١ كُورِنْثُوس 11 - كِتاب العَهد الجَّديد مِن الكِتاب المُقَدَّس

¹ أتبَعوني زي ما أنا بَتبَع المَسيح.

المُناسَبَه في العِبادَه

² أحمَدكُم عَشانكُم تِتزَكَّروني في كُلّو شي، و تَحفَظو التَّعاليم زي ما سَلَّمتَها ليكُم.

³ لَكِن عاوِزكُم تَعرِفو، راس كُلّو راجِل هو المَسيح، و راس المَرَه هو الرّاجِل، و راس المَسيح هو الله.

⁴ كُلّو راجِل يَصَلّي ولّا يِتنَبّا و رَاسو مُغَطّى يَشتِم رَاسو.

⁵ لَكِن كُلّو مَرَه تَصَلّي ولّا تِتنِبّى و راسا ما مُغَطّى تَشتِم راسا، و ما في فارِق بينا هي و بين المَرَه الحَلَقَت شَعرا.

⁶ عَشان إن كان المَرَه ما تَغَطّي راسا، خَلِيها تَقُص شَعرا. و إذا كان دا عيب لِلمَرَه تَقُص ولّا تَحلِق شَعرا، خَلِيها تَغَطّي راسا.

⁷ و ما تَخَلّي الرّاجِل يَغَطّي رَاسو عَشان هو صورَة الله و مَجدو. لَكِن المَرَه هي مَجد الرّاجِل.

⁸ عَشان الرّاجِل ما مِن المَرَه، لَكِن المَرَه مِن الرّاجِل.

⁹ عَشان الله ما خَلَق الرّاجِل عَلَشان المَرَه، لَكِن المَرَه عَلَشان الرّاجِل.

¹⁰ بِالسَّبَب دا، المَرَه لازِم تَكون ليها عَلامَة سُلطَه عَلى راسا فِشان المَلائكَه.

¹¹ لَكِن المَرَه ما بِدون الرّاجِل، و الرّاجِل ما بِدون المَرَه في الرَّب.

¹² لَكِن زي ما المَرَه كانَت مَصنوعَه مِن الرّاجِل، كِدا الرّاجِل كَمان هو هَسَّع مَولود مِن المَرَه. و كُل الحاجات مِن الله.

¹³ أحكُمو إنتو في نُفوسكُم. هو موافِق لِلمَرَه تَصَلّي لِلَّه و هي ما مُغَطّى؟

¹⁴ الطَّبيعَه نَفسا ما تَعَلِّمكُم؟ إذا كان الرّاجِل عِندو شَعر طَويل، دا عيب ليهو.

¹⁵ لَكِن إذا كان المَرَه عِندَها شَعر طَويل، دا مَجد ليها، عَشان الشَّعر ليها بَدَل مِن غَطا.

¹⁶ إذا كان واحِد يَحِب المُشاكلَه، ما عِندَنا عادَه تانيَه، ولّا كَنايس الله ما عِندَهُم.

عَشا الرَّب

¹⁷ لَكِن في التَّعاليم البَعدو، أنا ما أحمَدكُم، عَشان لَمّا تِتلَمّو، دا مُش لِلأحسَن لَكِن لِلأكعَب.

¹⁸ في الأوَّل، لَمَّن تِتلَمّو في الكَنيسَه، أسمَع إنّو في بينكُم إنقِسامات، و أصَدِّق بَعض مِن دا.

¹⁹ عَشان لازِم يَكون في بينكُم إنقِسامات حَتّى ديل الحَق مَعاهُم، بِكونو بيّنين بينكُم.

²⁰ لَمّا تِتلَمّو سَوا، إنتو ما تِتلَمّو عَشان تاكلو عَشا الرَّب.

²¹ عَشان لَمّا تاكلو، كُلّو واحِد يَمشي قِدّام و ياكُل العَشا بِتاعو. و الواحِد يَجوع و التّاني يَكون سَكران!

²² دا شِنو؟ ما عِندَكُم بُيوت عَشان تاكلو و تَشرَبو فيها؟ و تَحتَقِرو كَنيسَة الله؟ و تَخَجِّلو الما عِندَهُم أكل؟ أقول ليكُم شِنو؟ بَحمَدكُم عَلى دا؟ لا، ما بَحمَدكُم.

²³ عَشان القِبِلتَ مِن الرَّب، كَمان سَلَّمتو ليكُم. يَعني، الرَّب يَسُوع، في اللّيلَه لَمَّن خانوهو، أخَد عيش.

²⁴ و شَكَر و كَسَّرو و قال: ”دا هو جِسمي المَكسور فِشانكُم. أعمِلو دا عَشان تِتذَكَّروني.“

²⁵ و زي داك كَمان أخَد الكُبّايَه بَعَد العَشا، و قال: ”الكُبّايَه دي، هي الإتِّفاق الجَّديد بِدَمّي. أعمِلو دا كُلّو مَرَّه وَكِت ما تَشرَبو، عَشان تِتذَكَّروني.“

²⁶ عَشان كُلّو مَرَّه وَكِت ما تاكلو العيش دا و تَشرَبو مِن الكُبّايَه دي، تَخَبِّرو بِموت الرَّب لِغايَة ما يَجي.

²⁷ إذا كان أي واحِد ياكُل عيش الرَّب دا، ولّا يَشرَب مِن كُبّايَتو بِطَرِيقَه ما مُستَحِقَّه، يَكون عِندو ذَنب في جِسِم الرَّب و دَمّو.

²⁸ لَكِن خَلّي الزّول يَمتَحِن نَفسو، و كِدا ياكُل مِن العيش و يَشرَب مِن الكُبّايَه.

²⁹ عَشان الياكُل و يَشرَب بِدون ما يَفهَم مَعنى جِسِم الرَّب، ياكُل و يَشرَب حُكم لِنَفسو.

³⁰ بِالسَّبَب دا، كَتيرين فيكُم ضَعيفين و عَيّانين، و بَعض مِنَّكُم ماتو.

³¹ عَلَشان إذا كُنّا نَحكُم عَلى نُفوسنا، ما كانو حَكَمو عَلينا.

³² لَكِن إذا كان الرَّب يَحكُم عَلينا و يأدِّبنا، دا عَلَشان ما نَكون مَحكومين مَعَ الدُّنيا.

³³ عَشان كِدا، يا أخواني، لَمّا تِتلَمّو عَشان تاكلو، إستَنّو بَعضَكُم لِبَعض.

³⁴ إذا كان واحِد يَجوع، خَليهو ياكُل في البيت، عَشان ما تَجتَمِعو لِلحُكم. و عَن الحاجات التّانيَه، لَمّا أجي، بَدّيكُم تَعاليم.