١ كُورِنْثُوس 5 - كِتاب العَهد الجَّديد مِن الكِتاب المُقَدَّس

أطرُد الأخو الزّاني

¹ بِالحَق يَخَبِّرونا في بينكُم زِنا، و زِنا مِن النوع الما بِكون في بين الأُمَم، لِغايَة ما الزّول عِندو مَرَة أبوهو.

² و إنتو لِسَّع مِتكَبِّرين. لِشِنو ما تَكونو حَزنانين و تَشيلو مِن وَسِطكُم الرّاجِل العَمَل دا؟

³ أنا ما مَعاكُم في الجِّسم، لَكِن أنا مَعاكُم في الرّوح. مِن قُبّال أنا حَكَمتَ عَلى الرّاجِل العَمَل العَمَل دا، زي ما أنا في.

⁴ و لَمّا إنتو و روحي مِتلَمين بِإسم رَبَّنا يَسُوع، مَعَ قُوَّة رَبَّنا يَسُوع،

⁵ إنتو تَسَلِّمو الرّاجِل دا لِلشّيطان لِخَراب الجِّسم، عَشان روحو تَخَلَص في يوم الرَّب يَسُوع.

⁶ كِبِركُم ما كوَيس. ما بِتَعرِفو خَميرَه صَغَيرَه تَخَمِّر العَجين كُلّو؟

⁷ أُخدو مِنَّكُم الخَميرَه القَديمَه عَلَشان تَكونو عَجين جَديد، زي ما إنتو بِالحَق عيش بِدون خَميرَه. عَشان المَسيح، الحَمَل بِتاع عيد الفِصَح، إنضَبَح فِشانّا.

⁸ عَشان كِدا خَلّونا نَعَيِّد مُش بِخَميرَه قَديمَه، يَعني خَميرَة الذَّنب و الشَّر. لَكِن نَعَيِّد بِالعيش البِدون خَميرَه، يَعني عيش الإخلاص و الحَق.

⁹ كَتَبتَ ليكُم في جَوابي أن ما تِتلَمّو مَعَ النّاس البيَعمِلو الزِّنا.

¹⁰ أنا ما كُنتَ بَتكَلَّم عَن زانيين الدُّنيا دي، ولّا الطَّمّاعين ولّا الحَراميَه، ولّا اليَعبُدو الأصنام. عَشان إذا كان عَمَلتو كِدا، لازِم تَمرُقو مِن الدُّنيا.

¹¹ لَكِن هَسَّع بَكتِب ليكُم، ما تِتلَمّو مَعَ واحِد البِسَمّوهو أخو، إذا هو بيَعمِل زِنا ولّا هو طَمّاع، ولّا يَعبُد الأصنام، ولّا شَتَّم، ولّا مَرّاسي، ولّا حَرامي. و ما تاكلو مَعَ واحِد زي دا.

¹² عَشان دا شُغلي أحكُم عَليهُم المِن بَرَّه؟ ديل المِن جُوَّه، إنتو ما بِتَحكُمو عَليهُم؟

¹³ الله هو اليَحكُم عَليهُم المِن بَرَّه. أطرُدو الزّول الشَّرّير مِن بينكُم.