١ يُوحَنَّا 3 - كِتاب العَهد الجَّديد مِن الكِتاب المُقَدَّس

أولاد الله

¹ شوفو نوع المَحَبَّه الأدّانا الأبو لِغايَة ما يَسَمّونا أولاد الله. و نِحنا كِدا. عَلَشان كِدا، الدُّنيا ما بِتَعرِفنا عَشان الدُّنيا ما عِرفَتو.

² يا مَحبوبين، هَسَّع نِحنا أولاد الله. و لِسَّع ما ظَهَر نِحنا بِنكون شِنو. و لَكِن بِنَعرِف إذا هو ظَهَر، بِنكون زيهو، عَشان بِنشوفو زي ما هو.

³ و كُلّو واحِد العِندو الرَّجاء دا فيهو، يَنَضِّف نَفسو زي ما هو نَضيف.

⁴ و كُلّو واحِد بيَعمِل خَطيَّه، يَكَسِّر القانون. و الخَطيَّه هي كَسر القانون.

⁵ و بِتَعرِفو هو ظَهَر عَشان يَشيل عَنّا خَطايانا، و ما فيهو خَطيَّه.

⁶ كُل البِسكُن فيهو، ما بيَعمِل الخَطيَّه. كُلّو واحِد البيَعمِل الخَطيَّه ما شافو و ما عِرفو.

⁷ يا أولاد، ما تَخَلّو واحِد يَغِشّكُم. البيَعمِل البِر، هو بار مِثِل ما هو بار.

⁸ البيَعمِل الخَطيَّه، هو مِن إبْلِيس، عَشان إبْلِيس مِن البِدايَه كان يَخطى. إبن الله ظَهَر لِلسَّبَب دا، عَشان يَخرَب أعمال إبْلِيس.

⁹ كُلّو واحِد المَولود مِن الله ما بيَعمِل خَطيَّه، عَشان حَياة الله تِستَمِر فيهو، و ما بِقدَر يَخطى، عَشان هو مَولود مِن الله.

¹⁰ بِدا، أولاد الله مَعروفين و أولاد إبْلِيس مَعروفين. كُل الما بيَعمِل البِر ما مِن الله، و كِدا الما بِحِب أخوهو كَمان.

المَحَبَّه لِلأخوان

¹¹ عَشان دا هو الخَبَر السِّمِعتوهو مِن البِدايَه، أن نَحِب بَعضَنا بَعض،

¹² و ما نَكون مِثِل قايين الكان مِن الشَّرّير و كَتَل أخوهو. و لِشِنو كَتَلو؟ عَشان أعمالو كانَت شَرّيرَه و لَكِن أعمال أخوهو بارَّه.

¹³ ما تِستَغرَبو، يا أخواني، إذا الدُّنيا تَكرَهكُم.

¹⁴ بِنَعرِف نِحنا مَرَقنا مِن الموت لِلحَياة، بِسَبَب مَحَبَّتنا لِلأخوان. الما بِحِب أخوهو يِستَنّى في الموت.

¹⁵ كُل البِكرَه أخوهو، هو كاتِل. و إنتو بِتَعرِفو كُلّو كاتِل ما عِندو حَياة أبَديَّه فيهو.

¹⁶ بِدا، بِنَعرِف المَحَبَّه، أن يَسُوع المَسيح أدّا نَفسو عَشان خاطِرنا. و واجِب عَلينا أن نَدّي نُفوسنا عَشان خاطِر الأخوان.

¹⁷ و لَكِن العِندو بُضاعَة الدُّنيا و يَشوف أخوهو مُحتاج و يَقفِل قَلبو مِنّو، كيف تَكون مَحَبَّة الله فيهو؟

¹⁸ يا أولادي، خَلّونا نَحِب، ما بِالكَلام، و لا بِاللِّسان، لَكِن بِالعَمَل و الحَق.

¹⁹ بِدا بِنَعرِف نِحنا مِن الحَق و نأكِّد قُلوبنا قِدّامو.

²⁰ عَشان إذا قُلوبنا تَلومنا، الله أكبَر مِن قُلوبنا و بِيَعرِف كُلّو حاجَه.

²¹ يا مَحبوبين، إذا قُلوبنا ما تَلومنا، عِندَنا تأكيد قِدّام الله.

²² و كُل النَّطلُب نَقبَل مِنّو، عَشانّا نَحفَظ أوامِرو و نَعمِل الحاجات التَّبسِطو.

²³ و دا هو أمرو أن نآمِن بِإسم إبنو يَسُوع المَسيح و نَحِب بَعَضَنا بَعض، زي ما أدّانا أمر.

²⁴ و كُل البِحفَظو أوامِرو يَسكُنو فيهو و هو فيهُم. و بِدا بِنَعرِف هو يَسكُن فينا، بِالرّوح الأدّاهو لينا.