١ كُورِنْثُوس 16 - كِتاب العَهد الجَّديد مِن الكِتاب المُقَدَّس

لَمَّة القُروش

¹ و عَن لَمَّة القُروش فِشان القِدِّسين. زي ما أمَرتَ كَنايس غَلَاطِيَّه، كِدا أعمِلو إنتو كَمان.

² في اليوم الأوَّل مِن كُلّو أُسبوع، خَلّي كُلّو واحِد مِنَّكُم يَخُت عِندو و يَحفَظو زي ما رِبِح، عَشان لَمّا بَجي ما لازِم تَكون في لَمَّه.

³ و لَمَّن أجي ليكُم، بَرَسِّل النّاس الإنتو إختَرتوهُم بِجَوابات عَشان يَشيلو هَديَّتكُم لِأُورُشَلِيم.

⁴ و إذا تَفتَكِرو أحسَن أنا أمشي كَمان، بِنَمشي سَوا.

التَّعليم الأخير

⁵ بَجي ليكُم بَعَد ما مَريت بِمَكِدونيَّه، عَشان بَمُر بِمَكِدونيَّه.

⁶ يِمكِن بَقعُد مَعاكُم ولّا بَصرُف الشِّتا كَمان، عَلَشان تَساعِدوني في سَفَري لِلمَكان البَمشي ليهو.

⁷ هَسَّع ما عاوِز أشوفكُم و أنا ماري بِطَريق، عَشان عِندي رَجاء أستَنّى مَعاكُم مُدَّه، بِإذِن الرَّب.

⁸ و لَكِنّي بَقعُد في أفَسُس لِغايَة يوم الخَمسين.

⁹ عَشان إنفَتَح لَي باب عَظيم لِلعَمَل النّاجِح. و في عُدوان كَتيرين.

¹⁰ إذا تِيمُوثَاوُس يَجي، شوف أنّو يَكون بِدون خوف مَعاكُم. عَشان هو يَعمِل عَمَل الرَّب زي ما أنا أعمِل.

¹¹ واحِد ما يَحتَقِرو، لَكِن ساعِدوهو في سَفَرو بِسَلام، عَلَشان يَجي لَي. عَشان بَستَنّاهو مَعَ الأخوان.

¹² هَسَّع عَن أَبُلُّوس أخونا، طَلَبتَ ليهو كَتير عَشان يَجيكُم مَعَ الأخوان. و ما كان رَضيان أبَداً يَجي هَسَّع. و لَكِن هو بِجي لَمَّن عِندو فُرصَه.

¹³ أحرِسو، كونو ثابِتين في الإيمان، كونو رُجال و إتشَدَّدو.

¹⁴ أعمِلو كُلّو حاجَه بِمَحَبَّه.

¹⁵ إنتو بِتَعرِفو ناس بيت اسْتِفَانَاس أوَّل ثِمار أَخَائِيَه، و كيف هُم أدّو نُفوسُم لِخِدمَة القِدِّسين. أطلُبو ليكُم، يا أخوان،

¹⁶ تَطيعو ناس زي ديل و كُل البِعمِلو مَعاهُم و بِتعَبو.

¹⁷ أنا مَبسوط عَشان اسْتِفَانَاس و وَفُرْتُونَاتُوس و وَأَخَائِيكُوس جو، عَشانُم مَلو النّاقِص مِنَّكُم.

¹⁸ عَشان هُم أدّو راحَه لِروحي و روحكُم. إحتَرِمو رُجال زيَهُم.

¹⁹ كَنايس آسيا يَسَلِّمو عَليكُم. و أَكِيلَا و بِرِيسْكِلَّا مَعَ الكَنيسَه الفي بيتُم يَسَلِّمو عَليكُم كَتير في الرَّب.

²⁰ يَسَلِّمو عَليكُم كُل الأخوان. سَلِّمو بَعضَكُم عَلى بَعض بِسَلام مُقَدَّس.

²¹ أنا، بُولُس، أكتِب السَّلام دا بِإيدي.

²² إذا كان واحِد ما بِحِب الرَّب، خَليهو يَكون مَلعون. تَعال، يا رَبَّنا!

²³ نِعمَة الرَّب يَسُوع مَعاكُم.

²⁴ مَحَبَّتي مَعَ كُلُّكُم في المَسيح يَسُوع.