١ بُطْرُس 2 - كِتاب العَهد الجَّديد مِن الكِتاب المُقَدَّس

الحَجَر الحَي و الشَّعب المُختار

¹ عَشان كِدا، أرمو مِنَّكُم كُلّو شَماتَه و كُلّو غِش و النِّفاق و الحَسَد و كُلّو شَتيمَه.

² زي أطفال إتوَلَدو هَسَّع، دورو اللَّبَن الرّوحي الما فيهو غِش، عَشان تَكبَرو بيهو لِلخَلاص،

³ ما دام ضُقتو أن الرَّب طَيب.

⁴ قَرِّبو ليهو، لِلحَجَر الحَي، المَرفوض مِن النّاس، و لَكِن المُختار مِن الله و مُحتِرَم ليهو.

⁵ و إنتو كَمان مِثِل حُجار حَيَّه، تِنبَنو بيت روحي و قُسُس مُقَدَّسين، عَشان تَقَدِّمو ضَبايح روحيَّه مَقبولَه عِند الله بِيَسُوع المَسيح.

⁶ عَشان كِدا يَزكُر في الكِتاب: ”شوفو، أنا بَخُت في صِهيون حَجَر الرُّكُن مُختار و مُحتِرَم. و البِآمِنو بيهو ما بِخجَل.“

⁷ ليكُم البِتآمِنو، هو المُحتِرَم. لَكِن لِلما بِآمِنو: ”الحَجَر الرَّفَضوهو البَنّايين، هو بِقى راس الرُّكُن.“

⁸ و: ”حَجَر عَترَه و صَخرَة وقوع.“ يَقَعو عَلَشانُم ما بِطيعُو الكِلمَه، و كِدا كانو مُعَينين لِدا.

⁹ و لَكِن إنتو جِنس مُختار، و قُسُس مُلوكي، و أُمَّه مُقَدَّسَه، و شَعب مَخصوص لِلَّه، عَشان تَخَبِّرو بِحَمد النّاداكُم مِن الضَّلام لِنورو العَجيب.

¹⁰ إنتو الما كُنتو مِن قَبِل شَعب، لَكِن هَسَّع إنتو شَعب الله. و ما كُنتو قِبِلتو الرَّحمَه، و لَكِن هَسَّع قِبِلتو الرَّحمَه.

¹¹ يا مَحبوبين، أطلُب ليكُم زي غَريبين و مِسافِرِين تَرفُضو الشَّهوات الجِّسميَّه البِتحارِب النَّفس.

¹² عيشو حَياة طَيبَه بين الأُمَم، عَشان إذا يَشكوكُم زي عامِلين الشَّر، يَشوفو أعمالكُم الطَّيبَه، و يَمَجِّدو الله في يوم زيارتو.

طيعو السَّلاطين

¹³ طيعو كُلّو تَرتيب النّاس عَشان خاطِر الرَّب، إذا لِلمَلِك زي العِندو السُّلطَه العاليَه،

¹⁴ ولّا لِلحُكّام، المُرَسَّلين مِنّو لِلإنتِقام مِن عامِلين الشَّر، و عَشان حَمد لِعامِلين الخير.

¹⁵ عَشان إرادَة الله هي أن تَسَكِّتو جَهَل النّاس الغُشّام بِأعمالكُم الطَّيبَه.

¹⁶ عيشو زي ناس حُرّين، لَكِن ما تِستَعمِلو حُريّاتكُم زي غَطا لِلشَّر. لَكِن عيشو زي خَدّامين الله.

¹⁷ إحتَرِمو كُل النّاس. حِبّو الأخوان. خافو الله. إحتَرِمو المَلِك.

¹⁸ يا خَدّامين، طيعو أسيادكُم بِكُلّو إحتِرام، ما لِلكوَيسين و اللُّطَفاء بَس، لَكِن لِلظالِمين كَمان.

¹⁹ عَشان دا مَقبول إذا واحِد يِتحَمَّل الضّيق و يِتوَجَّع بِظُلم فِشان الضَّمير عَشان يَطيع الله.

²⁰ لَكِن كيف بِكون حَمد ليكُم إذا يَضرُبوكُم و إنتو عامِلين الشَّر، و تَصبُرو؟ و لَكِن إذا تِتوَجَّعو و إنتو عامِلين الخير، و تَصبُرو، دا مَقبول قِدّام الله.

²¹ الله ناداكُم لِدا، عَشان المَسيح كَمان إتوَجَّع عَشان خاطِركُم، و خَلّى ليكُم مَثَل، عَشان تَتبَعو دَربو.

²² و هو ما عَمَل خَطيَّه، و ما كان مَوجود في خَشمو غِش.

²³ لَمّا شَتَموهو، هو ما رَدَّ الشَّتيمَه، و لَمّا إتوَجَّع، ما هَدَّد، لَكِن إتَّكَل عَلى البِحكُم بِالعَدِل.

²⁴ هو نَفسو حَمَل خَطايانا في جِسمو عَلى الصَّليب، عَشان نِحنا نَموت عَن الخَطيَّه و نَعيش لِلبِر. و بِجُروحو، هو شَفاكُم.

²⁵ عَشانكُم كُنتو زي خِرفان ضايِع، لَكِن رَجَعتو هَسَّع لِراعي نُفوسكُم و مُلاحِظكُم.