١ كُورِنْثُوس 13 - كِتاب العَهد الجَّديد مِن الكِتاب المُقَدَّس

المَحَبَّه

¹ إذا كان بَتكَلَّم بِلُغات النّاس و المَلائكَه، و لَكِن ما عِندي مَحَبَّه، بِقيت زي جَرَس لَمّا واحِد يَدُقّو، ولّا نَحاس لَمّا الزّول يَضرُبو.

² و إذا كان عِندي هَديَّة النُّبوَّه، و بَعرِف كُل الأسرار، و كُلّو مَعرِفَه، و إذا كان عِندي كُل الإيمان لِغايَة ما أحَرِّك الجِبال، و لَكِن ما عِندي مَحَبَّه، أنا ما حاجَه.

³ و إذا أَدِّي كُل العِندي لِلمَساكين، و سَلَّمتَ جِسمي عَشان يَحرَقوهو، و لَكِن ما عِندي مَحَبَّه، ما في فايدَه لَي.

⁴ المَحَبَّه عِندَها صَبر طَويل، و تَشفُق. المَحَبَّه ما عِندَها حَسَد. المَحَبَّه ما تَحمَد نَفسا و ما مِتكَبِّره.

⁵ و المَحَبَّه عِندَها أدَب، و ما تَطلُب حاجَه لِنَفسا، و ما تَزعَل قَوام، و ما تَفَكِّر في الشَّر.

⁶ المَحَبَّه ما تَفرَح بِالذَّنب، لَكِن تَفرَح بالحَق.

⁷ و تِتحَمَّل كُلّو حاجَه، و تَصَدِّق كُلّو حاجَه، و عِندَها رَجاء لِكُلّو حاجَه، و تَصبُر عَلى كُلّو حاجَه.

⁸ المَحَبَّه ما تَقَع أبَداً. إذا كان في نُبوات، هُم بِتَخلَصو، و اللُّغات عِندَهُم نِهايَه، و المَعرِفَه بِتَخلَص.

⁹ عَشانّا بِنَعرِف بَعض مِن المَعرِفَه و نِتنَبّأ بَعض مِن النُّبوَّه.

¹⁰ و لَكِن لَمّا الكامِل بِجي، في الوَكِت داك المُش كامِل بِوَقِّف.

¹¹ لَمّا كُنتَ وَلَد، كُنتَ بَتكَلَّم زي وَلَد، و كُنتَ بَفتَكِر زي وَلَد، و كُنتَ بَحسِب زي وَلَد. و لَكِن لَمّا بِقيت راجِل، وَقَّفتَ حاجات الوَلَد.

¹² عَشان نِحنا بِنشوف هَسَّع في مِرايا في الضُّلُمَّه، لَكِن في الوَكِت داك وَش لِوَش. هَسَّع بَعرِف بَعض المَعرِفَه، لَكِن في الوَكِت داك بَعرِف بِالتَّمام زي ما هُم عِرفوني بِالتَّمام.

¹³ و هَسَّع يِستَمِرّو الإيمان و الرَّجاء و المَحَبَّه، التّلاتَه ديل. و لَكِن الأكبَر فيهُم المَحَبَّه.