١ يُوحَنَّا 1 - كِتاب العَهد الجَّديد مِن الكِتاب المُقَدَّس

كِلمَة الحَياة و النّور

¹ نَخَبِّركُم بِكِلمَة الحَياة. و الكِلمَه كان مِن البِدايَه. و نِحنا سِمِعناهو و شُفناهو بِعُيونّا، و عايَنّا ليهو و إيدينّا لِمسَتو.

² و الحَياة ظَهَرَت، و شُفناها، و نَشهَد ليها. و نَخَبِّركُم بِالحَياة الأبَديَّه الكانَت مَعَ الأبو و ظَهَرَت لينا.

³ و نَخَبِّركُم بِالشُّفناهو و سِمِعناهو، عَلَشان تَكون ليكُم كَمان شَرِكَه مَعانا. و شَرِكَتنا هي مَعَ الأبو و مَعَ إبنو يَسُوع المَسيح.

⁴ و نَكتِب ليكُم دا عَشان فَرَحنا يَكون كامِل.

⁵ و دا هو الخَبَر السِّمِعناهو مِنّو و نَخَبِّركُم بيهو، أن الله نور، و ما فيهو ضُلُمَّه أبَداً.

⁶ إذا نَقول: ”عِندَنا شَرِكَه مَعاهو،“ و نَمشي في الضُّلُمَّه، نَكَضِّب، و ما بِنَعمِل الحَق.

⁷ و لَكِن إذا نَمشي في النّور زي ما هو في النّور، عِندَنا شَرِكَه بَعَضَنا مَعَ بَعض. و دَم يَسُوع إبنو يَنَضِّفنا مِن كُلّو خَطيَّه.

⁸ إذا نَقول: ”ما عِندَنا خَطيَّه،“ نَغِش نُفوسنا، و الحَق ما فينا.

⁹ إذا نَعتَرِف بِخَطايانا، هو أمين و عادِل، و يَغفِر لينا خَطايانا و يَنَضِّفنا مِن كُلّو شَر.

¹⁰ و إذا نَقول: ”ما عَمَلنا خَطيَّه،“ نَعمِلو كَضّاب، و كلمَتو ما فينا.