Matta 21 - Kitaab al Vahd aj Jadid 1978

AD DUXUUL FI_N MAṢR

¹ Wa lamma garrabu le Uurushaliim wa wiṣil Beetfaaji, fi Jabal az Zeetuun, Yasuuv rassal itneen min talaamiizu

² wa gaal leehum, “Amshu le_l ḥilla al giddaamkum, wa ṭawwaali bitalgu ḥumaara marbuuṭa, wa jana mavaaha. Fikkuuhum wa jiibuuhum leiya.

³ Iza aiyi waaḥid biguul leekum ḥaaja, kallimuuhu, Ar Rabb muḥtaaj leehum, wa hu birassilum ṭawwaali.”

⁴ Wa da vashaan yatimm al kalaam al gaal an nabi,

⁵ “Guulu le bint Ṣiḥyuun, Shuufi, al malik bitaavik biji leek Wadiiv, wa raakib vala ḥumaara. Wa vala daḥash, jana ḥumaara.”

⁶ Wa_t talaamiiz mashu wa vamalu zei maa Yasuuv amarum.

⁷ Wa jaabu_l ḥumaara wa_d daḥash, wa xaṭṭu hiduumum valeehum. wa Yasuuv gavad foogum.

⁸ Wa_j jamav al kabiir farashu hiduumum fi_s sikka, wa naas taanyiin gaṭavu furuuv min ash shajar wa farashooha fi_s sikka.

⁹ Wa_n naas al mashu giddaamu wa_n naas al mashu waraahu kooraku, “Uuṣanna le Ibn Daawuud! Mubaarak aj jaai b_ism ar Rabb! Uuṣanna fi_l vaali.”

¹⁰ Wa lamma Yasuuv daxal Uurushaliim, kull al madiina itḥarrak. Wa sa’alu wa gaalu, “Da minu?”

¹¹ Wa_n naas raddu wa gaalu, “Da Yasuuv, an nabi min Naaṣira_j Jaliil.”

YASSUUV FI_L HEEKAL

¹² Wa Yasuuv daxal maḥall al heekal wa ṭarad kull an naas al kaanu bibiivu wa bishtaru fi_l heekal. Wa galab ṭarabeezaat an naas al kaanu bibaddil al guruush wa karaasi_n naas al kaanu bibiivu_l ḥamaam.

¹³ Wa gaal leehum, “Maktuub, Bisammu beeti beet le_ṣ ṣala. Laakin intu vaamiliinu beet le ḥaraamiyya.”

¹⁴ Wa_l vamyaaniin wa_n naas al vuruj garrabu leehu fi maḥall al heekal, wa hu shafaahum.

¹⁵ Wa laakin lamma_l gusus al kubaar wa muvallimiin al gaanuun shaafu_l ḥaajaat al vajiiba al hu vamala, wa shaafu_l awlaad bikooriku fi maḥall al heekal, “Uuṣanna le Ibn Daawuud,” kaanu zavlaaniin.

¹⁶ Wa gaalu leehu, “Bitasmav al kalaam al awlaad deel biguulu?” Wa Yasuuv gaal, “Aiwa. Maa gareetu, Min xushuum awlaad wa aṭfaal jahhazta_l ḥamd?”

¹⁷ Wa xallaahum wa marag min al madiina di le Beetvanya, wa naam hinaak.

SHAJARAT AT TIIN YEEBAS

¹⁸ Wa fi_ṣ ṣabaaḥ, wakit maa kaan fi_s sikka raajiv le_l madiina, kaan javaan.

¹⁹ Wa lamma shaaf shajarat tiin jamb as sikka, garrab leeha, wa laakin maa liga ḥaaja fiiha illa warag bass. Wa gaal leeha, “Maa bikuun tamar minnak taani marra le_l abad.” Wa ṭawwaali ash shajara yibsat.

²⁰ Lamma_t talaamiiz shaafu da, istaghrabu wa gaalu, “Keef ash shajara yibsat ṭawwaali?”

²¹ Yasuuv radda wa gaal leehum, “Aguul leekum al ḥagg, iza vindakum iimaan, wa maa tashikku fi guluubkum, intu maa bitavmilu bass al ana vamaltu le_sh shajara, laakin iza bitguulu le_j jabal da, Amshi, armi nafsak fi_l baḥar, bikuun kida.

²² Wa iza bitṣaddigu, kull al intu bitaṭlubu leehu fi_ṣ ṣala, bitagbaluuhu.”

²³ Wa lamma daxal maḥall al heekal, al gusus al kubaar wa shuyuux an naas garrabu leehu wakit maa hu kaan bivallim an naas. Wa gaalu leehu, “Bitavmil al ḥaajaat di be yaata sulṭa? Wa minu addaak as sulṭa di?”

²⁴ Yasuuv radda valeehum wa gaal, “Wa ana kamaan bas’alkum su’aal waaḥid. Iza intu bitruddu valeiya, ana kamaan bakallimkum be yaata sulṭa avmil al ḥaajaat di.

²⁵ Mavmuudiyyat Yuuḥanna kaanat min ween? Min as sama? Walla min an naas?” Wa fakkaru fi nufuusum wa gaalu, “Iza naguul, Min as sama, hu biguul, Le shinu maa ṣaddagtu beehu?

²⁶ Wa laakin iza naguul, Min an naas, niḥna xaayifiin min an naas, vashaan kulluhum biguulu Yuuḥanna nabi.”

²⁷ Vashaan da, hum raddu vala Yasuuv wa gaalu, “Maa binavrif.” Wa hu kamaan gaal leehum, “Wa laa ana baguul leekum be yaata sulṭa bavmil al ḥaajaat di.

MASAL AL WALADEEN

²⁸ Taftakiru shinu? Kaan fih raajil vindu waladeen. Wa hu masha le_l awwal wa gaal leehu, Yaa waladi, amshi an nahaar da wa ishtaghil fi_j jineena bitaavat al vinab.

²⁹ Hu radda valeehu wa gaal, Ana maa bamshi. Laakin bavdeen taab wa masha.

³⁰ Bavdeen abuuhu masha le_t taani wa gaal nafs al kalaam. Wa radda valeehu wa gaal, Ana bamshi, yaa saiyid. Laakin hu maa masha.

³¹ Yaatu min al itneen vamal iraadat al abu?” Gaalu, “Al awwal.” Yasuuv gaal leehum, “Aguul leekum al ḥagg. An naas al bilimmu_ḍ ḍariiba wa_n niswaan al baṭṭaalaat bidxulu malakuut Allaah gubbaalkum.

³² Valashaan Yuuḥanna ja leekum maashi fi sikkat al birr, w_intu maa ṣaddagtu beehu. Laakin an naas al bilimmu_ḍ ḍariiba wa_n niswaan al baṭṭaalaat ṣaddagu beehu. Wa intu, lamma shuftu_l ḥaajaat deel, maa tubtu wa maa ṣaddagtu beehu.

MASAL AL MUZAARIVIIN AL BAṬṬAALIIN

³³ Asmav masal taani. Kaan fih siid beet, wa hu zarav jineent al vinab. Wa xaṭṭa zariiba ḥawla. Wa ḥafar vaṣaara le_l vinab, wa bana beet ḥars. Wa bavdeen ajjara le muzaariviin wa saafar.

³⁴ Wa lamma wakit at tamar garrab, rassal xaddaamiinu le_l muzaariviin vashaan yaaxudu tamaru.

³⁵ Wa_l muzaariviin masaku xaddaamiinu, wa ḍarabu_l waaḥid da, wa katalu daak, wa ramu ḥujaar vala taani.

³⁶ Wa bavdeen, hu rassal leehum xaddaamiin taanyiin, aktar min al wakit al awwal. Wa_l muzaariviin vamalu leehum zei maa vamalu fi_l awwal.

³⁷ Fi_l aaxir, rassal leehum waladu, wa gaal, Hum biḥtarimu ibni.

³⁸ Wa laakin lamma_l muzaariviin shaafu_l ibn, gaalu bavḍahum le bavḍ, Da huwa al bigbal al maal min abuuhu. Tavaalu, naktulu wa naaxud kullu maalu.

³⁹ Wa axadoohu wa ramoohu barra min aj jineena wa kataloohu.

⁴⁰ Vala kida, lamma ṣaaḥib jineent al vinab biji, biyavmil shinu le_l muzaariviin?”

⁴¹ Gaalu leehu, “Hu biktul an naas al baṭṭaliin deelaak katl baṭṭaal, wa ya’ajjir jineent al vinab le muzaariviin taanyiin bidduuhu at tamar bitaavu fi waktu.”

⁴² Yasuuv gaal leehum, “Maa gareetu abadan fi_l kitaab? Al ḥajar al bannaayiin abu, hu biga raas ar rukn. Ar Rabb vamal da, wa hu vajiib giddaamna.

⁴³ Vashaan da aguul leekum, biyaaxud malakuut Allaah minnakum wa biddiihu le naas taanyiin yajiibu tamaru.”

⁴⁴ Wa_z zool al yagav vala_l ḥajar da, bitkassar. Wa laakin lamma_l ḥajar daak yagav vala aiyi zool, bikassiru ḥitta ḥitta.

⁴⁵ Wa lamma_l gusus al kubaar wa_l Farriisiyyiin simivu amsaal Yasuuv, virifu hu kaan bitkallam vannum.

⁴⁶ Wa lamma jarrabu yamsikuuhu, xaafu min aj jumuuv, vashaan an naas gaalu hu nabi.