Matta 17 - Kitaab al Vahd aj Jadid 1978

AT TAGHYIIR AL MAJIID

¹ Wa bavd sittat aiyaam, Yasuuv axad mavaahu Buṭrus wa Yavkuub wa Yuuḥanna axuuhu. Wa gaadum le jabal vaali baraahum.

² Wa shaklu kaan maghayyar, wa washshu itnawwar zei ash shamish, wa hiduumu biga abyaḍ zei an nuur.

³ Wa shuuf! Muusa wa Iiliyya ẓaharu leehum yitkallamu mavaahu.

⁴ Wa Buṭrus radda wa gaal le Yasuuv, “Yaa Rabb, kwaiyis leena nakuun hina. Iza inta daayir, bavmil talaata xiyaam hina, waaḥda leek, wa waaḥda le Muusa, wa waaḥda le Iiliyya.”

⁵ Wa wakit maa kaan lissav yitkallam, shuuf! saḥaaba laamva vamalat ḍull valeehum. Wa ṣoot min as saḥaaba gaal, “Da huwa Ibni_l ḥabiib, wa ana mabsuuṭ minnu. Asmavu leehu.”

⁶ Lamma_t talaamiiz simivu da, wagavu vala wushuushum, wa xaafu jiddan.

⁷ Laakin Yasuuv ja wa limisum wa gaal, “Guumu, wa maa taxaafu.”

⁸ Wa lamma rafavu vuyuunum, maa shaafu waaḥid illa Yasuuv bass.

⁹ Wa wakit maa hum naaziliin min aj jabal, Yasuuv amarum wa gaal, “Maa takallimu aiyi waaḥid van ar ru’ya, lighaayat maa Ibn al insaan yaguum min been al meyyitiin.”

¹⁰ Wa_t talaamiiz sa’aloohu wa gaalu, “Iza kida, le shinu muvallimiin al gaanuun yaguulu Iiliyya laazim biji fi_l awwal?”

¹¹ Radda valeehum wa gaal, “Iiliyya jaai wa birajjiv kullu shi.

¹² Laakin aguul leekum, Iiliyya ja hassav, wa maa virfoohu, laakin vamalu leehu kull al hum daaru. Zei da, Ibn al insaan kamaan bitvazzab minnahum.”

¹³ Fi_l wakit daak, at talaamiiz fihmu hu gaal leehum van Yuuḥanna_l Mavmadaan.

SHIFA AL WALAD MITVAZZAB

¹⁴ Wa lamma jo le_j jamaava, zool garrab leehu wa rakav giddaamu wa gaal,

¹⁵ “Yaa Rabb, kuun raḥiim le waladi, vashaan huwa vindu_l vaya al bitarmiihu tiḥit, wa bitvazzab jiddan. Vashaan marraat katiira yagav fi_n naar, wa marraat katiira yagav fi_l mooya.

¹⁶ Wa jibtu le talaamiizak, wa maa gidru yashfuuhu.”

¹⁷ Wa Yasuuv radda wa gaal, “Yaa awlaad az zaman da, al biduun iimaan wa ruseekum gawwiyya, le miteen bakuun mavaakum? Le miteen ana batḥammalkum? Jiibu leiya hina.”

¹⁸ Wa Yasuuv kallamu shadiid, wa_sh sheeṭaan ṭalav minnu. Wa_l walad biga ṭaiyib ṭawwaali.

¹⁹ Bavdeen at talaamiiz jo le Yasuuv baraahum, wa gaalu, “Le shinu niḥna maa gidirna naṭallivu?”

²⁰ Wa gaal leehum, “Valashaan iimaankum galiil. Vashaan be_l ḥagg aguul leekum, iza kaan leekum iimaan zei teeraab xardal, bitguulu le_j jabal da, Itḥarrak min hina le_l maḥall hinaak, wa hu yitḥarrak. Wa maa fih ḥaaja bitkuun maa mumkin leekum.

²¹ Wa laakin an nuuv da maa biṭlav illa be_ṣ ṣala wa_ṣ ṣoom.”

²² Wa wakit maa yamshu fi_j Jaliil, Yasuuv gaal leehum, “Ibn al insaan bitsallam le iideen an naas.

²³ Wa hum biyaktuluuhu, wa hu biguum fi_l yoom at taalit.” Wa hum kaanu ḥaznaaniin jiddan.

²⁴ Wa lamma jo le Kafranaaḥuum, an naas al bilimmu_r riyaal garrabu le Buṭrus wa gaalu leehu, “Muvallimak maa tadfav aḍ ḍariiba?”

²⁵ Gaal, “Aiwa.” Wa lamma daxal al beet, Yasuuv itkallam fi_l awwal wa gaal, “Taftakir shinu? yaa Simvaan. Min minu yaaxudu muluuk ad dunya rusuum aj jumruk walla_ḍ ḍariiba? min awlaadum walla min al ghariibiin?”

²⁶ Buṭrus gaal, “Min al ghariibiin.” Yasuuv gaal leehum, “Vala kida al awlaad ḥurriin.

²⁷ Laakin vashaan maa nazavvilum, amshi le_l baḥar w_armi jabbaada. Uxud awwal samaka al bitaṭlav. Wa lamma taftaḥ xashma, bitalga riyaal. Uxdu, w_addiihu leehum fishaanni wa fishaanak.”