١ يُوحَنَّا 5 - كِتاب العَهد الجَّديد مِن الكِتاب المُقَدَّس

الإيمان بِإبن الله

¹ كُلّو واحِد بِآمِن بِيَسُوع هو المَسيح، هو مَولود مِن الله. و كُلّو واحِد بِحِب الأبو بِحِب المَولود مِنّو كَمان.

² بِدا بِنَعرِف نِحنا بِنحِب أولاد الله، إذا بِنحِب الله و بِنَحفَظ أوامِرو.

³ دي هي مَحَبَّه لِلَّه، أن نَحفَظ أوامِرو. و أوامِرو ما تَقيلَه.

⁴ عَشان كُلُّ واحِد مَولود مِن الله يَغلِب الدُّنيا. و دي هي الغَلَبَه التَّغلِب الدُّنيا، أيمانّا.

⁵ مِنو هو البِغلِب الدُّنيا؟ بَس البِآمِن أن يَسُوع هو إبن الله.

⁶ دا هو الجّا بِمويَه و دَم، يَسُوع المَسيح. ما بِالمويَه بَس، لَكِن بِالمويَه و الدَّم.

⁷ و الرّوح، هو البِشهَد، عَشان الرّوح هو الحَق.

⁸ و اليَشهَدو، هُم تلاتَه. الرّوح، و المويَه، و الدَّم. و التّلاتَه ديل، هُم في الواحِد.

⁹ إذا نَقبَل شَهادَة النّاس، شَهادَة الله أعظَم، عَشان دي شَهادَة الله الشِّهِد بيها عَن إبنو.

¹⁰ البِآمِن بِإبن الله، عِندو الشَّهادَه في نَفسو. الما بِآمِنو بِالله سَوَّاهو كَضّاب، عَلَشان ما آمَن بِالشَّهادَه الشِّهِد بيها الله عَن إبنو.

¹¹ و دي الشَّهادَه، الله أدّانا حَياة أبَديَّه، و الحَياة دي في إبنو.

¹² العِندو الإبن، عِندو الحَياة. و الما عِندو الإبن، ما عِندو الحَياة.

الحَياة الأبَديَّه

¹³ كَتَبتَ دا ليكُم، إنتو المؤمِنين بِإسم إبن الله، عَلَشان تَعرِفو عِندَكُم حَياة أبَديَّه.

¹⁴ و دا التأكيد العِندَنا فيهو، إذا نَطلُب أي شي بِحَسَب إرَادَتو، هو بِسمَع لينا.

¹⁵ و إذا نَعرِف هو يَسمَع لينا في كُلّو شي النَطلُب مِنّو، بِنَعرِف نِحنا عِندَنا الطَّلَبات الطَّلَبناهو مِنّو.

¹⁶ إذا واحِد يَشوف أخوهو يَعمِل خَطيَّه ما لِلموت، هو يَسأل، و الله بِدّيهو حَياة يَعني لِلما بِختو لِلموت. في خَطيَّه تَقود لِلموت، و أنا ما بَقول إنّو يَطلُب عَن دي.

¹⁷ كُلّو ذَنب هو خَطيَّه، و في خَطيَّه ما تَقود لِلموت.

¹⁸ بِنَعرِف أن كُلّو واحِد مَولود مِن الله ما بِختى، لَكِن المَولود مِن الله يَحفَظ نَفسو، و الشَرِّير ما يَلمَسو.

¹⁹ بِنَعرِف نِحنا مِن الله، و الدُّنيا كُلَّها تِحِت سُلطَة الشَّرّير.

²⁰ و بِنَعرِف إبن الله جا و أدّانا فَهم عَشان نَعرِف هو الحَق. و نِحنا في الحَق، يَعني في إبنو يَسُوع المَسيح. دا هو الإلَه الحَقيقي و الحَياة الأبَديَّه.

²¹ يا أولاد، أحفَظو نُفوسكُم مِن الأصنام.