١ كُورِنْثُوس 15 - كِتاب العَهد الجَّديد مِن الكِتاب المُقَدَّس

قيامَة المَسيح

¹ و أخَبِّركُم، يا أخوان، بِالإنجيل البَشَّرتَكُم بيهو. و إنتو قِبِلتوهو و تَقومو فيهو.

² و بِالإنجيل دا تَخلَصو إذا كُنتو تَمسِكو بِالكَلام البَشَّرتَكُم بيهو، إذا ما آمَنتو بِدون فايدَه.

³ عَشان سَلَّمتَ ليكُم في الأوَّل القِبِلتو أنا كَمان، إنّو المَسيح مات فِشان خَطايانا بِحَسَب الكُتُب.

⁴ و دَفَنوهو، و قام في اليوم التّالِت حَسَب الكُتُب.

⁵ و ظَهَر لِبُطْرُس، و بَعدين لِلإتناشَر رَسول.

⁶ و بَعَد داك، ظَهَر مَرَّه واحدَه لِزِيادَه مِن خُمسُمِيَّة أخو. أكتَرُم لِسَّع يَعِيشو لِغايَة هَسَّع، و لَكِن بَعض مِنَّهُم نامو.

⁷ و بَعَد داك، ظَهَر لِيَعْقُوب، و بَعدين لِكُل الرُسُل.

⁸ و آخِر الكُل، ظَهَر لَي أنا كَمان، زي المَولود قَبِل الوَكِت المَظبوط.

⁹ عَشان أنا صَغَيِر مِن الرُّسُل، أنا الما بَستَحِق يَسَمّوني رَسول، عَشانّي طَرَدتَ كَنيسَة الله.

¹⁰ لَكِن بِنِعمَة الله أنا زي ما أنا، و نِعمَتو الأدّاها لَي ما كانَت بِدون فايدَه. لَكِن أنا تِعِبتَ أكتَر مِنَّهُم كُلُّهُم. و لَكِن مُش أنا، لَكِن نِعمَة الله المَعاي.

¹¹ و كِدا إذا كان أنا ولّا هُم، كِدا نَبَشِّر، و كِدا إنتو آمَنتو.

قيامَة المَيِّتين

¹² و لَكِن إذا نَبَشِّر بِالمَسيح، إنّو قام مِن بين المَيِّتين، كيف بَعض مِنَّكُم يَقولو ما في قيامَة المَيِّتين؟

¹³ لَكِن إذا ما في قيامَة المَيِّتين، كِدا المَسيح ما قام.

¹⁴ و إذا المَسيح ما قام، بِشارَتنا بِدون فايدَه، و إيمانكُم كَمان بِدون فايدَه.

¹⁵ و يَلقونا كَمان شاهِدين كَضّابين لِلَّه، عَشان شِهِدنا بِالله، هو قَوَّم المَسيح. لَكِن هو ما قَوَّمو إذا كان المَيِّتين ما بِقومو.

¹⁶ عَشان إذا المَيِّتين ما بِقومو، المَسيح كَمان ما قام.

¹⁷ و إذا المَسيح ما قام، إيمانكُم بِدون فايدَه و إنتو لِسَّع في خَطاياكُم.

¹⁸ عَلَشان كِدا، الرَّقَدو في المَسيح كَمان هَلَكو.

¹⁹ إذا كان عِندَنا رَجاء في المَسيح في الحَياة دي بَس، نِحنا مَساكين مِن كُل النّاس.

²⁰ و لَكِن المَسيح بِالحَق قام مِن بين المَيِّتين، و بِقى الأوَّل القام مِن بين الراقِدين.

²¹ عَشان ما دام الموت جا بِإنسان، بِإنسان كَمان جا قيامَة المَيِّتين.

²² عَلَشان زي ما كُلّو بِموتو في آدَم، كِدا كَمان، كُلّو بِكونو حَيين في المَسيح.

²³ لَكِن كُلّو واحِد في دورو. المَسيح الأوَّل القام. بَعدين لَمّا المَسيح بِجي، هُم بِتوع المَسيح بِكونو حَيين.

²⁴ بَعَد داك النِّهايَه بِجي، لَمّا هو يَسَلِّم المَملَكَه لِلَّه الأبو، بَعَد ما خَرَب كُلّو حُكم و كُلّو سُلطَه و كُلّو قُوَّه.

²⁵ عَشانّو لازِم يَملِك لِغايَة ما الله يَخُت كُل العُدوان تِحِت كِرعينو.

²⁶ آخِر عَدو الهو يَخرِبو، هو الموت.

²⁷ ”عَشان الله خَتَّ كُلّو حاجَه تِحِت كِرعينو.“ و لَكِن لَمَّن يَقول هو خَتَّ كُلّو حاجَه تِحتو، يَبَيِّن دا ما يَعني الله نَفسو، هو الخَتَّ كُلّو حاجَه تِحِت المَسيح.

²⁸ لَمّا هو بِخُت كُلّو حاجَه تِحتو، في الوَكِت داك، الإبن يَكون تِحِت الله. و الله خَتَّ كُلّو شي تِحتو، عَشان يَكون الله كُلّو في كُلّو.

²⁹ كان ما كِدا، البِتعَمَّدو فِشان المَيِّتين بِعمِلو شِنو؟ إذا المَيِّتين ما بِقومو كُلّو كُلّو، لِشِنو يِتعَمَّدو فِشان المَيِّتين؟

³⁰ و لِشِنو نِحنا في الخَطَر كُلّو ساعَه؟

³¹ أخَبِّركُم، يا أخوان، بِالفَخر العِندي فيكُم في يَسُوع المَسيح رَبَّنا، بَموت كُلّو يوم.

³² زي ما النّاس بِفتَكِرو، الفايدَه شِنو لَي إذا حارَبتَ وحوش في أفَسُس؟ إذا كان المَيِّتين ما يَقومو: ”خَلّونا ناكُل و نَشرِب، عَشان بُكرَه بِنموت.“

³³ ما تَخَلّوهُم يَغِشّوكُم: ”الأصحاب بَطّالين يَخَسِّر الطَّبيعَه الطَّيبَه.“

³⁴ أرجَعو لِنُفوسكُم زي الواجِب، و ما تَعمِلو خَطيَّه. عَشان بَعض مِن النّاس ما عِندَهُم مَعرِفَه بِالله. بَقول داك عَشان أخَجِّلكُم.

نوع الجِّسم في القيامَه

³⁵ لَكِن واحِد يَقول: ”المَيِّتين بِقومو كيف؟ و بِياتو جِسِم بِجو؟“

³⁶ يا غَشيم! البِتَزرَعو ما يَقوم إذا ما يَموت.

³⁷ لَمّا تَزرَع تيراب، ما بِتَزرَع الجِّسِم البِكون، لَكِن تيراب بَس، يِمكِن مِن دُرَه ولّا نوع تاني مِن التّيراب.

³⁸ لَكِن الله يَدّيها جِسِم زي ما هو كان داير. و لِكُلّو واحِد مِن التّيراب يَدّيهو جِسمو المَخصوص.

³⁹ ما كُلّو جِسِم، جِسِم واحِد. لَكِن لِلنّاس جِسِم واحِد، و لِلبَهايِم جِسِم تاني، و لِلطّير جِسِم تاني، و لِلسَّمَك جِسِم تاني.

⁴⁰ في أجسام مِن السَّما و أجسام مِن الأرض. لَكِن مَجد الأجسام المِن السَّما حاجَه، و مَجد الأجسام المِن الأرض حاجَه تانيَه.

⁴¹ مَجد الشَّمِش شي واحِد، و مَجد القَمَر شي تاني، و مَجد النُّجوم شي تاني. عَشان في فارِق بين نَجمَه و نَجمَه في المَجد.

⁴² و كِدا كَمان قيامَة المَيِّتين. يَزرَعوها جِسِم بِموت، و يَقوم جِسِم ما بِموت أبَداً.

⁴³ يَزرَعوها بِدون إحتِرام، و يَقوم في مَجد. يَزرَعوها في ضُعف، و يَقوم في قُوَّه.

⁴⁴ يَزرَعوها جِسِم طَبيعي، و يَقوم جِسِم روحي. إذا في جِسِم طَبيعي، في جِسِم روحي كَمان.

⁴⁵ كِدا كَمان مَكتوب: ”آدَم الإنسان الأوَّل بِقى نَفس حَيَّه.“ و آدَم الأخير بِقى روح بِدّي حَياة.

⁴⁶ لَكِن الرّوحي ما جا في الأوَّل لَكِن الطَّبيعي، و بَعَد داك الرّوحي.

⁴⁷ الإنسان الأوَّل كان مِن الأرض، تُرابي. الإنسان التّاني مِن السَّما.

⁴⁸ زي الإنسان الأوَّل كان تُرابي، كِدا كَمان هُم المِن التُّراب. و زي الإنسان المِن السَّما، كِدا كَمان هُم المِن السَّما.

⁴⁹ زي ما لِبِسنا صورَة الإنسان التُّرابي، بِنَلبَس كَمان صورَة الإنسان السَّماوي.

⁵⁰ أقول دا، يا أخوان، أجسامنا المَصنوع مِن لَحَم و دَم ما بِقدَرو يورَثو مَلَكوت الله، و البِموت ما بِقدَر يورَث الما بِموت أبَداً.

⁵¹ شوفو! أقول ليكُم سِر. مُش كُلَّنا بِنَرقُد، و لَكِن كُلَّنا بِنِتغَيَّر.

⁵² في دَقيقَه، في قَفل عين، في البوق الأخير. عَشان بِضرُب البوق، و المَيِّتين بِقومو بِأجسام ما بِموتو، و نِحنا بِنِتغَيَّر.

⁵³ عَشان أجسامنا المَصنوعَه مِن تُراب لازِم يِتغَيَّرو لِلأجسام الما يَهلِكو. و أجسامنا البِموتو لازِم يِتغَيَّرو لِلأجسام الما بِموتو أبَداً.

⁵⁴ و لَمّا دا البِقدَر يَهلِك إتغَيَّر لِلما بِقدَر يَهلِك، و لَمّا دا البِموت إتغَيَّر لِلما بِقدَر يَموت أبَداً، في الوَكِت داك بِتِم الكِلمَه المَكتوبَه: ”الغَلَبَه بَلَعَت الموت.

⁵⁵ وين غَلَبتَك، يا موت؟ وين وَجعَك، يا موت؟“

⁵⁶ وَجَع الموت هي الخَطيَّه، و الخَطيَّه عِندَها قُوَّه عَلى ديل التِحِت القانون.

⁵⁷ لَكِن شُكراً لِلَّه البِدّينا الغَلَبَه بِرَبَّنا يَسُوع المَسيح.

⁵⁸ عَلَشان كِدا، يا أخوان المَحبوبين، كونو ثابِتين، ما مُحَرَّكين. و زيدو في عَمَل الرَّب دايماً، عَشان إنتو بِتَعرِفو تَعبكُم ما بِدون فايدَه في الرَّب.