١ يُوحَنَّا 4 - كِتاب العَهد الجَّديد مِن الكِتاب المُقَدَّس

إمتَحِنو الأرواح

¹ يا مَحبوبين، ما تَصَدِّقو كُلّو روح، لَكِن إمتَحِنو الأرواح، هُم مِن الله ولّا لا. عَشان أنبياء كاضِبين كَتيرين مَرَقو لِلدُّنيا.

² بِدا، بِتَعرِفو روح الله. كُلّو روح يَعتَرِف بِيَسُوع المَسيح إنّو جا في الجِّسم، هو مِن الله.

³ و كُلّو روح ما بِعتَرِف بِيَسُوع، ما مِن الله. و دا هو روح ضِد المَسيح السِّمِعتو بِجي، و هَسَّع هو في الدُّنيا.

⁴ إنتو مِن الله، يا أولاد، و غَلَبتوهُم. عَشان هو الفيكُم أكبَر مِن الفي الدُّنيا.

⁵ هُم مِن دُنيا. و عَلَشان كِدا، هُم يِتكَلَّمو عَن حاجات الدُّنيا، و الدُّنيا تَسمَع ليهُم.

⁶ نِحنا مِن الله. و البِعرِف الله يَسمَع لينا، و الما مِن الله ما بِسمَع لينا. بِدا بِنَعرِف روح الحَق و روح الكِضِب.

مَحَبَّة الله

⁷ يا مَحبوبين، خَلّونا نَحِب بَعَضَنا بَعض، عَشان المَحَبَّه هي مِن الله، و كُلّو واحِد البِحِب، هو مَولود مِن الله و بِعرِف الله.

⁸ و الما بِحِب، ما بِعرِف الله، عَشان الله مَحَبَّه.

⁹ بِدا، ظَهَرَت مَحَبَّة الله فينا. الله رَسَّل إبنو الوَحَيد لِلدُّنيا عَشان نَحياى بيهو.

¹⁰ و دي هي المَحَبَّه: مُش نِحنا الحَبّينا الله، لَكِنّو هو الحَبّانا و رَسَّل إبنو عَشان يَكون ضَبيحَة دَفع عَن خَطايانا.

¹¹ يا مَحبوبين، إن كان الله حَبّانا كِدا، نِحنا كَمان واجِب عَلينا نَحِب بَعَضَنا بَعض.

¹² ما في واحِد شاف الله أبَداً. إذا نَحِب بَعَضَنا بَعض، الله يَسكُن فينا و مَحَبَّتو تَبقى كاملَه فينا.

¹³ بِدا بِنَعرِف نِحنا نَعيش فيهو و هو فينا، عَشان هو أدّانا مِن روحو.

¹⁴ و نِحنا شُفنا و نَشهَد أن الأبو رَسَّل الإبن عَشان يَكون مُخَلِّص الدُّنيا.

¹⁵ البِعتَرِف بِيَسُوع هو إبن الله، الله بِسكُن فيهو و هو في الله.

¹⁶ و نِحنا عِرِفنا و صَدَّقنا مَحَبَّة الله الهو عِندو لينا. الله مَحَبَّه، و البِسكُن في المَحَبَّه بِسكُن في الله و الله فيهو.

¹⁷ بِدا، المَحَبَّه تَبقى كاملَه فينا، عَشان بِكون عِندَنا تأكيد في يوم الحُكم. عَلَشان زي ما هو، نِحنا كَمان كِدا في الدُّنيا دي.

¹⁸ ما في خوف في المَحَبَّه، لَكِن المَحَبَّه الكاملَه تَطرُد الخوف. عَلَشان النّاس عِندَهُم خوف لَمّا يَخافو مِن الجِّزا. و البِخاف ما بِبقى كاملَه في المَحَبَّه.

¹⁹ نِحنا بِنحِب، عَشان هو حَبّانا في الأوَّل.

²⁰ إذا واحِد يَقول: ”أنا بَحِب الله،“ و بِكرَه أخوهو، هو كَضّاب. عَلَشان الما بِحِب أخوهو الشّافو، ما بِقدَر يَحِب الله الهو ما شافو.

²¹ و عِندَنا الأمر دا مِنّو أن البِحِب الله يَحِب أخوهو كَمان.