Yuuḥanna 9 - Kitaab al Vahd aj Jadid 1978

AR RAAJIL AL MAWLUUD VAMYAAN

¹ Wa lamma kaan yamshi, shaaf raajil vamyaan min wilaadtu.

² Wa talaamiizu sa’aloohu wa gaalu, “Yaa Muvallim, minu vamal xaṭiyya, ar raajil da? walla waalideehu? valashaan hu kaan mawluud vamyaan.”

³ Yasuuv radda wa gaal leehum, “Ar raajil da maa vindu xaṭiyya, walla waalideehu, laakin vashaan avmaal Allaah biẓharu fiihu.

⁴ Laazim navmil avmaal ar rassalni maa daam an nahaar. Vashaan biji leel lamma waaḥid maa yagdar yashtaghil.

⁵ Wa lamma ana fi_d dunya, ana nuur ad dunya.”

⁶ Wa lamma gaal kida, bazag vala_l arḍ, wa vamal ṭiin min al buzaag, wa xaṭṭa_ṭ ṭiin foog vuyuun al vamyaan.

⁷ Wa gaal leehu, “Amshi ghassil fi birkat Siluwaam, al mavnaaha marassal.” Bavdeen masha wa ghassal, wa ja, wa gidir yashuuf.

⁸ Wa_j jeeraan wa_n naas al kaanu bishuufuuhu min zamaan lamma huwa kaan vamyaan, gaalu, “Mush da ar raajil al kaan biyagvud wa yas’al ḥaaja min an naas?”

⁹ Wa bavḍ min an naas gaalu, “Da huwa,” wa laakin taanyiin gaalu, “Da zeiyu.” Wa huwa gaal, “Ana huwa.”

¹⁰ Wa gaalu leehu, “Keef vuyuunak infataḥat?”

¹¹ Hu radda wa gaal leehum, “Insaan ismu Yasuuv vamal ṭiin wa masaḥ vuyuuni wa gaal leiya, Amshi le birkat Siluwaam wa ghassil. Wa masheet wa ghassalta wa vuyuuni infataḥat.”

¹² Hum gaalu leehu, “Huwa ween?” Gaal leehum, “Ana maa bavrif.”

¹³ Wa jaabu le_l Farriisiyyiin ar raajil al gubbaal kaan vamyaan.

¹⁴ Wa kaan yoom as sabit lamma Yasuuv vamal aṭ ṭiin wa fataḥ vuyuun al vamyaan.

¹⁵ Al Farriisiyyiin sa’aloohu kamaan, “Keef vuyuunak infataḥat?” Wa gaal leehum, “Huwa xaṭṭa ṭiin vala vuyuuni, wa ana ghassalta, wa hassav bashuuf.”

¹⁶ Wa bavḍ al Farriisiyyiin gaalu, “Ar raajil da mush min Allaah, vashaan huwa maa biḥfaẓ as sabit.” Taanyiin gaalu, “Keef raajil xaaṭi yagdar yavmil zei al valaamaat di?” Wa bigu mingasimiin.

¹⁷ Gaalu le_l vamyaan marra taanya, “Wa inta taguul vannu shinu, vashaan fataḥ vuyuunak?” Wa gaal, “Huwa nabi.”

¹⁸ Wa_l Yahuud maa ṣaddagu huwa kaan vamyaan wa vuyuunu infataḥat, lighaayat maa naadu waalideehu.

¹⁹ Wa gaalu leehum, “Da huwa waladkum al gultu ’innu itwalad vamyaan? Keef huwa bishuuf hassav?”

²⁰ Waalideehu raddu wa gaalu leehum, “Niḥna vaarfiin da waladna, wa huwa itwalad vamyaan.

²¹ Laakin keef huwa bishuuf hassav, niḥna maa binavrif, walla minu fataḥ vuyuunu niḥna maa binavrif. Huwa biga raajil. As’aluuhu, wa huwa yitkallam van nafsu.”

²² Wa waalideehu gaalu kida vashaan hum kaanu xaayifiin min al Yahuud, vashaan al Yahuud ittafagu, ’innu iza waaḥid ivtaraf huwa_l Masiiḥ, yaṭruduuhu min beet ar Rabb.

²³ Vashaan kida, waalideehu gaalu, “Huwa biga raajil. As’aluuhu.”

²⁴ Wa marra taanya naadu_r raajil al kaan vamyaan, wa gaalu leehu, “Addi_l majd le Allaah. Niḥna binavrif ar raajil da xaaṭi.”

²⁵ Huwa radda wa gaal leehum, “Iza huwa xaaṭi ana maa bavrif, laakin ana avrif shi waaḥid. Ana kunta vamyaan, wa hassav ana bashuuf.”

²⁶ Wa valashaan kida gaalu leehu, “Hu vamal leek shinu? Keef fataḥ vuyuunak?”

²⁷ Radda valeehum wa gaal, “Ana gulta leekum wa intu maa simivtu. Le shinu vaawziin tasmavu taani? Intu daayiriin takuunu talaamiiz leehu?”

²⁸ Wa shatamoohu wa gaalu, “Inta tilmiiz ar raajil daak, laakin niḥna talaamiiz Muusa.

²⁹ Niḥna binavrif Allaah kallam Muusa, laakin az zool da, niḥna maa vaarfiin huwa min ween.”

³⁰ Ar raajil radda valeehum wa gaal, “Da vajiib! Intu maa vaarfiin huwa min ween, wa huwa fataḥ vuyuuni!

³¹ Niḥna binavrif Allaah maa bismav le_l xaaṭiyiin, laakin kaan waaḥid yaxaaf Allaah wa yavmil iraadatu, Allaah yasmav leehu.

³² Min maa Allaah xalag al arḍ, maa simivna waaḥid fataḥ vuyuun zool mawluud vamyaan.

³³ Iza ar raajil da maa kaan min Allaah, maa kaan gidir yavmil shi.”

³⁴ Raddu wa gaalu leehu, “Inta kunta mawluud fi_l xaṭaaya tamaam, wa inta tavallimna?” Wa ṭaradoohu barra.

³⁵ Wa Yasuuv simiv hum ṭaradoohu barra. Wa ligaahu wa gaal leehu, “Inta bit’aamin be Ibn Allaah?”

³⁶ Radda wa gaal leehu, “Minu huwa, yaa Saiyid, vashaan a’aamin beehu?”

³⁷ Yasuuv gaal leehu, “Inta shuftu, wa_l bitkallam mavaak da huwa.”

³⁸ Wa gaal, “Ba’aamin, yaa Saiyid.” Wa vabadu.

³⁹ Wa Yasuuv gaal leehu, “Ana jiit le_d dunya di vashaan aḥkum, ḥatta_n naas al maa bishuufu bishuufu, wa_l bishuufu bikuunu vamyaaniin.”

⁴⁰ Wa bavḍ min al Farriisiyyiin al kaanu mavaahu, simivu wa gaalu leehu, “Niḥna kamaan vamyaaniin?”

⁴¹ Yasuuv gaal leehum, “Iza kuntu vamyaaniin, maa kaanat vindakum xaṭiyya. Laakin hassav bitguulu, Niḥna binshuuf. Xaṭiyyatkum gaavda.