١ كُورِنْثُوس 3 - كِتاب العَهد الجَّديد مِن الكِتاب المُقَدَّس

عَن الأقسام في الكَنيسَه

¹ و أنا، يا أخوان، ما قِدِرتَ أكَلِّمكُم زي ناس روحيين، لَكِن زي ناس جِسميين، زي أطفال صُغار في المَسيح.

² أدّيتكُم لَبَن عَشان تَشرَبو، مُش أكل. عَشان لِسَّع ما قِدِرتو تاكلوهو. و هَسَّع كَمان ما بِتَقدَرو.

³ عَشانكُم لِسَّع ناس جِسميين، عَشان إذا كان فيكُم حَسَد و شَكلَه، إنتو ما ناس جِسميين و ماشين حَسَب ناس الدُّنيا؟

⁴ لَمّا واحِد يَقول: ”أنا لِبُولُس،“ و التّاني: ”أنا لِأَبُلُّوس،“ إنتو ما ناس جِسميين؟

⁵ عَلَشان مِنو أَبُلُّوس، و مِنو بُولُس؟ هُم خَدّامين، و إنتو آمَنتو بِواسِطَتُم زي ما الرَّب أدّا لِكُلّو واحِد.

⁶ أنا زَرَعتَ، و أَبُلُّوس أدّاها مويَه، لَكِن الله، هو الكان بِزيدو.

⁷ عَشان كِدا، المُزارِع ما حاجَه ولّا البِدّيها مويَه، لَكِن الله البِزيدو.

⁸ و المُزارِع و البِدّيها مويَه هُم واحِد، و كُلّو واحِد بياخُد أُجرَتو بِحَسَب شُغلو.

⁹ عَشان نِحنا عامِلين مَعَ الله، و إنتو زِراعَة الله، بُنا الله.

¹⁰ أنا، بِحَسَب النِّعمَه الأدّاني الله، زي بَناء شاطِر، خَتّيت أساس، و تاني يَبني عَليهو. خَلّي كُلّو واحِد يَشوف كيف يَبني عَليهو.

¹¹ عَشان واحِد ما بِقدَر يَخُت أساس تاني إلّا المَختوت، و هو يَسُوع المَسيح.

¹² لَكِن إن كان واحِد يَبني عَلى الأساس دا دَهَب، ولّا فِضَّه، ولّا حَجَر غالي، ولّا خَشَب، ولّا دِريس، ولّا قَش،

¹³ عَمَل كُلّو واحِد بِبقى بايِن. عَشان اليوم بِوَرّيهو، و هو يَبَيِّن بِالنّار. و النّار بِتَمتَحِن عَمَل كُلّو واحِد هو مِن ياتو نوع.

¹⁴ إذا كان عَمَل أي زول البَناهو عَلى الأساس بِقعُد، هو بياخُد أُجرَه.

¹⁵ إذا كان النّار أكَلَت عَمَل واحِد، دا بِكون ليهو خَسارَه، لَكِن هو يَخلَص، و لَكِن زي مِن النّار.

¹⁶ ما بِتَعرِفو إنتو هيكَل الله، و روح الله يَسكُن فيكُم؟

¹⁷ كان واحِد يَخرَب هيكَل الله، الله بِخرَبو، عَشان هيكَل الله مُقَدَّس، و إنتو الهيكَل داك.

¹⁸ ما تَخَلّي واحِد يَغِش نَفسو. إذا أي واحِد فيكُم يَفتَكِر هو عِندو حِكمَه في الزَّمَن دا، خَليهو يَبقى بَليد، عَشان يَكون عِندو حِكمَه.

¹⁹ عَشان حِكمَة الدُّنيا دي، هي حاجَه بَليدَه قِدّام الله. عَشان مَكتوب: ”هو ياخُد الشّاطرين بِغِشُّم.“

²⁰ و كَمان: ”الرَّب يَعرِف أفكار الفاهمين بِدون فايدَه.“

²¹ عَلى كِدا، ما تَخَلّي و لا واحِد يَفخَر بِالنّاس، عَشان عِندَكُم كُلّو شي.

²² إذا كان بُولُس ولّا أَبُلُّوس ولّا بُطْرُس ولّا الدُّنيا ولّا الحَياة ولّا الموت ولّا الوَكِت القَريب ولّا الجّاي، عِندَكُم كُلّو حاجَه.

²³ و إنتو لِلمَسيح، و المَسيح لِلَّه.