١ كُورِنْثُوس 6 - كِتاب العَهد الجَّديد مِن الكِتاب المُقَدَّس

قَضايا بين المؤمِنين

¹ لَمَّن واحِد فيكُم عِندو شَكوى عَلى أخو، ما يَخاف يَرفَع قَضيَّه قِدّام الظّالِمين بَدَل أن يَرفَعا قِدّام القِدِّسين؟

² ما بِتَعرِفو القِدِّسين بِحكُمو عَلى الدُّنيا؟ و إن كان إنتو بِتَحكُمو عَلى الدُّنيا، ما بِتَقدَرو تَحكُمو عَلى القَضايا الصَّغَيرَه؟

³ ما بِتَعرِفو بِنَحكُم مَلائكَه؟ و بِالأكتَر حاجات الحَياة دي.

⁴ إذا عِندَكُم قَضايا في حاجات الحَياة دي، لِشِنو تَختارو قُضاة مِن الما مُحتَرمين في الكَنيسَه؟

⁵ أقول دا عَشان بِتكونو خَجلانين. صَحيح ما في راجِل فَهيم و لا واحِد بينكُم، البِقدَر يَحكُم بين أخوانو؟

⁶ لَكِن الأخو يَرفَع قَضيَّه عَلى الأخو، و داك قِدّام الما مؤمِنين.

⁷ هَسَّع بِالحَق فيكُم عيب عَشان عِندَكُم قَضايا بَعضَكُم مَعَ بَعض. لَكِن لِشِنو ما تَكونو مَظلومين، لِشِنو ما تَخَلّوهُم يَغِشّوكُم؟

⁸ بِالعَكس إنتو تَظلِمو و تَغِشّو، و داك لِلأخوان.

⁹ ما بِتَعرِفو الظّالمين ما بِيورَثو مَلَكوت الله؟ ما تَغِشّو نُفوسكُم. لا أخلاقُم بَطّالَه، ولّا اليَعبُدو أصنام، ولّا البيَعمِلو زِنا، ولّا المَخَنَّس ولّا اللّوطي،

¹⁰ ولّا الحَراميَه، ولّا الطَّمّاعين، ولّا السَّكرانين، ولّا الشَّتَّامين، ولّا السَّرّاقين بِيورَثو مَلَكوت الله.

¹¹ و بَعض مِنَّكُم كانو زي داك. لَكِن كُنتو مَغسولين، إتقَدَّستو، إتبَرَّرتو بِإسم الرَّب يَسُوع المَسيح و بِروح إلَهنا.

عَن الزِّنا

¹² ”أنا عِندي إذِن لِكُل الحاجات،“ لَكِن كُل الحاجات ما مُساعَدَه. ”عِندي إذِن لِكُل الحاجات،“ لَكِن ما بَبقي خَدّام لِأي حاجَه.

¹³ ”الأكل لِلبَطُن و البَطُن لِلأكل،“ و الله بِخرَبُم الإتنين. الجِّسم مُش لِلزِّنا لَكِن لِلرَّب، و الرَّب لِلجِّسم.

¹⁴ الله قَوَّم الرَّب مِن بين المَيِّتين، و بِقَوِّمنا كَمان بِقُوَّتو.

¹⁵ ما بِتَعرِفو أجسامكُم هُم أعضاء المَسيح؟ عَلَشان كِدا باخُد أعضاء المَسيح و أعمِلُم أعضاء زانيَه؟ أبَداً!

¹⁶ ما بِتَعرِفو اليَجمَع نَفسو لِزانيَه هو جِسِم واحِد مَعاها؟ عَشان مَكتوب: ”يَكونو الأتنين جِسِم واحِد.“

¹⁷ و لَكِن اليَجمَع نَفسو لِلرَّب، هو روح واحِد مَعاهو.

¹⁸ أجرو مِن الزِّنا. كُلّو خَطيَّه اليَعمِلا الإنسان، هي بَرَّه مِن الجِّسِم. لَكِن اليَعمِل زِنا، يَعمِل خَطيَّه ضِد جِسمو.

¹⁹ ما بِتَعرِفو جِسِمكُم هو هيكَل الرّوح القُدُس الفيكُم، القِبِلتوهو مِن الله؟ و إنتو مُش لِنُفوسكُم.

²⁰ كُنتو مُشتَرين بِتَمَن. عَلَشان كِدا، مَجِّدو الله في جِسِمكُم.