١ كُورِنْثُوس 1 - كِتاب العَهد الجَّديد مِن الكِتاب المُقَدَّس

¹ مِن بُولُس، المُختار عَشان يَكون رَسول لِيَسُوع المَسيح بِإرادَة الله، و مِن سُوسْتَانِيس الأخو.

² لِكَنيسَة الله الفي كُورِنْثُوس، المُقَدَّسين في المَسيح يَسُوع، المُختارين عَشان يَكونو قِدِّيسين مَعَ كُل البِنادو لِإسم رَبَّنا يَسُوع المَسيح في كُلّو مَحَل، رَبُّم و رَبَّنا.

³ نِعمَه و سَلام ليكُم مِن الله أبونا و الرَّب يَسُوع المَسيح.

الشُّكر

⁴ أشكُر الله في كُلّو وَكِت فِشانكُم، عَشان الله أدّاكُم النِّعمَه الفي يَسُوع المَسيح،

⁵ عَشان إنتو بِقيتو غَنيين فيهو، في كُلّو شي و في كُلّو كَلام و كُلّو مَعرِفَه.

⁶ و كِدا شَهادَتنا عَن المَسيح إتأكَّدَت فيكُم.

⁷ و عَشان كِدا إنتو ما ناقصين في أي هَدِيَّه مِن الرّوح، و إنتو مُستَنّين ظُهور رَبَّنا يَسُوع المَسيح.

⁸ هو بِشَدِّدكُم لِلآخِر بِدون لوم في يوم رَبَّنا يَسُوع المَسيح.

⁹ الله أمين، هو النّاداكُم لِشَرِكَة إبنو يَسُوع المَسيح رَبَّنا.

أقسام في الكَنيسَه

¹⁰ لَكِنّي أطلُب ليكُم، يا أخوان، بِإسم رَبَّنا يَسُوع المَسيح، كُلُّكُم تَقولو كَلام واحِد. و ما يَكون بينكُم أقسام، لَكِن تَفتَكِرو فِكِر واحِد بِعَقل واحِد.

¹¹ عَشان أهل خُلُوِي خَبَّروني، يا أخواني، عَن الشَّكلات الفي بينكُم.

¹² يَعني كُلّو واحِد مِنَّكُم يَقول: ”أنا لِبُولُس،“ ولّا: ”أنا لِأَبُلُّوس،“ ولّا: ”أنا لِبُطْرُس،“ ولّا: ”أنا لِلمَسيح.“

¹³ المَسيح إنقَسَم؟ بُولُس إنصَلَب عَشانكُم؟ بِإسم بُولُس إتعَمَّدتو؟

¹⁴ أشكُر الله أنا ما عَمَّدتَ واحِد مِنَّكُم إلّا كِرِيسْبُس و غَايُوس،

¹⁵ عَشان واحِد ما يَقول هو إتعَمَّد بِإسمي.

¹⁶ و كَمان عَمَّدتَ أهل بيت اسْتِفَانُوس. و فوق دا ما أتزَكَّر أنا عَمَّدتَ أي زول تاني.

¹⁷ عَشان المَسيح ما رَسَّلني لِأعَمِّد، لَكِن لِأبَشِّر بِالإنجيل، مُش بِكَلام شاطِر، عَشان صَليب المَسيح ما يَبقى بِدون فايدَه.

المَسيح حِكمَة و قُوَّة الله

¹⁸ عَلَشان كِلمَة الصَّليب عِند البِموتو كَلام فاضي، لَكِن عِندَنا المُخَلَّصين هي قُوَّة الله.

¹⁹ عَشان مَكتوب: ”أنا بَخَسِّر حِكمَة العاقِلين، و أرفُض فَهم الفاهمين.“

²⁰ وين الفَهيم؟ وين الكاتِب؟ وين المِشاكِل بِتاع الزَّمَن دا؟ الله ما عَمَل حِكمَة الدُّنيا دي تَبقى بَليدَه؟

²¹ عَشان إذا كان الدُّنيا، في حِكمَة الله، ما عِرِفَت الله بِالحِكمَه، إنبَسَط الله أن يَخَلِّص المؤمِنين بِبَلادَة البِشارَه.

²² عَلَشان اليَهود يَسألو عَلامات، و ناس إغريقيين يَطلُبو حِكمَه.

²³ و لَكِن نِحنا نَبَشِّر بِالمَسيح المَصلوب، لِليَهود عَترَه و لِناس إغريقيين حاجَه بَليدَه.

²⁴ لَكِن لِلمُختارين، يَهود و ناس إغريقيين، المَسيح هو قُوَّة الله و حِكمَة الله.

²⁵ عَشان الشّي البَليد بِتاع الله عِندو حِكمَه أكتَر مِن حِكمَة النّاس، و ضُعف الله قَوّي مِن النّاس.

²⁶ فَكِّرو في إختياركُم، يا أخوان، ما في كَتيرين مِنَّكُم الكُنتو فاهمين بِحَسَب الجِّسِم. ما في كَتيرين شَديدين، ما في كَتيرين مُحتَرمين.

²⁷ لَكِن الله إختار الحاجات البَليدَه في الدُّنيا عَشان يَخَجِّل الفاهمين. و الله إختار الضَّعيفين في الدُّنيا عَشان يَخَجِّل الشَّديدين.

²⁸ و الله إختار المِتواضِعين و المُحتَقرين في الدُّنيا، و الحاجات الما مَوجودَه، عَشان يَوَقِّف الحاجات المَوجودَه.

²⁹ عَلَشان واحِد ما يَقدَر يَشكُر نَفسو قِدّام الله.

³⁰ لَكِن إنتو عِندَكُم مِن الله حَياة في المَسيح. و هو بِقى لينا حِكمَه مِن الله، و بِر، و قَداسَه، و فِداء.

³¹ عَشان كِدا زي ما مَكتوب: ”العاوِز يَمَجِّد، خَليهو يَمَجِّد الرَّب.“