1 Kuurintuus 7 - Kitaab al Vahd aj Jadid 1978

AZ ZAWAAJ

¹ Hassav van al ḥaajaat al intu katabtu leiya. Ṭaiyib le_r raajil maa yitzawwaj.

² Laakin be sabab az zina, xalli kullu waaḥid takuun vindu maratu, wa le kullu waaḥda raajila.

³ Ar raajil laazim yaddi le_l mara ḥagga bitaav al viris, wa kida kamaan al mara le raajila.

⁴ Al mara maa vindaha sulṭa vala jisima laakin ar raajil vindu. Wa kida kamaan ar raajil maa vindu sulṭa vala jismu laakin al mara vindaha.

⁵ Maa taaba waaḥid fiikum at taani, illa yakuun be ittifaag le wakit, vashaan taddu nufuuskum le_ṣ ṣala. Wa bavdeen titlammu sawa marra taanya, vashaan ash Sheeṭaan maa yajarribkum, lamma maa vindakum guwwa vala nufuuskum.

⁶ Wa laakin aguul da vashaan addiikum izin, maa vashaan addiikum amr.

⁷ Ana daayir kullu_n naas yakuunu zei maa ana. Laakin kullu waaḥid vindu hadiitu_l maxṣuuṣa min Allaah. Al waaḥid kida wa_t taani kida.

⁸ Wa laakin aguul le_l maa mitzawwijiin wa_l araamil, kwaiyis leehum iza yistamirru yaviishu zei maa ana kamaan.

⁹ Wa laakin iza kaan maa yagdaru yamsiku nufuusum, xalluuhum yitzawwaju, vashaan al viris aḥsan min ’an yaḥragu be_sh shahwa.

¹⁰ Laakin le_l mitzawwijiin vindi amr, mush ana, laakin ar Rabb: Al mara maa taxalli raajila.

¹¹ Wa ’in mashat minnu, xalliiha tistanna maa mitzawwija, walla xalliiha taṣaaliḥ raajila. Wa_r raajil maa yaṭallig maratu.

¹² Laakin at taanyiin aguul leehum, ana, mush ar Rabb, iza kaan axu vindu mara maa mi’aamina, wa hiya vaawiza taviish mavaahu, hu maa yaṭalliga.

¹³ Wa_l mara al vindaha raajil maa mi’aamin, wa hu vaawiz yaskun mavaaha, hiya maa taṭalligu.

¹⁴ Vashaan ar raajil al maa mi’aamin magaddas fi_l mara, wa_l mara al maa mi’aamina magaddasa fi_r raajil. Wa kaan maa kida, awlaadkum najisiin. Laakin hassav hum magaddasiin.

¹⁵ Wa laakin iza al maa mi’aamin masha, xalliihu yamshi. Al axu walla_l uxut maa marbuuṭ fi ḥaaja zei di. Vashaan Allaah naadaana le_s salaam.

¹⁶ Keef bitavrifi, yaa mara, iza kaan taxalliṣi raajilik. Walla keef bitavrif, yaa raajil, ’in kaan taxalliṣ maratak?

¹⁷ Vala kullu ḥaal, xalli kullu waaḥid yamshi zei maa Allaah gasam le kullu waaḥid, zei maa ar Rabb naada kullu waaḥid. Da amri fi kullu_l kanaayis.

¹⁸ (?) Aiyi waaḥid fi wakit Allaah naadaahu kaan muṭahhar? Hu maa yabga maa muṭahhar. (?) Aiyi waaḥid fi wakit Allaah naadaahu maa kaan muṭahhar? Hu maa yabga muṭahhar.

¹⁹ Aṭ ṭahuur maa shi wa_l biduun aṭ ṭahuur maa shi, laakin ḥifẓ amr Allaah, da muhimm.

²⁰ Xalli kullu waaḥid yistanna zei maa huwa kaan lamma Allaah naadaahu.

²¹ Inta kunta vabd lamma Allaah naadaak? Mavliish. Laakin ’in gidirta tabga ḥurr, amsik al furṣa.

²² Vashaan an naadaahu ar Rabb wa hu vabd, hu biga ḥurr fi_r Rabb. Wa kida kamaan al kaan ḥurr lamma ar Rabb naadaahu, hu vabd le_l Masiiḥ.

²³ Kuntu mushtariin be taman. Maa tabgu vabiid le_n naas.

²⁴ Yaa axwaan, xalli kullu waaḥid yistanna mava Allaah fi zaat al ḥaal al kaan fiihu lamma Allaah naadaahu.

²⁵ Hassav van al vazaara, maa vindi amr min ar Rabb fiihum, wa laakin addi fikri zei waaḥid, be raḥmat ar Rabb, amiin.

²⁶ Aftakir le sabab at tavb al fih hassav, kwaiyis le _z zool yistanna zei maa huwa.

²⁷ Inta marbuuṭ be mara? Maa taṭlub taṭalliga. Inta maa mitzawwij? Maa taṭlub mara.

²⁸ Laakin ’in kaan titzawwaj, inta maa tavmil xaṭiyya, wa ’in kaan al vazra itzawwajat, hi maa tavmil xaṭiyya. Laakin al mitzawwijiin yakuun leehum tavb fi_j jisim. Wa ana vaawiz aḥfaẓkum min tavb zei da.

²⁹ Yavni, al wakit biga giṣaiyir, yaa axwaan. Min hassav, xallu_l vindahum niswaan yakuunu zei al maa vindahum,

³⁰ wa hum al yabku, zei al maa yabku, wa hum al yafraḥu, zei al maa yafraḥu, wa hum al yashtaru, zei al maa yamsiku_l buḍaav.

³¹ Wa xalluuhum al bishtaghilu be ḥaajaat ad dunya di, zei al maa bishtaghilu beeha katiir. Vashaan shakil ad dunya al ḥaaḍira di yafuut.

³² Vaawizkum takuunu biduun mashghuuliyya. Al maa mitzawwij yaxalli baalu le ḥaajaat ar Rabb, keef yabsiṭ ar Rabb.

³³ Laakin al mitzawwij yaxalli baalu fi ḥaajaat ad dunya, keef yabsiṭ maratu.

³⁴ Wa huwa ingasam fi_l yaxuṣṣu. Wa_l maa mitzawwija walla_l vazra taxalli baala le ḥaajaat ar Rabb, vashaan takuun magaddasa be_j jisim wa be_r ruuḥ. Laakin al mitzawwija taxalli baala le ḥaajaat ad dunya, keef tabsiṭ raajila.

³⁵ Aguul da le faaidatkum, maa vashaan amnavkum min al viris, laakin vaawizkum tavmilu_l ḥaaja_lmawaafiga wa taxuṭṭu baalkum le_r Rabb biduun laxbaṭa.

³⁶ Wa laakin yimkin waaḥid yaftakir hu maa yavmil al mawaafig vashaan vazraa’u. Wa iza hiya kibrat, wa hu laazim yitzawwaj, xalluuhum yitzawwaju, zei maa hu daayir. Hu maa yavmil xaṭiyya.

³⁷ Wa laakin yimkin waaḥid yakuun saabit fi galbu wa maa fih luzuum, wa vindu guwwa vala iraadatu. Wa kaan vaawiz da min galbu ’an yaḥfaz vazraa’u, hu biyavmil ṭaiyib.

³⁸ Wa kida, al yazawwij vazraa’u yavmil kwaiyis, wa_l maa yazawwij yavmil aḥsan.

³⁹ Al mara marbuuṭa be_l gaanuun maa daam raajila ḥai. Wa laakin iza raajila maat, hiya ḥurra vashaan titzawwaj be waaḥid zei maa hiya daayira, laakin fi_r Rabb bass.

⁴⁰ Wa laakin hi bitkuun mabsuuṭa aktar iza tistanna zei maa hiya, be ḥasab fikri. Wa aftakir vindi kamaan Ruuḥ Allaah.