسَر. و داك عِندو تَمَن كَتير قِدّام الله.

⁵ و في الزَّمَن الفات، النِّسوان القِدّيسات الإتَّكَلو عَلى الله كانو يَسَوّو نُفوسُم جَميلات كِدا و طاعو رُجالُم،

⁶ مِثِل ما سَارَه كانَت تَطيع إِبْرَاهِيم و تَسَمّيهو سَيِدا. و هَسَّع إنتو بِقيتو بَنات ليها إذا تَعمِلو الخير و ما تَخافو مِن أي حاجَه أبَداً.

⁷ و كِدا، يا رُجال، إنتو كَمان، عيشو مَعَ زوجاتكُم بِمَعرِفَه، زي ما هُم الجِّنس الأضعَف، و شَرِّفوهُم زي الوارِثات مَعاكُم لِنِعمَة الحَياة، عَشان ما بِتكون في حاجَه تَوَقِّف صَلَواتكُم.

الوَجَع لِعَمَل الخير

⁸ في الآخِر، كُلُّكُم كونو مُتَّفقين في فِكر، حَنينين بَعضَكُم بَعض، حِبّو زي أخوان، كونو رُحَما و مِتواضِعين.

⁹ ما تَرَجِّعو شَر بِشَر، ولّا شَتيمَه بِشَتيمَه. لَكِن بِالعَكس بارِكو، عَشان الله ناداكُم لِدا، لِتورَسو البَرَكَه.

¹⁰ عَشان: ”الدّايِر يَحِب الحَياة و يَشوف أيام طَيبَه، خَليهو يَحفَظ لِسانو مِن الشَّر و خَشمو مِن كَلام الغِش.

¹¹ خَليهو يَعاكِس الشَّر و يَعمِل الخير، و يَطلُب السَّلام و يَتبَعو.

¹² عَشان عُيون الرَّب عَلى البارين، و إضنينو لِطَلَبُم. و لَكِن وَش الرَّب ضِد البِسَوو الشَّر.“

¹³ مِنو بِضُرّكُم إذا عِندَكُم حَسَد في الخير؟

¹⁴ و لَكِن إذا تِتوَجَّعو عَشان خاطِر البِر، إنتو مُبارَكين. ما تَخافوهُم، و ما تَضطَرِبو.

¹⁵ لَكِن قَدِّسو الرَّب المَسيح في قُلوبكُم. و كونو جاهِزين دايماً عَشان تَرُدّو عَلى كُلّو واحِد البِسألكُم عَن سَبَب الرَّجاء الفيكُم. و لَكِن أعمِلوهو بِوَداعَه و إحتِرام.

¹⁶ خَلّي ضَميركُم يَكون طَيب، عَشان البِشتِمو مَشيكُم الطَّيب في المَسيح يَخجَلو مِن شَتايِمُم.

¹⁷ عَشان أحسَن ليكُم إذا تِتوَجَّعو و إنتو عامِلين الخير، إذا كان دي إرادَة الله، مِن أن تِتوَجَّعو و إنتو عامِلين الشَّر.

¹⁸ عَشان المَسيح كَمان مات مَرَّه واحدَه فِشان الخَطايا، مات البار عَن المُذنِب عَشان يَقَرِّبنا لِلَّه. كَتَلوهو في الجِّسم، لَكِن عَمَلوهو حَي في الرّوح.

¹⁹ و بيهو مَشى و بَشَّر الأرواح الفي السِّجِن.

²⁰ ديلاك خالَفو الله مِن زَمان في أيام نُوح. و الله كان بِستَنّى بِالصَّبر وَكِت ما نُوح كان يَبني المُركَب الكَبيرَه. و فيها قَليلين، يَعني تَمانيَه نُفوس كانو مُخَلَّصين بِالمويَه.

²¹ و المويَه دي تَشَبِّه المَعموديَّه، مُش غَسيل الوَساخَه مِن الجِّسِم، لَكِن طَلَب ضَمير طَيب لِلَّه. و دي تَخَلِّصكُم هَسَّع بِقيامَة يَسُوع المَسيح.

²² و هو دَخَل السَّما، و هو في يَمين الله، و المَلائكَه و السُّلطات و القُوّات يَطيعوهو.