Markus 10 - Kitaab al Vahd aj Jadid 1978

AṬ ṬALAAG

¹ Wa Yasuuv marag, wa masha le maḥall al Yahuudiyya wa ghaadi_l Urdunn. Wa naas kutaar itlammu leehu, wa kaan yavallimum kamaan zei vaadatu.

² Wa_l Farriisiyyiin garrabu leehu vashaan yajarribuuhu wa sa’aloohu, “Be_l gaanuun le_r raajil yaṭallig maratu?”

³ Radda valeehum wa gaal, “Muusa amarkum be shinu?”

⁴ Gaalu, “Muusa adda izn le_r raajil ’an yaktib shahaadat aṭ ṭalaag, wa yarassila minnu.”

⁵ Wa Yasuuv gaal leehum, “Muusa katab al amr da valashaan guluubkum gawwiyyiin.

⁶ Laakin min bidaayat xaliigat ad dunya, Allaah xalagum raajil wa mara.

⁷ Wa fishaan da, ar raajil bisiib abuuhu wa ummu, wa yalḥag maratu.

⁸ Wa_l itneen yabgu jism waaḥid. Kadi, hum maa itneen bavd da, laakin jism waaḥid.

⁹ Valashaan kida, aj jamavu Allaah, maa taxalli zool yafarrigu.”

¹⁰ Wa fi_l beet, talaamiizu sa’alu kamaan van da.

¹¹ Wa gaal leehum, “Al yaṭallig maratu wa bitzawwaj mara taanya, yavmil zina valeeha.

¹² Wa iza hiya taṭallig raajila wa tazawwij raajil taani, hiya tavmil az zina.”

YASUUV WA_L AWLAAD

¹³ Wa kaanu yagaddimu leehu awlaad vashaan yalmasum. Wa laakin at talaamiiz kaanu yawabbixu_n naas al gaddamoohum.

¹⁴ Wa laakin lamma Yasuuv shaafum, zivil shadiid, wa gaal leehum, “Xallu_l awlaad biju leiya, wa maa tamnavuuhum. Vashaan malakuut Allaah leehum al yakuunu zei al awlaad deel.

¹⁵ Aguul leekum al ḥagg, al maa yagbal malakuut Allaah zei walad, maa bidxulu abadan.”

¹⁶ Wa axadum fi ḍirvaatu wa kaan yabaarikum, wa huwa yaxuṭṭ iideehu valeehum.

ASH SHAABB AL GHANI

¹⁷ Wa wakit maa kaan maashi fi_s sikka, waaḥid jara wa rakav giddaamu wa sa’alu wa gaal leehu, “Yaa_l Muvallim aṣ ṣaaliḥ, asawwi shinu vashaan ooras al ḥayaat al abadiyya?”

¹⁸ Wa Yasuuv gaal leehu, “Le shinu tasammiini ṣaaliḥ? Maa fih zool waaḥid ṣaaliḥ illa waaḥid, wa huwa Allaah.

¹⁹ Inta tavrif al awaamir: Maa taktul, Maa tavmil az zina, Maa tasrig, Maa tash‐hadu be_l kiḍib, Maa taghishsh, Iḥtarim abuuk wa ummak.”

²⁰ Wa gaal leehu, “Yaa Muvallim, ḥafaẓta di kullaha min az zaman al ana kunta shaabb.”

²¹ Wa Yasuuv vaayan leehu, wa ḥabbaahu, wa gaal, “Naagṣa leek ḥaaja waaḥda. Amshi, biiv kullu maalak, w_addiihu le_l masaakiin, wa bikuun vindak kanz fi_s sama. Wa tavaal, wa atbavni.”

²² Wa hu biga maa mabsuuṭ min al kilma di, wa hu marag ḥaznaan, vashaan kaan vindu amwaal katiira.

²³ Wa Yasuuv vaayan ḥawaleehu wa gaal le talaamiizu, “Keef bikuun ṣavb le_l ghaniyyiin ’an yadxulu malakuut Allaah!”

²⁴ Wa_t talaamiiz istaghrabu min kalaamu. Laakin Yasuuv gaal leehum kamaan, “Yaa awlaadi, duxuul malakuut Allaah ṣavb jiddan!

²⁵ As‐hal le jamal ’an yadxul fi veen ibra min ’an raajil ghani yadxul malakuut Allaah.”

²⁶ Wa itvajjabu xalaaṣ, wa gaalu leehu, “Kaan kida, minu yagdar yaxlaṣ?”

²⁷ Yasuuv vaayan leehum wa gaal, “Da maa mumkin le_n naas, laakin mumkin le Allaah. Vashaan kullu shi mumkin le Allaah.”

²⁸ Wa Buṭrus ibtada yaguul leehu, “Shuuf, niḥna xalleena kullu shi wa tabavnaak.”

²⁹ Yasuuv gaal, “Aguul leekum al ḥagg, maa fih waaḥid xalla beet, walla axwaan, walla axwaat, walla umm, walla abu, walla awlaad, walla ziraavaat fishaanni wa fishaan al injiil,

³⁰ illa yagbal miyyat marra hassav fi_z zaman da: buyuut, wa axwaan, wa axwaat, wa ummahaat, wa awlaad, wa ziraavaat mava ṭard, wa fi_z zaman aj jaai al ḥayaat al abadiyya.

³¹ Wa laakin katiir min an naas al fi_l awwal bikuunu fi_l aaxir, wa_l fi_l aaxir bikuunu fi_l awwal.”

³² Wa kaanu fi_s sikka, wa yaṭlavu le Uurushaliim. Wa Yasuuv kaan maashi giddaamum. Wa kaanu yistaghrabu, wa hum at tabavoohu kaanu xaayifiin. Wa Yasuuv axad al iṭnaashar marra taanya, wa ibtada yaguul leehum van al biḥṣal leehu.

³³ Wa gaal, “Shuufu, niḥna naṭlav le Uurushaliim. Wa bisallimu Ibn al insaan le_l gusus al kubaar wa muvallimiin al gaanuun. Wa biḥkumu valeehu be_l moot, wa bisallimuuhu le_l umam.

³⁴ Wa biḍḥaku valeehu, wa yabzagu valeehu, wa yajliduuhu, wa yaktuluuhu. Wa bavd talaatat aiyaam biguum.”

ṬALAB YAVKUUB WA YUUḤANNA

³⁵ Wa Yavkuub wa Yuuḥanna awlaad Zabadi garrabu leehu wa gaalu leehu, “Yaa Muvallim, niḥna daayiriinak bitavmil leena kullu maa naṭlub minnak.”

³⁶ Wa gaal leehum, “Daayiriinni avmil leekum shinu?”

³⁷ Gaalu leehu, “Addi leena nagannib waaḥid van yamiinak, wa waaḥid van shimaalak fi majdak.”

³⁸ Laakin Yasuuv gaal leehum, “Intu maa tavrifu al intu taṭlubu. Intu tagdaru tashrabu min kubbaayat al wajav al ana bashrab minnaha? wa titvammadu be_l mavmuudiyya al ana atvammad beeha?”

³⁹ Wa gaalu leehu, “Binagdar.” Wa Yasuuv gaal leehum, “Al kubbaaya al ana bashrab minnaha, intu bitashrabu minnaha. Wa_l mavmuudiyya al ana batvammad beeha, bitvammadu intu.

⁴⁰ Wa laakin al guvaad van yamiini walla van shimaali maa leiya ’an addiikum. Laakin huwa le_l ḥaḍḍar leehum Allaah.”

⁴¹ Wa lamma_l vashara simivu, ibtadu yazvalu min Yavkuub wa Yuuḥanna.

⁴² Wa Yasuuv naadaahum leehu wa gaal leehum, “Intu vaarfiin ’an deel al mavruufiin yakuunu ḥukkaam al umam, hum yavmilu zei as saiyid valeehum. Wa_l kubaar yashtaghilu be sulṭa valeehum.

⁴³ Wa laakin maa yakuun beenkum zei da. Laakin al vaawiz yabga kabiir beenkum, laazim yakuun xaddaam leekum.

⁴⁴ Wa_l vaawiz yabga_l awwal beenkum, laazim yakuun vabd le_l kull.

⁴⁵ Valashaan Ibn al insaan maa ja vashaan an naas yaxdimuuhu, laakin vashaan yaxdim an naas, wa vashaan yaddi nafsu fidaa van naas kutaar.”

SHIFA BARTIMAAWUS AL VAMYAAN

⁴⁶ Wa jo le Ariiḥa. Wa wakit maa kaan yamrug min Ariiḥa mava talaamiizu wa naas kutaar kamaan, Bartimaawus, yavni walad Timaawas, wa hu miskiin wa vamyaan, kaan gaavid fi_s sikka yas’al ṣadaga.

⁴⁷ Wa lamma hu simiv ’innu kaan Yasuuv an Naaṣiri, ibtada yakoorik wa yaguul, “Yaa Yasuuv, Ibn Daawuud, arḥamni!”

⁴⁸ Wa naas kutaar kaanu yawabbixuuhu, wa yakallimuuhu vashaan yaskut. Wa laakin hu kaan yakoorik ziyaada, “Yaa Yasuuv, Ibn Daawuud, arḥamni.”

⁴⁹ Wa Yasuuv wagaf wa gaal, “Naaduuhu.” Wa naadu_l vamyaan wa gaalu leehu, “Shidd ḥeelak. Guum, hu binaadiik.”

⁵⁰ Wa rama toobu wa naṭṭa, wa ja le Yasuuv.

⁵¹ Wa Yasuuv gaal leehu, “Daayirni avmil leek shinu?” Wa_l vamyaan gaal leehu, “Yaa Saiyid, daayir ashuuf marra taanya.”

⁵² Wa gaal leehu, “Amshi, iimaanak shafaak.” Wa ṭawwaali gidir yashuuf, wa tabav Yasuuv fi_d darib.