Uusu-uusu A Pol Hurula'aa Hunie Mo Rom 9 - Tataroha Diana

A God Mola E Toꞌo Aana Nanamanga Huni Lio Hilisie Kira Tei Kei Neꞌi Iinoni Ingeie

^1-3 Taꞌe ngaeta mei ola ko da uri no ko tohungei saehuu loꞌu liutaa, aana mwala ineu mo Jiu kire iiꞌo oto loosie maenga huu. Ineu iinoni a Kraes na a Liꞌoa Maaꞌi ko ere haꞌa-oaie uri manataku e taha mola. Oto no ko ere toꞌohuu ni ie, na nou kaꞌa eero ike aana no ko unue uri salunge ineu ngeena kaꞌa mou-mou ike mwaanieu. Na hule aana saeku uri haꞌaloileku ke lae oolisire hunie kire ke lae mai meuri huu oolisieu, haꞌalaa ke diana. Maꞌalana ne ke oopa mwaanie a Kraes oolisire, nge e diana mola aaku aana no ko tohungei aamasire, aana ikire oto mo tohungei iinoni ineu, na mwala oto aana uluhe ineu.

⁴ Ikire oto mwala a God e lio hilisire kaꞌu, na e toolera oto mala mo kalena, na ikire noꞌone kire leesie oto manikuluhaꞌana. A God e neꞌisae mouteꞌi oto peꞌire aana mo heiholotaꞌinge, na e niie mo Haꞌatolanga a Mosis oto hunire, na e haiholotaꞌinie mo niinge diana hunire, na e haꞌa-uusulire aana tolaha ni palonga.

⁵ Mo weuwada oto i naꞌo mala a Ebraham na a Aesak na a Jekob, ikire mo naꞌohai mwane nge a God e lio hilisire, na a Kraes e hute oto noꞌone mai mala iinoni aana komu ikire ngeena. Na ingeie oto a God, na ko aalaha haahie taꞌena nga ola, na e diana hunie kie ke paalahea taraureꞌi oto di. !Iau! !Ke urine oto!

⁶ ?Oto e ue? ?Uri a God e pulongosie oto mo heiholotaꞌinge ingeie huni haꞌadianaꞌaa mo Jiu? Haꞌike oto ooꞌoo, aena aana e kaꞌa ike ahutana mwala ni Jiu oto uri ikire mo iinoni a God.

⁷ Na e kaꞌa ike uri ahutana mwala nge kire hute mai aana komu a Ebraham ni oto uri ikire mo tohungei kalena. Aana maꞌalana ngaeta mo mwela loꞌu kire hute aana a Ebraham, taꞌe a God e haiholotaꞌi hunie a Ebraham uuri, Tohungana komu iꞌoe kei uure mola mai mwaanie a Aesak. Jenesis 21:12

⁸ Oto e kaꞌa ike ahutana mo iini e hute aana komu e uure aana mei epu a Ebraham ni uri ikire mo kalena God. Taꞌe mo tohungei kalena God, ikire oto mo iini kire hute aana komu aana hiiwalaimolinge a Ebraham. Aana ikire oto kire hiiwalaimoli aana haiholotaꞌinge a God mala a Ebraham noꞌone e hiiwalaimoli aana haiholotaꞌinge a God

⁹ maholo e unue hunie a Ebraham uuri, Aana halisi meine ne kei heꞌi ooli loꞌu mei, na aana maholona a Sera e haꞌahutaa oto kele mwela mwane. Jenesis 18:10

¹⁰ Na e urine noꞌone aana e ro iu nge kire hute aana a Ribeka na poro ingeie a Aesak, weuwemami mo Jiu.

¹¹ Maholo na kirerue kaꞌa hute ue, taꞌe a God e lae oto mola i sulie oalaꞌinge ingeie, na e lio hilisie taꞌa-taꞌa iini aana ro mwelana. Aana maholona, na nga iini aadarue e kaꞌa da ue nga mei ola diana, wa ke dau huꞌisie nga mei ola.

¹² Taꞌe maꞌalana e urine, a God e teꞌuri hunie a Ribeka, Naꞌohai mwela iꞌoe kei esu nana ruana nga mwela iꞌoe. Jenesis 25:23 Leune ko haataꞌinie uri a God e kaꞌa lio hilisie ike a Jekob i sulie nga mei ola diana e asuie, taꞌe lio-hilisinge a God e lae mola i sulie oalaꞌinge ingeie maraana.

¹³ Na i laona mo Uusu-uusu Maaꞌi, a God e ere loꞌu i sulie lio-hilisinge ngeena uuri, Nou manata diana hunie a Jekob, taꞌe nou leledie a Iso. Malakae 1:2-3

¹⁴ ?Oto nga taa nge kie kei unue? ?Uri a God e lae takalo mwaanie oodo-oodonga aana leune? !Haꞌike oto ooꞌoo!

¹⁵ Aana a God e ere luhesie tolahana hunie a Mosis uuri, Ne kei aamasie taane nga iini no ko sare aamasie, na ne kei peꞌie taane nga iini no ko sare peꞌie. Eksodas 33:19

¹⁶ Oto maholo a God ko lio hilisie nga iini mala iinoni ingeie, nge lio-hilisinge ngeena e saꞌa lae ike i sulie nga taa iinoni ngeena e saetoꞌo aana wa mei esunge uri taa e asuie, taꞌe a God ko lae mola i sulie aamasinge ingeie maraana.

¹⁷ Na urine loꞌu, mala uusulana e lae i laona mo Uusu-uusu Maaꞌi, a God e unue hunie inemauri wau i Ijip uuri, Nou haꞌa-uuresiꞌo hunie uri o ke neꞌi inemauri peine, taꞌe nou esuie mola urine uri hunie ne ke haataꞌinie nanamanga ineu maholo ne kei aꞌailaꞌasiꞌo. Urine nge ahutana mwala i laona walumalau kire ke si saie uri nou peine loꞌu liutaa. Eksodas 9:16

¹⁸ Oto kolu leesie uri maholo a God ko sare aamasie nga iini, e sai aamasie mola, na mala uri ko sare da saena nga iini ke hau mwaanie e rongo hunie, nge e sai esuie noꞌone urine.

¹⁹ Oto nou saie mola uri nga iini hikemiu kei dolosi eeku uuri, “?Mala ko urine oto, e ue kaꞌu a God ko haro unu-unue mola uri kie takalo? ?A tei e sai heitelili honosie nga taa a God e saetoꞌo aana?”

²⁰ !Haꞌike eena mwae! ?Uri o loꞌongaꞌinie uri iꞌoe, o sai ere oolisie a God? !E aasa oto ooꞌoo! Mei ola kire aadumie mola e saꞌa unue ike hunie iinoni nge e aadumie uuri, “?E ue o eedu uurini eeku?”

²¹ Iinoni nge ko eedu-eedu e sai esuie mola taꞌena nga mei ola i sulie saena, hule aana e sai eedumie mola e ro nime hai aaopaꞌi aana taꞌa-taꞌa rotoi ei. E sai esuie mola ngaeta nime hunie ke lio kohi malisine mo ngeuhe paine, na ngaeta iini loꞌu hunie ngaunge mola i suli dinge.

²² Oto e sada noꞌone mola mala nga taa a God e asuie, aana ikie mo iinoni kie urihana mola mo nime a God e aadumiꞌi. Mala uri a God ko sare haataꞌinie saewasunge ingeie na uri hunie mwala ke leesie sakanga aana haꞌaloinge e asuie, nge leu i sapena a God ni ngeena. Taꞌe mala uri a God ko haro lae rako mola peꞌie saewasunge ingeie, maꞌalana uri e malisine oto ke saewasulie mwala ngeena na ke horo suuheꞌinire, nge leu i sapena loꞌu ni ngeena.

²³ Na leu i sapena loꞌu, mala uri ko sare haataꞌinie oto manikuluhaꞌana aana mwala nge e aamasire. Mwala nge e aamasire ngeena, ikire oto e lio hilisire hunie kire ke iiꞌo peꞌie aana leu e manikuluꞌe taꞌau i Lengi.

²⁴ !Na ikie oto mwalana! A God e soikie mai i saana uure mwaanie taꞌena nga komu ni welumalau, na e kaꞌa ike mola mwaanie mo Jiu, taꞌe mwaanie noꞌone mwala nge ikire nga mo Jiu haꞌike.

²⁵ Aana a God e ere i sulie mo Aapoloa Aaopa i laona Uusu-uusu Maaꞌi a Propet Hosea aana e teꞌuri, Mwala nge ikire nga mwala ineu haꞌike i naꞌo, nge ne kei haaraꞌinire uuri, “!Mwala ineu!” Na mwala nge nou kaꞌa manata diana ike hunire i naꞌo, nge ne kei haaraꞌinire aana, “!Mwala nou tohungei manata diana hunire!” Hosea 2:1,23

²⁶ Na e unue loꞌu uuri, Aana leu nge nou ere kaꞌu hunire uuri, “Iꞌomu ngeena nga mwala ineu haꞌike,” taꞌe aana leune noꞌone mwala kei heꞌi haaraꞌinire loꞌu uri ikire mo kalena God nge e iiꞌo huu. Hosea 1:10

²⁷ Na a Propet Aesaea e ere i sulie mwala ni Israel aana e tola tahangaꞌinie mei wala uuri, Maꞌalana mwala ni Israel kire ke hunge loꞌu mala uꞌuune oone wai sulie oone, taꞌe haꞌa-uurilana tootaꞌi iini aada mola kei lae.

²⁸ Aana e saꞌa tewa ike loꞌu na a God kei haꞌaloie oto ahutana walumalau ienini. Aesaea 10:22-23

²⁹ Oto mala a Propet Aesaea e unue kaꞌu loꞌu i sulie mo Jiu uuri, Mala uri a God Hahuꞌana Nanama, e kaꞌa toliꞌaasie tootaꞌi iini aana mo mwela ikie ke oore mwaanie haꞌaloinge ingeie, na kie suu mango oto mala e ro hanue aaela i Sodom na i Komora eena. Aesaea 1:9

Ikie Noꞌone Kie Ke Lio Hilisie A God

³⁰ Oto nga taa nge melu ko unu-unue e uuri mola. Mwala nge ikire nga mo Jiu haꞌike na kire kaꞌa ariꞌapasie ike uri kire ke oodotaꞌi i maana God, kire neꞌi iinoni oodotaꞌi oto i maana God mola aana kire hiiwalaimoli aana Kraes.

³¹ Taꞌe mwala ni Israel nge kire ariꞌapasie uri kire ke lulu i sulie mo Haꞌatolanga uri hunie kire ke oodotaꞌi i maana God, kire kaꞌa dau oodoie ike.

³² ?Aana e ue nge kire kaꞌa dau oodoie? Kire kaꞌa dau oodoie ike aena aana kire ko eriꞌapasie mola uri kire ke asuie mo esunge oodo na kire kaꞌa lulu i sulie ike tala ni hiiwalaimolinge aana God. Oto aana kire kaꞌa loꞌongaꞌinie uri oodo-oodonga e neꞌie mola mei ola aana hiiwalaimolinge, nge kire domu mala iinoni e tataro aana hau.

³³ A God e ere i sulie maenga a Kraes i laona mo Uusu-uusu Maaꞌi uuri, !Omu ke rongo kaꞌu! No ko haꞌa-uuresie nga iini i Jerusalem nge e urihana hau ni haꞌatataro, na kei da mwala kei dou-domu. Taꞌe nga iini nge ko hiiwalaimoli aana, e saꞌa roroꞌa norudile ike. Aesaea 8:14, 28:16