Matta 13 - Kitaab al Vahd aj Jadid 1978

MASAL AL MUZAARIV

¹ Fi nafs al yoom, Yasuuv marag min al beet wa gavad jamb al baḥar.

² Wa naas katiiriin itlammu ḥawlu, ḥatta daxal murkab wa gavad fiihu. Wa_n naas kullu kaanu waagfiin vala_ṭ ṭarf.

³ Wa kallamum katiir be amsaal wa gaal, “Shuufu! Al muzaariv marag vashaan yazrav teeraabu.

⁴ Wa wakit maa huwa yazrav, wagav shwaiyat teeraab vala_ṭ ṭariig. Wa_ṭ ṭuyuur jo wa akaloohu.

⁵ Wa teeraab taani wagav vala_l maḥallaat al fiiha ḥujaar, wa maa kaan leehu turaab katiir. Wa gaam ṭawwaali vashaan at turaab maa kaan ghariig.

⁶ Wa laakin ash shamish lamma ṭalavat ḥaragat an nabaat. Wa biga yaabis, vashaan maa kaan vindu virg.

⁷ Wa teeraab taani wagav fi wasṭ ash shook. Wa_sh shook ṭalav wa xanagu.

⁸ Wa teeraab taani wagav vala_t turaab as samiḥ, wa jaab tamar. Waaḥid minnu miyya. Wa_t taani sittiin. Wa_t taani talaatiin.

⁹ Al vindu iḍneen, xalliihu yasmav.”

¹⁰ Bavdeen at talaamiiz garrabu leehu wa gaalu leehu, “Le shinu takallimum be amsaal?”

¹¹ Wa radda wa gaal leehum, “Allaah adda leekum tavrifu sirr malakuut as sama. Wa laakin maa adda leehum.

¹² Vashaan al vindu, biddiihu ziyaada, wa bikuun vindu katiir. Laakin al maa vindu, al ḥaaja al vindu biyaaxuduuha minnu.

¹³ Da as sabab al ana bakallimum be amsaal, vashaan yavaayinu wa maa yashuufu, wa yasmavu wa maa yasmavu walla yafhamu.

¹⁴ Wa tamma fiihum al kalaam al gaal an nabi Ishavyaa, Bitasmavu samav laakin maa bitafhamu, wa bitvaayinu be vuyuunkum laakin maa bitshuufu.

¹⁵ Vashaan galb an naas deel biga tagiil, wa iḍneehum tugaal van as samav, wa vuyuunum gafalooha, vashaan maa bishuufu be vuyuunum, wa laa yasmavu be iḍneehum, wa laa yafhamu be guluubum, wa laa yarjavu vashaan ashfiihum.

¹⁶ Laakin intu, mubaaraka vuyuunkum, vashaanum yashuufu, wa iḍneekum vashaanum yasmavu.

¹⁷ Al ḥagg, aguul leekum, anbiya kutaar wa_ṭ ṭaiyibiin kaanu vaawziin yashuufu_l ḥaajaat al intu tashuufuuha, wa maa shaafooha. Wa kaanu vaawziin yasmavu_l intu tasmavuuha, wa maa simivooha.

¹⁸ Asmavu intu, masal al muzaariv.

¹⁹ Lamma aiyi waaḥid yasmav kilmat al malakuut wa maa yafhama, ash sharriir yaji wa yamsik al mazruuv fi galbu. Da al kaan mazruuv vala_ṭ ṭariig.

²⁰ Wa_l mazruuv vala_l maḥallaat al fiiha ḥujaar, da huwa al bismav al kilma wa ṭawwaali bigbala be faraḥ.

²¹ Laakin maa leehu virg fi nafsu, laakin yistanna mudda galiila. Wa lamma at tavb walla_l muṣiiba ḥaṣalu vashaan al kilma, ṭawwaali bigav.

²² Wa_l kaan mazruuv fi wasṭ ash shook, da huwa al bismav al kilma, wa laakin mashghuuliyyat ad dunya wa maḥabbat al maal takuun katiira ḥatta yamnavu_l kilma, wa takuun biduun tamar.

²³ Wa_l kaan mazruuv fi_t turaab as samiḥ, huwa_l bismav al kilma wa bifhama. Hu bijiib tamar, al waaḥid miyya, wa_t taani sittiin, wa_t taani talaatiin.”

MASAL AL GESHSH AL BAṬṬAAL

²⁴ Wa vallamum masal taani wa gaal, “Malakuut as sama zei zool zarav teeraab samiḥ fi ziraavtu.

²⁵ Wa laakin wakit maa an naas naayimiin, vaduuhu ja wa zarav geshsh fi wasṭ ad dura, wa masha.

²⁶ Wa lamma_d dura ṭalavat wa jaabat ru’uus, ẓahar al geshsh kamaan.

²⁷ Wa xaddaamiin siid al beet jo wa gaalu leehu, Yaa saiyid, maa zaravta teeraab samiḥ fi ziraavtak? Kida, al geshsh ja min ween?

²⁸ Gaal leehum, Vadu vamal da. Al xaddaamiin gaalu leehu, Vaawizna namshi najmavu?

²⁹ Gaal leehum, Laa! vashaan wakit maa taṭallivu_l geshsh, yimkin taṭallivu_d dura kamaan.

³⁰ Xalluuhum al itneen yakbaru sawa lighaayat maa tamma al wakit vashaan yalimm ad dura. Wa lamma wakit al ḥaṣaad tamma, aguul le_l yalimmu_d dura, Limmu_l geshsh fi_l awwal, wa arbuṭuuhu vashaan yaḥraguuhu. Wa laakin ad dura, limmuuhu le maxzani.”

MASAL TEERAAB AL XARDAL

³¹ Wa vallamum masal taani wa gaal, “Malakuut as sama zei teeraab al xardal, wa zool axadu wa zaravu fi ziraavtu.

³² Wa huwa aṣghar at teeraab kullu. Laakin lamma yakbar, hu akbar an nabaataat wa tabga shajara, ḥatta ṭuyuur as sama taji wa tagannib fi furuuva.”

³³ Wa kallamum be masal taani kamaan wa gaal, “Malakuut as sama zei xamiira axadata mara wa dassata fi talaata keelaat dagiig lighaayat maa itxammar kullu.”

³⁴ Yasuuv gaal kullu da le_j jamaavaat be amsaal. Wa biduun masal maa kaan bikallimum ḥaaja.

³⁵ Da le yatimm al gaal an nabi, “Baftaḥ xashmi be amsaal. Aguul ad dassoohu min wakit Allaah xalag ad dunya.”

³⁶ Bavdeen xalla_j jamav wa masha le_l beet. Wa talaamiizu garrabu leehu wa gaalu, “Warriina mavna masal al geshsh al fi_z ziraava.”

³⁷ Wa radda valeehum wa gaal, “Al bizrav at teeraab al kwaiyis huwa Ibn al insaan.

³⁸ Wa_z ziraava hiya_d dunya, wa_t teeraab al kwaiyis yavni awlaad al malakuut. Wa_l geshsh hum awlaad ash sharriir.

³⁹ Wa_l vadu az zaravu, huwa Ibliis. Wa wakit al bilimmu_d dura, huwa aaxir az zaman. Wa deel al bilimmuuha, hum al malaaika.

⁴⁰ Zei maa al geshsh yitlamma wa yinḥarig, bikuun kida fi aaxir az zaman.

⁴¹ Ibn al insaan birassil malaaikatu, wa hum bilimmu min malakuutu kullu shi al bikuun as sabab le xaṭiyya wa kull al yavmilu ḥaajaat baṭṭaala,

⁴² wa birmuuhum fi furn an naar. Hinaak bikuun al bika wa vaḍḍ as sinuun.

⁴³ Fi_l wakit daak al vaadiliin binawwiru zei ash shamish fi malakuut Abuuhum. Al vindu iḍneen, xalliihu yasmav.

⁴⁴ Malakuut as sama zei ḥaaja ghaalya ad dassooha fi ziraava, wa zool ligaaha wa dassaaha. Wa min faraḥu, yamshi wa yabiiv kull al vindu wa yashtari_z ziraava di.

⁴⁵ Wa kamaan, malakuut as sama zei taajir bifattish vala luuli jamiil.

⁴⁶ Wa lamma liga luuli ghaali jiddan, masha wa baav kull al vindu wa ishtaraahu.

MASAL ASH SHABAKA

⁴⁷ Kamaan, malakuut as sama zei shabaka ramooha fi_l baḥar, wa hiya jamavat samak min kullu nuuv.

⁴⁸ Wa lamma kaanat malyaana, aṣ ṣaiyaadiin jarrooha le_ṭ ṭaraf, wa gavadu wa lammu_s samak al kwaiyis fi gufaf, laakin al baṭṭaal ramoohu barra.

⁴⁹ Bikuun zei da fi aaxir az zaman. Al malaaika bimshu wa bifarrigu_l baṭṭaaliin min been al kwaiyisiin,

⁵⁰ wa birmuuhum fi furn an naar. Hinaak bikuun al bika wa vaḍḍ as sinuun.

⁵¹ Fihimtu kullu da?” Gaalu leehu, “Aiwa.”

⁵² Wa gaal leehum, “Vala kida, kullu muvallim al gaanuun al biga tilmiiz fi malakuut as sama, huwa zei zool, siid beet, biṭalliv min al maxzan bitaavu ḥaajaat ghaalya, jadiida wa gadiima kamaan.”

⁵³ Wa lamma Yasuuv xallaṣ al amsaal deel, marag min hinaak.

⁵⁴ Wa ja le waṭanu wa biga yavallimum fi beet ar Rabb ḥatta_n naas istaghrabu, wa gaalu, “Al insaan da liga al ḥikma di wa_l guwwaat min ween?

⁵⁵ Da maa ibn an najjaar? wa maa isim ummu Maryam? wa maa axwaanu Yavkuub, wa Yuusif wa Simvaan wa Yahuuza?

⁵⁶ Wa mush kullu axwaatu mavaana? Wa min ween al insaan da vindu kullu di?”

⁵⁷ Wa kaanu zavlaaniin minnu. Laakin Yasuuv gaal leehum, “Maa fih nabi muḥtaram fi waṭanu wa fi beetu, laakin barra min beetu bass.”

⁵⁸ Wa Yasuuv maa vamal guwwaat katiira hinaak, vashaan hum maa vindahum iimaan.