١ كُورِنْثُوس 8 - كِتاب العَهد الجَّديد مِن الكِتاب المُقَدَّس

الأكل المَضبوح لِلأصنام

¹ هَسَّع عَن الأكل اليَضبَحوهو لِلأصنام. بِنَعرِف كُلُّنا عِندَنا مَعرِفَه. المَعرِفَه تَعمِل الزّول مِتكَبِّر، لَكِن المَحَبَّه تَبني.

² و إذا كان واحِد يَفتَكِر هو يَعرِف حاجَه، هو لِسَّع ما يَعرِف حاجَه زي ما لازِم يَعرِف.

³ و لَكِن إذا كان واحِد يَحِب الله، دا مَعروف عِند الله.

⁴ عَلى كِدا عَن الأكل اليَضبَحوهو لِلأصنام، بِنَعرِف الصَّنَم ما شي في الدُّنيا، و ما في إلَه تاني إلّا واحِد.

⁵ إذا كان في اليَسَموها آلِهَه في السَّما ولّا عَلى الأرض، زي ما آلِهَه كَتيرين و أسياد كَتيرين في.

⁶ لَكِن لينا إلَه واحِد بَس، الأبو، المِنّو كُل الحاجات و نِحنا نَعيش ليهو، و رَب واحِد، يَسُوع المَسيح، البيهو كُل الحاجات و نِحنا نَعيش بيهو.

⁷ و لَكِن كُل النّاس ما عِندَهُم المَعرِفَه دي. لَكِن بَعض مِنَّهُم، عَشان بيَعمِلو زي العادَه لِلصَّنَم لِغايَة هَسَّع، ياكلو الأكل زي الضَّبَحوهو لِلصَّنَم. و ضَميرُم الضَّعيف يَبقى نَجِس.

⁸ لَكِن الأكل ما بِقَرِّبنا لِلَّه. إذا ما أكَلنا ما نَكون ناقصين، و إذا أكَلنا ما نَزيد حاجَه.

⁹ لَكِن شوفو عَشان سُلطَتكُم دي ما تَكون سَبَب خَطيَّه لِلضَّعيفين.

¹⁰ يِمكِن واحِد زول العِندو ضَمير ضَعيف يَشوفَك ياكُل في بيت صَنَم. إنتَ عِندَك مَعرِفَه عَن الحاجَه دي. إنتَ ما تَشَجِّعو حَتّى هو ياكُل الضَّبَحوها لِلصَّنَم؟

¹¹ و كِدا بِسَبَب مَعرِفتَك، الأخو الضَّعيف يَموت. إتزَكَّر المَسيح مات فِشانو.

¹² و كِدا إنتو، لَمّا تَخطو ضِد الأخوان و تَجرَحو ضَميرُم الضَّعيف، إنتو تَخطو ضِد المَسيح.

¹³ عَشان كِدا، إذا كان أكل يَكون سَبَب وقوع في الخَطيَّه لِأخوّي، أنا ما باكُل لَحَم أبَداً، عَشان ما بَكون سَبَب وقوع لِأخوّي.