Fiilibbi 4 - Kitaab al Vahd aj Jadid 1978

¹ Valashaan da, yaa axwaani, intu al ana baḥibbkum wa vaawiz be shidda ashuufkum, yaa faraḥi wa taaji, sabbitu kida fi_r Rabb, yaa maḥbuubiin.

NAṢAAYIḤ

² Baṭlub min Afuudiyya, wa baṭlub min Sintiixi ’an taftakiru fikr waaḥid fi_r Rabb.

³ Wa as’alak inta kamaan, yaa shariiki_l muxliṣ, saavid an niswaan deel, valashaan hum ishtaghalu sawa mavaai fi_l injiil mava Akliimandus wa baagi_l vaamiliin mavaai. Wa usuumum fi kitaab al ḥayaat.

⁴ Afraḥu fi_r Rabb kullu wakit. Wa baguul marra taanya, Afraḥu.

⁵ Xallu kullu_n naas yavrifu ṣabirkum. Ar Rabb gariib!

⁶ Maa titḥayyaru fi aiyi shi. Laakin fi kullu shi, xalli ṭalabaatkum bitkuun mavruufa le Allaah, be ṣala wa ṭalab mava shukr.

⁷ Wa salaam Allaah, al foog kullu fahm, biḥfaẓ guluubkum wa afkaarkum fi_l Masiiḥ Yasuuv.

⁸ Wa fi_l aaxir, yaa axwaan, kull al huwa ḥagiigi, wa kull al huwa muḥtarim, wa kull al huwa vaadil, wa kull al huwa naḍiif, wa kull al huwa maḥbuub, wa kull al huwa xabaru kwaiyis, iza fiihu_l xeer, wa mustaḥigg al ḥamd, fakkiru fi_l ḥaajaat di.

⁹ Al intu itvallamtu, wa gibiltu, wa simivtu minni, wa shuftu fiyya, avmilu be da. Wa Ilaah as salaam bikuun mavaakum.

SHUKRAN LE_L HADAAYA

¹⁰ Ana afraḥ be_r Rabb faraḥ vaẓiim, vashaan intu marra taanya xalleetu baalkum leiya hassav bavd wakit ṭawiil. Ṣaḥiiḥ kuntu taxallu baalkum leiya laakin maa kaan vindakum furṣa tawarru da.

¹¹ Wa ana maa baguul da be sabab iḥtiyaaji. Vashaan itvallamta bakuun raḍyaan fi aiyi ḥaal al ana fiihu.

¹² Ana vaarif al iḥtiyaaj, wa ana vaarif aviish fi katra. Fi kullu shi wa fi kullu ḥaal, itvallamta sirr ar raaḥa, iza ana shabvaan walla javaan, iza vindi maal katiir walla vindi iḥtiyaaj.

¹³ Ana bagdar avmil kullu shi fi_l Masiiḥ al bishaddidni.

¹⁴ Laakin vamaltu ḥaaja jamiila lamma shaaraktuuni fi tavbi.

¹⁵ Wa intu, yaa naas Fiilibbi, vaarfiin fi bidaayat al injiil, lamma maragta min Makiduuniyya, maa fih kaniisa waaḥda sharakat mavaai taddiini wa taaxud minni, illa intu bass.

¹⁶ Wa lamma kunta fi Tasaluniiki kamaan, rassaltu leiya marra wa marrateen le iḥtiyaaji.

¹⁷ Ana maa baṭlub al hadiiya, laakin baṭlub at tamar al yaziid le ḥisaabkum.

¹⁸ Gibilta kullu shi, wa ana fi raaḥa. Ana bigiit malyaan min wakt axadta min Abafruuditus hadaayaakum al intu rassaltuuha. Hiya hadiiya riiḥata ṭaiba, wa ḍabiiḥa magbuula, al yabsiṭ Allaah.

¹⁹ Wa Ilaahi biyamla kullu iḥtiyaajkum be ḥasab ghinaahu fi_l majd fi_l Masiiḥ Yasuuv.

²⁰ Wa le Ilaahna wa Abuuna, al majd le_l abad. Aamiin.

²¹ Sallimu vala kull al giddiisiin fi_l Masiiḥ Yasuuv. Al axwaan al mavaai, yasallimu valeehum.

²² Kull al giddiisiin yasallimu valeehum, xuṣuuṣan hum al min beet Geeṣar.

²³ Nivmat ar Rabb Yasuuv al Masiiḥ mava ruuḥkum.