١ كُورِنْثُوس 9 - كِتاب العَهد الجَّديد مِن الكِتاب المُقَدَّس

سُلطات الرَّسول

¹ أنا ما حُر؟ أنا ما رَسول؟ ما شُفتَ يَسُوع رَبَّنا؟ إنتو ما عَمَلي في الرَّب؟

² إذا أنا ما رَسول لِلتّانيين، عَلى الأقَل أنا رَسول ليكُم. عَشانكُم إنتو خِتِم رِسالتي في الرَّب.

³ دا هو رَدّي قِدّام اليَمتَحِنوني.

⁴ ما عِندَنا سُلطَه عَشان ناكُل و نَشرِب؟

⁵ ما عِندَنا سُلطَه أن ناخُد مَعانا مَرَه مِآمِنَه؟ زي باقي الرُّسُل و أخوان الرَّب و بُطْرُس؟

⁶ ولّا أنا و بَرْنَابَا بَس ما عِندَنا سُلطَه عَشان ما نَشتَغِل؟

⁷ مِنو يَدخُل الخِدمَه العَسكَريَّه بِالمَصاريف حَقّو؟ مِنو يَزرَع جِنينة العِنَب و ما ياكُل مِن ثَمَرو؟ ولّا مِنو يَحرَس غَنَم و ما ياكُل مِن لَبَن الغَنَم؟

⁸ بَتكَلَّم بِدا زي زول؟ القانون ما يَقول دا كَمان؟

⁹ عَشان مَكتوب في قانون مُوسَى: ”ما تَربُط خَشم التّور و هو يدوس الدُّرَه.“ الله يَهتَم بِالتّيران؟

¹⁰ هو ما يَقول بِالتَّمام فِشانّا؟ أيوَه، عَشان خاطِرنا هو مَكتوب. المُزارِع لازِم يَحفَر عَلى رَجاء، و اليدوس الدُّرَه عَلى رَجاء عَشان يَكون شَريك في الثَّمار.

¹¹ إذا نِحنا زَرَعنا ليكُم حاجات الرّوح، تَكون حاجَه كَبيرَه إذا نَلِم مِنَّكُم حاجات الجِّسِم؟

¹² إذا كان تانيين شُرَكا في السُّلطَه عَليكُم، مُش نِحنا في الأوَّل؟ لَكِن ما نَشتَغِل بِالسُّلطَه دي، لَكِن عِندَنا صَبر عَلى كُلّو شي عَشان ما نَخُت مانِع لِإنجيل المَسيح.

¹³ ما بِتَعرِفو اليَخدِمو في الهيكَل ياكلو مِن الهيكَل؟ و ديل اليَخدِمو في مَحَل الضَّبيحَه يَشتَرِكو في ضَبايح المَضبَح؟

¹⁴ و كِدا كَمان، الرَّب أمَر أن ديل اليَنادو بِالإنجيل يَعِيشو مِن الإنجيل.

¹⁵ و لَكِن أنا ما إشتَغَلتَ بِشي مِن دا. و ما بَكتِب دا عَشان آخُد لَي زي دا. عَلَشان أحسَن لَي أموت مِن أن واحِد ياخُد مِنّي سَبَب فَخري.

¹⁶ عَشان إذا كان أبَشِّر، ما لَي فَخر، عَشان أنا لازِم أبَشِّر. يا مُصيبتي إذا كان ما أبَشِّر!

¹⁷ إذا أعمِل دا مِن إرادَتي، عِندي أُجرَه. و لَكِن إذا دا ما مِن إرادَتي، الله حَسبني وَكيل أمين.

¹⁸ عَلَشان كِدا أُجرَتي شِنو؟ وَكِت ما أبَشِّر، بَدّي إنجيل المَسيح مَجّاناً، و ما بَشتَغِل بِسُلطَتي في الإنجيل.

¹⁹ و لَو أنا حُر مِن كُل النّاس، عَمَلتَ نَفسي خَدّام لِكُل النّاس، عَشان أربَح ناس أكتَر.

²⁰ بِقيت لِليَهود زي يَهودي عَشان أربَح اليَهود. و ليهُم التِحِت القانون، زي ما أنا تِحِت القانون، مَعَ إنّي أنا مُش تِحِت القانون، عَشان أربَح ديل التِحِت القانون.

²¹ و لِلنّاس البِدون قانون بِقيت زي ما أنا بِدون قانون. لَكِن أنا مُش بِدون قانون لِلَّه، لَكِن أنا تِحِت قانون لِلمَسيح عَشان أربَح ديل البِدون قانون.

²² لِلضَّعيفين بِقيت ضَعيف، عَشان أربَح الضَّعيفين. بِقيت لِكُل النّاس كُلّو حاجَه، عَشان أخَلِّص بِكُلّو طَرِيقَه بَعض مِن النّاس.

²³ و أنا أعمِل كُلّو دا عَلَشان الإنجيل، عَشان بَكون شَريك فيهو.

²⁴ ما بِتَعرِفو؟ اليَجرو في السَّبَق كُلَّهُم يَجرو، لَكِن واحِد ياخُد الأُجرَه؟ و كِدا، أجرو عَشان تَحَصِّلو عَليها.

²⁵ و كُل اليَتعَب، يَمسِك نَفسو في كُلّو حاجَه. ديلاك عَشان ياخُدو تاج بِخسَر، و لَكِن نِحنا لِتاج ما بِخسَر.

²⁶ عَشان كِدا، أنا ما بَجري زي واحِد البِجري بِدون تأكيد، و ما بَضرُب زي البِضرُب الهَوا.

²⁷ أنا بأدِّب جِسمي و أغلِبو. عَشان أخاف، بَعَد ما بَشَّرتَ التّانيين، أنا بَبقي مَرفوض.