١ كُورِنْثُوس 4 - كِتاب العَهد الجَّديد مِن الكِتاب المُقَدَّس

رُسُل المَسيح

¹ خَلّي الزّول يَحسِبنا زي خَدّامين المَسيح و وُكَلا أسرار الله.

² و كَمان الوَكيل لازِم يَكون أمين.

³ لَكِن دي حاجَه صَغَيرَه مَعاي إذا إنتو تَحكُمو فِيني ولّا مَحكَمَة النّاس تَحكُم فِيني. أنا ما أحكُم في نَفسي كَمان.

⁴ ما بَعرِف حاجَه عَلى نَفسي، لَكِن عَشان كِدا أنا ما بِدون ذَنب، لَكِن اليَحكُم فِيني هو الرَّب.

⁵ فِشان كِدا، ما تَحكُمو في حاجَه قُبّال الوَكِت، قُبّال ما الرَّب يَجي. هو بِجيب لِلنّور الحاجات الهَسَّع مَدسوسَه في الضَّلام، و بِوَرّي أفكار القُلوب. في الوَكِت داك، كُلّو واحِد بِقبَل حَمدو مِن الله.

⁶ عَشان خاطِركُم يا أخوان، خَتّيت دا كُلّو عَلى نَفسي و عَلى أَبُلُّوس، زي مَثَل عَشان تِتعَلَّمو مِنَّنا أن ما تَفَكِّرو في النّاس فوق ما الكِتاب يَقول. و كِدا إنتو ما بِتكونو مِتكَبِّرين الواحِد فوق التّاني.

⁷ عَشان مِنو عَمَل فارِق بينكُم؟ و عِندَك شِنو الما قِبِلتو؟ إذا قِبِلتو، لِشِنو تَشكُر نَفسَك زي إنتَ ما قِبِلتو؟

⁸ مِن قُبّال شَبِعتو، مِن قُبّال بِقيتو غَنيين، بِدونَنا بِقيتو مُلوك. و أنا بَكون مَبسوط إذا كان كِدا و إنتو مَلَكتو، عَشان نَملِك مَعاكُم كَمان.

⁹ عَشان أفتَكِر الله أدّانا المَحَل الفي الآخِر زي المَحكوم عَلينا بِالموت. عَشانّا بِقينا مَنظَر لِلدُّنيا و لِلمَلائكَه و لِلنّاس.

¹⁰ نِحنا بَليدين فِشان المَسيح، لَكِن إنتو فاهمين في المَسيح. نِحنا ضَعيفين لَكِن إنتو قَوّيين، إنتو مُحتَرمين لَكِن نِحنا بِدون إحتِرام.

¹¹ لِغايَة هَسَّع نَجوع و نَعطَش، و نَلبَس هِدوم قَديم، و يَضرُبونا، و ما عِندَنا بيت.

¹² و نَتعَب مِشتَغِلين بِإيدينا. هُم يَشتِمونا، و نِحنا نَبارِك. يَطرُدونا، و نِحنا نِتحَمَّل.

¹³ لَمّا يَكَضِّبو عَلينا، نَرُد بِكَلام لَطيف. بِقينا زي الحاجات الخَربانَه بِتاعَت الدُّنيا و وَساخَه كُلّو حاجَه لِغايَة هَسَّع.

¹⁴ ما بَكتِب دا عَشان أخَجِّلكُم، لَكِن أحَزِّركُم مِثِل أولادي المَحبوبين.

¹⁵ عَشان إن كان عِندَكُم عَشَرَة آلاف مِن المُعَلِّمين في المَسيح، ما عِندَكُم أبَهات كَتيرين. عَشان أنا بِقيت أبوكُم في المَسيح يَسُوع بِالإنجيل.

¹⁶ و أطلُب ليكُم تَعمِلو زي ما أنا بَعمِل.

¹⁷ عَشان كِدا رَسَّلتَ ليكُم تِيمُوثَاوُس، إبني الحَبيب و الأمين في الرَّب. و هو بِذَكِّركُم بِطُرُقي في المَسيح زي ما بَعِلِّم في كُلّو مَحَل في كُلّو كَنيسَه.

¹⁸ بَعض مِنَّكُم بِقيتو مِتكَبِّرين و تَفتَكِرو أنا ما بَجيكُم.

¹⁹ لَكِنّي بَجيكُم قَوام إن شاء الرَّب، و بَعرِف مُش كَلام المَتكَبِّرين، لَكِن قُوَتُم.

²⁰ عَلَشان مَلَكوت الله مُش بِالكَلام، لَكِن بِالقُوَّه.

²¹ إنتو دايرين شِنو؟ بَجي ليكُم بِعَصايَه؟ ولّا بِالمَحَبَّه و روح لَطيف؟