١ بُطْرُس 1 - كِتاب العَهد الجَّديد مِن الكِتاب المُقَدَّس

¹ مِن بُطْرُس رَسول يَسُوع المَسيح، لِلغَريبين المَشَتَّتين في بُنتُس و غَلَاطِيَّه و كَبَّدوكيَّه و آسيا و بِثينيَه،

² المُختارين بِحَسَب مَعرِفَة الله الأبو الكانَت مِن قَبِل، و المُقَدَّسين بِالرّوح عَشان يَطيعو يَسُوع المَسيح و يَكونو مَرشوشين بِدَمّو. نِعمَه و سَلام يَكَتِّر ليكُم.

حَمد لِرَجاء حَي

³ مُبارَك الله أبو رَبَّنا يَسُوع المَسيح! حَسَب رَحمَتو الكَتيرَه هو أدّانا وِلادَه تانيَه لِرَجاء حَي بِقيامَة يَسُوع المَسيح مِن بين المَيِّتين.

⁴ لِميراث الما تَهلِك ولّا تَخسَر ولّا تَفوت، و مَحفوظَه ليكُم في السَّما.

⁵ إنتو البِقُوَّة الله مَحروسين بِالإيمان لِلخَلاص الجّاهِز هَسَّع، و البِظهَر في الزَّمَن الأخير.

⁶ بِدا تَفرَحو، و لَو هَسَّع لازِم تَحزِنو لِوَكِت قَليل بِسَبَب تَجَارِب مِن كُلّو نوع.

⁷ و داك يَكون لِبيّنَة إيمانكُم. الدَّهَب، البِخسَر، يَمتَحِن بِالنّار. و كِدا إيمانكُم، الغالي مِن الدَّهَب، لازِم يَمتَحِن كَمان عَلَشان يَكون لِلحَمد و المَجد و الإحتِرام عِند ظُهور يَسُوع المَسيح.

⁸ بِتحِبّو المَسيح، و لَو ما شُفتوهو. بِتآمِنو بيهو، و لَو ما بِتشوفو هَسَّع. و كِدا بِتَفرَحو بِفَرَح عَظيم و مَجيد، البِفوت الكَلام عَنّو.

⁹ و تَقبَلو نِهايَة إيمانكُم، هو خَلاص نُفوسكُم.

¹⁰ الأنبياء، الإتنَبّو عَن النِّعمَه البِتَجي ليكُم، هُم فَتَّشو بِفِكرَه عَن الخَلاص داك.

¹¹ و فَتَّشو بِكُلّو قُدرَتُم عَن الوَكِت، هو بِجي مِتين و كيف بِجي. دا الوَكِت روح المَسيح الفيهُم كان يَوَرّيهو، لَمّا شِهِد مِن قَبِل بِأوجاع المَسيح و المَجد البِجي بَعدو.

¹² الله وَرّاهُم إنّو شُغلُم كان لِفايدَتكُم و ما لِفايدَة نُفوسُم. و هُم الخَبَروكُم عَن الحاجات السِّمِعتو هَسَّع مِن البَشَّروكُم بِالإنجيل بِالرّوح القُدُس المُرسَل مِن السَّما. المَلائكَه كَمان عاوِزين بِشِدَّه يَعرِفو عَن الحاجات ديل.

كونو قِدِّيسين

¹³ عَلَشان كِدا، جَهِّز عُقولكُم لِلعَمَل، أمسِكو نُفوسكُم، و خُتّو رَجاكُم بِالتَّمام في النِّعمَه البِجيبوها ليكُم عِند ظُهور يَسُوع المَسيح.

¹⁴ و مِثِل الأولاد البِطيعُو، ما تَخَلّو الشَّهوات القَديمَه يَسوقوكُم زي في الوَكِت لَمّا كُنتو بِدون مَعرِفَه.

¹⁵ لَكِن زي ما النّاداكُم هو قُدّوس، كونو إنتو كَمان قِدِّيسين في حَياتكُم كُلّها.

¹⁶ عَشان مَكتوب: ”كونو قِدِّيسين عَشان أنا قُدّوس.“

¹⁷ إن كان تَنادو الأبو البِحكُم عَلى أعمال كُلّو واحِد، و ما بِشوف الوشوش، عيشو بِخوف زي غَريبين في الدُّنيا.

¹⁸ عَشان تَعرِفو أن الله فَداكُم مِن طَرِيقَة حَياتكُم الما ليها فايدَه الأخَدتوها مِن أبَهاتكُم. و دا ما كان بِحاجات تَخسَر مِثِل الفِضَّه و الدَّهَب،

¹⁹ لَكِن بِدَم كَريم زي مِن حَمَل بِدون عيب ولّا أي شي ناقِص، هو دَم المَسيح.

²⁰ دا كان مَعروف عَنّو مِن قُبّال، مِن قَبِل خَليقَة الدُّنيا، لَكِن ظَهَر في الأزمان الأخيرَه عَشان خاطِركُم.

²¹ إنتو البيهو بِتآمِنو بِالله القَوَّمو مِن بين المَيِّتين و أدّاهو المَجد، و عَشان كِدا إيمانكُم و رَجاكُم هُم في الله.

²² هَسَّع عَشان نَضَّفتو نُفوسكُم بِطاعَة الحَق لِمَحَبَّه مُخلِصَه لِلأخوان، حِبّو بَعضَكُم بَعض مَحَبَّه حارَّه مِن كُلّو قُلوبكُم.

²³ عَشان إتوَلَدتو مَرَّه تانيَه، ما مِن تيراب يَخسَر، لَكِن مِن الما يَخسَر، بِكِلمَة الله الحَيَّه و المُستَمِرَّه.

²⁴ عَشان: ”كُلّو جِسِم زي قَش و كُلّو مَجد إنسان زي زَهرَة قَش. القَش يبَس، و الزَّهرَه تَقَع،

²⁵ لَكِن كِلمَة الرَّب تِستَمِر لِلأبَد.“ و دي هي الكِلمَه البَشَّرناكُم بيها.