١ كُورِنْثُوس 10 - كِتاب العَهد الجَّديد مِن الكِتاب المُقَدَّس

حَذر ضِد الأصنام

¹ و أنا، يا أخوان، ما عاوِزكُم تَكونو بِدون مَعرِفَه، أبَهاتنا كُلَّهُم كانو تِحِت السَّحابَه. و كُلَّهُم مَرّو بِالبَحَر المالِح.

² و كُلُّهُم إتعَمَّدو لِمُوسَى في السَّحابَه و في البَحَر المالِح.

³ و كُلَّهُم أكَلو الأكل الرّوحي نَفسو.

⁴ و كُلَّهُم شِربو الشَّراب الرّوحي نَفسو. عَشانُم كانو يَشرَبو مِن الحَجَر الرّوحي الكان يَتبَعُم. و الحَجَر كان المَسيح.

⁵ لَكِن الله ما كان مَبسوط بِأكتَرُم، عَشان أتفَرتَقو في الخَلا.

⁶ و الحاجات دي بِقو مَثَل لينا، عَشان ما نَدور الحاجات البَطّالَه زي ما هُم كانو عاوزين.

⁷ ما تَكونو خَدّامين لِلأصنام زي ما كانو بَعض مِنَّهُم. زي ما مَكتوب: ”النّاس قَعَدو عَشان ياكلو و يَشرَبو. بَعدين قامو عَشان يَرقُصو.“

⁸ و ما نَعمِل الزِّنا زي بَعض مِنَّهُم، و وَقَعو تلاتَه و عِشرين ألف في يوم واحِد.

⁹ ما نَجَرِّب الرَّب، زي بَعض مِنَّهُم جّرَّبوهو، و الدَّبايب كَتَلوهُم.

¹⁰ و ما نَنَقنِق زي ما بَعض مِنَّهُم نَقنَقو، و مَلاك الموت كَتَلُم.

¹¹ و كُل الحاجات دي حَصَلَت ليهُم زي مَثَل، لَكِن كانَت مَكتوبَه عَشان يَحَذِّرونا. عَشان نِحنا بِنعيش في الوَكِت لَمّا آخِر الزَّمَن قَرَّب.

¹² عَلَشان كِدا، اليَفتَكِر هو يَقوم، لازِم يَخَلّي بالو عَشان ما يَقَع.

¹³ ما في تَجرِبَه حَصَلَت ليكُم إلّا زي ما تَجي لِكُل النّاس. لَكِن الله أمين. هو ما يَخَلّيكُم تَكونو مُجَرَّبين فوق ما تَقدَرو. لَكِن لَمّا تَكونو مَجَرَّبين، هو بيَعمِل طَرِيقَة الهُروب عَشان تَقدَرو تِتحَمَّلوها.

¹⁴ عَشان كِدا، يا مَحبوبين، أهرُبو مِن عِبادَة الأصنام.

¹⁵ أقول ليكُم زي ما أقول لِلفاهمين. أحكُمو إنتو في الأقول.

¹⁶ كُبّايَة البَرَكَه البيها نَبارِك، ما هي شَرِكَة دَم المَسيح؟ العيش النَّكَسِّرو، ما هو شَرِكَة جِسِم المَسيح؟

¹⁷ عَلَشان في عيش واحِد، نِحنا، الكَتيرين، جِسم واحِد، عَشان كُلُّنا نَشتَرِك في العيش الواحِد.

¹⁸ شوفو إِسْرَائِيل حَسَب الجِّسِم. ما هُم الياكلو الضَّبايح شُرَكاء مَحَل الضَّبيحَه؟

¹⁹ كِدا المَعنى شِنو؟ اليَضبَحوهو لِلصَّنَم حاجَه؟ ولّا الصَّنَم حاجَه؟

²⁰ لا، لَكِن ديل اليَضبَحو ضَبايح لِلأصنام، يَضبَحوها لِلشّياطين، مُش لِلَّه. ما بَدوركُم تَكونو شُرَكاء الشّياطين.

²¹ ما تَقدَرو تَشرَبو مِن كُبّايَة الرَّب و مِن كُبّايَة الشّياطين. ما تَقدَرو تَشتَرِكو في طَرَبيزَة الرَّب و في طَرَبيزَة شياطين.

²² بِنحَرِّك الرَّب لِلغيرَه؟ نِحنا أشَدّا مِنّو؟

حُرِّيَّة المؤمِن

²³ ”عِندَنا إذِن لِكُلّو شي،“ لَكِن كُلّو شي ما مُساعَدَه. ”عِندَنا إذِن لِكُلّو شي،“ لَكِن كُلّو شي ما يَبني.

²⁴ ما تَخَلّي واحِد يَطلُب البِساعِد نَفسو، لَكِن البِساعِد التّاني.

²⁵ أُكلو كُل اليَبيعوهو في سوق اللَّحَم، و ما تَسألو عَن حاجَه فِشان الضَّمير.

²⁶ عَلَشان: ”لِلرَّب الأرض، و كُل الفيها.“

²⁷ و إن كان واحِد الما بِآمِنو ناداكُم عَشان تاكلو و إنتو دايرين تَمشو، أُكلو مِن كُل الهو يَقَدِّم ليكُم. و ما تَسألوهو عَن حاجَه فِشان الضَّمير.

²⁸ لَكِن إن واحِد قال ليكُم: ”دا مَضبوح لِصَنَم،“ ما تاكلو، فِشان الزّول الخَبَّركُم و عَلَشان الضَّمير.

²⁹ يَعني ضَمير الزّول التّاني، ما ضَميرَك إنتَ. عَلَشان لِشِنو يِتحَكَم عَلى حُرّيتي بِضَمير الزّول التّاني؟

³⁰ إذا أقول شُكراً لِلَّه عَشان أكلي، لِشِنو يَشتِموني لِلحاجَه الأقول شُكراً ليها.

³¹ كِدا، إذا تاكلو ولّا تَشرَبو ولّا تَعمِلو أي حاجَه، أعمِلو كُلّو حاجَه لِمَجد الله.

³² ما تَكونو سَبَب لِخَطيَّه لِليَهود ولّا لِناس إغريقيين ولّا لِكَنيسَة الله،

³³ زي ما أنا كَمان أبسِط كُل النّاس في كُلّو شي. و ما بَطلُب البِكون لِفايدَة نَفسي، لَكِن البِكون لِفايدَة كَتيرين عَشان يَخلَصو.