١ كُورِنْثُوس 7 - كِتاب العَهد الجَّديد مِن الكِتاب المُقَدَّس

الزَّواج

¹ هَسَّع عَن الحاجات الإنتو كَتَبتو لَي. طَيب لِلرّاجِل ما يِتزَوَّج.

² لَكِن بِسَبَب الزِّنا، خَلّي كُلّو واحِد تَكون عِندو مَرَتو، و لِكُلّو واحدَه راجِلا.

³ الرّاجِل لازِم يَدّي لِلمَرَه حَقّا بِتاع العِرِس، و كِدا كَمان المَرَه لِراجِلا.

⁴ المَرَه ما عِندَها سُلطَه عَلى جِسِما لَكِن الرّاجِل عِندو. و كِدا كَمان الرّاجِل ما عِندو سُلطَه عَلى جِسمو لَكِن المَرَه عِندَها.

⁵ ما تابا واحِد فيكُم التّاني، إلّا يَكون بِإتِّفاق لِوَكِت، عَشان تَدّو نُفوسكُم لِلصَّلاه. و بَعدين تِتلَمّو سَوا مَرَّه تانيَه، عَشان الشّيطان ما يَجَرِّبكُم، لَمّا ما عِندَكُم قُوَّه عَلى نُفوسكُم.

⁶ و لَكِن أقول دا عَشان أدّيكُم إذِن، ما عَشان أدّيكُم أمر.

⁷ أنا داير كُل النّاس يَكونو زي ما أنا. لَكِن كُلّو واحِد عِندو هَديتو المَخصوص مِن الله. الواحِد كِدا و التّاني كِدا.

⁸ و لَكِن أقول لِلما مِتزَوِّجين و الأرامِل، كوَيس ليهُم إذا يِستَمِرّو يَعِيشو زي ما أنا كَمان.

⁹ و لَكِن إذا كان ما يَقدَرو يَمسِكو نُفوسُم، خَلّوهُم يِتزَوَّجو، عَشان العِرِس أحسَن مِن أن يَحرَقو بِالشَّهوَه.

¹⁰ لَكِن لِلمِتزَوِّجين عِندي أمر، مُش أنا، لَكِن الرَّب: المَرَه ما تَخَلّي راجِلا.

¹¹ و إن مَشَت مِنّو، خَلِيها تِستَنّى ما مِتزَوِّجَه، ولّا خَلِيها تَصالِح راجِلا. و الرّاجِل ما يَطَلِّق مَرَتو.

¹² لَكِن التّانيين أقول ليهُم، أنا، مُش الرَّب، إذا كان أخو عِندو مَرَه ما مِآمِنَه، و هي عاوزَه تَعيش مَعاهو، هو ما يَطَلِّقا.

¹³ و المَرَه العِندَها راجِل ما مؤمِن، و هو عاوِز يَسكُن مَعاها، هي ما تَطَلِّقو.

¹⁴ عَشان الرّاجِل الما مؤمِن مُقَدَّس في المَرَه، و المَرَه الما مِآمِنَه مُقَدَّسَه في الرّاجِل. و كان ما كِدا، أولادكُم نَجِسين. لَكِن هَسَّع هُم مُقَدَّسين.

¹⁵ و لَكِن إذا الما مؤمِن مَشى، خَليهو يَمشي. الأخو ولّا الأُخُت ما مَربوط في حاجَه زي دي. عَشان الله نادانا لِلسَّلام.

¹⁶ كيف بِتَعرِفي، يا مَرَه، إذا كان تَخَلِّصي راجِلِك. ولّا كيف بِتَعرِف، يا راجِل، إن كان تَخَلِّص مَرَتَك؟

¹⁷ عَلى كُلّو حال، خَلّي كُلّو واحِد يَمشي زي ما الله قَسَم لِكُلّو واحِد، زي ما الرَّب نادى كُلّو واحِد. دا أمري في كُل الكَنايس.

¹⁸ أي واحِد في وَكِت الله ناداهو كان مُطَهَّر؟ هو ما يَبقى ما مُطَهَّر. أي واحِد في وَكِت الله ناداهو ما كان مُطَهَّر؟ هو ما يَبقى مُطَهَّر.

¹⁹ الطَّهور ما شي و البِدون الطَّهور ما شي، لَكِن حِفظ أمر الله، دا مُهِم.

²⁰ خَلّي كُلّو واحِد يِستَنّى زي ما هو كان لَمّا الله ناداهو.

²¹ إنتَ كُنتَ عَبد لَمّا الله ناداك؟ مَعليش. لَكِن إن قِدِرتَ تَبقى حُر، أمسِك الفُرصَه.

²² عَشان الناداهو الرَّب و هو عَبد، هو بِقى حُر في الرَّب. و كِدا كَمان الكان حُر لَمّا الرَّب ناداهو، هو عَبد لِلمَسيح.

²³ كُنتو مُشتَرين بِتَمَن. ما تَبقو عَبيد لِلنّاس.

²⁴ يا أخوان، خَلّي كُلّو واحِد يِستَنّى مَعَ الله في زات الحال الكان فيهو لَمّا الله ناداهو.

²⁵ هَسَّع عَن العَذارى، ما عِندي أمر مِن الرَّب فيهُم، و لَكِن أَدِّي فِكري زي واحِد، بِرَحمَة الرَّب، أمين.

²⁶ أفتَكِر لِسَبَب التَّعب الفي هَسَّع، كوَيس لِلزّول يِستَنّى زي ما هو.

²⁷ إنتَ مَربوط بِمَرَه؟ ما تَطلُب تَطَلِّقا. إنتَ ما مِتزَوِّج؟ ما تَطلُب مَرَه.

²⁸ لَكِن إن كان تِتزَوَّج، إنتَ ما تَعمِل خَطيَّه، و إن كان العَذرَاء إتزَوَّجَت، هي ما تَعمِل خَطيَّه. لَكِن المِتزَوِّجين يَكون ليهُم تَعب في الجِّسِم. و أنا عاوِز أحفَظكُم مِن تَعب زي دا.

²⁹ يَعني، الوَكِت بِقى قِصَير، يا أخوان. مِن هَسَّع، خَلّو العِندَهُم نِسوان يَكونو زي الما عِندَهُم،

³⁰ و هُم اليَبكو، زي الما يَبكو، و هُم اليَفرَحو، زي الما يَفرَحو، و هُم اليَشتَرو، زي الما يَمسِكو البُضاعَه.

³¹ و خَلّوهُم البِشتَغِلو بِحاجات الدُّنيا دي، زي الما بِشتَغِلو بيها كَتير. عَشان شَكِل الدُّنيا الحاضِرَه دي يَفوت.

³² عاوِزكُم تَكونو بِدون مَشغوليَّه. الما مِتزَوِّج يَخَلّي بالو لِحاجات الرَّب، كيف يَبسِط الرَّب.

³³ لَكِن المِتزَوِّج يَخَلّي بالو في حاجات الدُّنيا، كيف يَبسِط مَرَتو.

³⁴ و هو إنقَسَم في اليَخُصّو. و الما مِتزَوِّجَه ولّا العَذراء تَخَلّي بالا لِحاجات الرَّب، عَشان تَكون مُقَدَّسَه بِالجِّسِم و بِالرّوح. لَكِن المِتزَوِّجَه تَخَلّي بالا لِحاجات الدُّنيا، كيف تَبسِط راجِلا.

³⁵ أقول دا لِفايدَتكُم، ما عَشان أمنَعكُم مِن العِرِس، لَكِن عاوِزكُم تَعمِلو الحاجَه المَوافِقَه و تَخُتّو بالكُم لِلرَّب بِدون لَخبَطَه.

³⁶ و لَكِن يِمكِن واحِد يَفتَكِر هو ما يَعمِل المَوافِق عَشان عَزراءو. و إذا هي كِبرَت، و هو لازِم يِتزَوَّج، خَلّوهُم يِتزَوَّجو، زي ما هو داير. هو ما يَعمِل خَطيَّه.

³⁷ و لَكِن يِمكِن واحِد يَكون ثابِت في قَلبو و ما في لُزوم، و عِندو قُوَّه عَلى إرَادَتو. و كان عاوِز دا مِن قَلبو أن يَحفَظ عَزراءو، هو بيَعمِل طَيب.

³⁸ و كِدا، اليَزَوِج عَزراءو يَعمِل كوَيس، و الما يَزَوِج يَعمِل أحسَن.

³⁹ المَرَه مَربوطَه بِالقانون ما دام راجِلا حَي. و لَكِن إذا راجِلا مات، هي حُرَّه عَشان تِتزَوَّج بِواحِد زي ما هي دايِرَه، لَكِن في الرَّب بَس.

⁴⁰ و لَكِن هي بِتكون مَبسوطَه أكتَر إذا تِستَنّى زي ما هي، بِحَسَب فِكري. و أفتَكِر عِندي كَمان روح الله.