Uusu-uusu A Pol Hurula'aa Hunie Mo Rom 2 - Tataroha Diana

A God Kei Leie Ahutana Mwala

¹ Oto iꞌomu nge omu ko unu-unue uri mo iini nge kire dau urine kire tohungei deu aaela, iꞌomu noꞌone omu ke lio talamiu. ?Oto omu ko ere huni taa? Aena aana maholo omu ko leie ngaeta mwala urine, e urihana omu ko leiꞌomu loꞌu mola maraamiu ni ngeena, aena aana iꞌomu na omu ko deu-deu aaela noꞌone mola mala ikire.

² Kie saie kaꞌu taane oto uri e tohungei melisi na e tohungei oodo hunie uri a God kei leie mwala haahie mo aaelanga urine.

³ ?Oto e ue? Iꞌomu, omu ko leie kaꞌu ngaeta mwala haahie mo takalonga ikire taꞌe hule aana iꞌomu maraamiu noꞌone, omu ko talei esuie noꞌone mola mo aaelanga nge omu ko leie mwala ngeena haahiꞌi. ?Uri omu ko loꞌo-loꞌongaꞌi uri a God e saꞌa leiꞌomu ike? !Haꞌike eena mwae! !Kei leiꞌomu taane noꞌone!

⁴ A God e tohungei saediana huniꞌomu, na e kaꞌa sai saewasu lau-leu ike, taꞌe ko tohungei toli rako mola peꞌiꞌomu. !Taꞌe iꞌomu, omu ko neꞌi-neꞌisae mwakataꞌinie mola tolahana! ?Aana e ue? ?Uri omu kaꞌa lio-lio saie ike uri a God e tohungei diana huniꞌomu urine, aena aana ko niie nga kele maholo huniꞌomu hunie uri omu ke oonisae mwaanie mo tolahai ola aaela iꞌomu?

⁵ Taꞌe saemiu e hau mola hule aana omu kaꞌa sare oonisae loꞌu mwaanie mo takalonga iꞌomu. Oto aena leune omu ko si da mola haꞌaloilemiu ke paine oto loꞌu aana hai dinge nge a God kei haataꞌinie saewasunge ingeie haahie tataꞌalanga mo iinoni. Na maholo nge a God kei leie taꞌena nga iinoni, nge ahutana mwala ke si leesie oodotaꞌinge ingeie.

⁶ Aana a God kei waaie taꞌena nga iinoni oto i sulie helelana aana nga moi taa e asuiꞌi. Sam 62:12

⁷ Mwala nge ko lae peꞌi deu esunge diana, aana kire tohungei saetoꞌo aana uri kire ke iiꞌo huu peꞌie a God, na uri a God ke lae-lahera, na ke haꞌapainaꞌara, mwala ngeena nge a God kei niie maurihe huu nada.

⁸ Taꞌe mwala nge saeda e aaela aana kire ko neꞌisae paine mola haahire maraada, na kire kaꞌa saetoꞌo aana ike walaimolinge, taꞌe kire ko lulu i sulie mola mo tolahai ola aaela, ikire ngeena nge a God kei tohungei saewasulire na kei haꞌaletehire oto hiitoꞌo.

⁹ Taꞌe-taꞌena nga iinoni ko deu-deu aaela, kire kei sapesalu na haꞌamotaahilada kei lae. Taungei ola urine kei reu aana taꞌena nga iinoni aaela, maꞌalana ikire mo Jiu wa ikire nga mo Jiu haꞌike.

¹⁰ Taꞌe ahutana mwala nge kire ko lae peꞌi esu diana, a God kei haꞌamanikuluꞌara, na kei haꞌapainaꞌara, na kei niie hanuelamanga hunire. Leune kei reu aana taꞌena nga iinoni diana, maꞌalana ikire mo Jiu wa ikire nga mo Jiu haꞌike.

¹¹ Aana a God e saꞌa rara haahie ike nga iini.

¹² Mo Haꞌatolanga a God nge a Mosis e uusuꞌi oto wai naꞌo e lae mola hunie mo Jiu, na a God kei leire haahie mo oorahaꞌaanga ikire aana kire dau huꞌisie mola mo Haꞌatolanga ngeena. Na ahutana mwala nge ikire nga mo Jiu haꞌike nge kire kaꞌa toꞌo aana ike mo Haꞌatolanga ngeena, nge ikire noꞌone a God kei leire. Kaꞌa ike aana kire dau huꞌisie mo Haꞌatolanga ngeena, taꞌe aana kire dau huꞌisie nga taa nge kire saie uri e toꞌohuu na e oodotaꞌi.

¹³ Mwala nge kire ko talei rorongo aasie mola mo Haꞌatolanga ngeena, kire saꞌa roroꞌa iiꞌo oodotaꞌi ike i maana God. Taꞌe mwala nge kire ko lulu i sulie walu ola i laona mo Haꞌatolanga ngeena, haꞌalaa a God ko da kire ke oodotaꞌi i maana.

¹⁴ Mwala nge ikire nga mo Jiu haꞌike, niilana mo Haꞌatolanga a Mosis e kaꞌa lae ike hunire hunie kire ke saiꞌi. Taꞌe maholo kire ko haꞌa-uuresie mo haꞌatolanga ikire maraada, na mo haꞌatolanga ikire ngeena kire sada mola peꞌie mo Haꞌatolanga a God, nge e haataꞌinie oto uri kire saie taane nga taa e oodo na nga taa e aaela.

¹⁵ Leune e haataꞌinie uri nga taa mo Haꞌatolanga e unue, e iiꞌo taane oto i lalo aada, aena aana manatada mola maraada e sai haataꞌi diana aana taane aada uri mo ola kire ko esuiꞌi e oodo taane wa haꞌike.

¹⁶ Na mala Tataroha Diana no ko tatarohaꞌinie ko unu tahangaꞌinie, a God ke si haataꞌinie kira tei nge kire oodotaꞌi aana maholo a Jisas Kraes kei leie taꞌe-taꞌena nga ola e iiꞌo mumuni i lalo aana mau-meuringe mo iinoni.

A God E Haꞌadianaꞌaa Mo Jiu Aana Mo Haꞌatolanga, Taꞌe Kire Kaꞌa Tola Ike I Suliꞌi

¹⁷ ?Oto e ue aana iꞌomu mo Jiu? Omu tohungei norutoꞌo uri a God ke haꞌa-uuriꞌomu aena aana omu toꞌo aana mo Haꞌatolanga a Mosis ngeena, na omu ko toohaꞌiniꞌomu uri iꞌomu oto mo iinoni a God.

¹⁸ Omu ko unu-unue uri omu saie neꞌisaenga a God, na uri omu saie mo eehuꞌi ola, aena aana uri mo Haꞌatolanga ko unuꞌi huniꞌomu.

¹⁹ Loꞌongaꞌinge iꞌomu uri omu sai naꞌona mwala kire ulu, na uri iꞌomu oto raa-raa hunie mwala kire iiꞌo i laona rodohono.

²⁰ Na omu ko loꞌo-loꞌongaꞌi uri iꞌomu oto mo haꞌa-haꞌa-uusuli mo iini kire puꞌosasu na mo iini kire urihana mo mwela aana tolahana a God. Omu ko loꞌo-loꞌongaꞌi mola urine aana omu unue uri omu toꞌo aana aahuꞌine ahutana sai-olanga na walaimolinge i laona mo Haꞌatolanga.

²¹ ?Oto mala uri omu ko haꞌa-uusulie ngaeta mwala urine, na e ue kaꞌu omu kaꞌa sai haꞌa-uusuliꞌomu maraamiu? Omu ko unue uuri, “Mwaanie nga iini e peli-peli.” Taꞌe iꞌomu maraamiu keꞌu omu ko peli-peli mola.

²² Na omu ko unue noꞌone uuri, “Mwaanie nga iini e mai-mesi.” Taꞌe iꞌomu maraamiu keꞌu omu ko mei-mesi mola. Omu ko tohungei leledie mo nunui ola aana mo god eero-eero nge ngaeta mwala ko palo-paloꞌi, taꞌe hule aana omu ko lai pelie loꞌu mo nunui ola ngeena mwaanie mo nume ni palo-palo ikire.

²³ Omu ko ere toohaꞌiniꞌomu aana uri omu toꞌo aana mo Haꞌatolanga a God, taꞌe omu ko si haꞌamasaa loꞌu mola a God aani hele huꞌisilana mo Haꞌatolanga ingeie.

²⁴ Aena urine kaꞌu mo Uusu-uusu Maaꞌi e unue uuri, I tehulaꞌana roroꞌanga iꞌomu mo Jiu, nge mwala ikire nga mo Jiu haꞌike kire ko si ere aaelasie satana a God. Aesaea 52:5

²⁵ Mala uri omu ke lulu i sulie mo Haꞌatolanga toꞌohuu, alaa torihesiꞌonga e toꞌo aana taane mei neꞌisaenga diana mala haꞌa-ara uri iꞌomu mo iinoni a God. Taꞌe mala uri omu ko lae huꞌisie mola mo Haꞌatolanga, nge torihesiꞌonga omu toolea ngeena e neꞌie mola mei ola mwaakule ni ngeena.

²⁶ Mwala nge ikire nga mo Jiu haꞌike, kire kaꞌa toꞌo aana ike tolahai torihesiꞌonga ngeena, taꞌe mala uri kire kei lae oodo mala a God e unue aana mo Haꞌatolanga, nge a God kei loꞌongaꞌinire oto mala mo tohungei iinoni ingeie noꞌone mala mo iini kire hele aana oto torihesiꞌonga.

²⁷ Oto mwala urine nge kire kaꞌa hele aana ike torihesiꞌonga aana sapeda, taꞌe kire ko tola i sulie taane oodotaꞌinge nge mo Haꞌatolanga ko ere i sulie, mauringe ikire e haataꞌinie oto uri e malisine a God ke leiꞌomu mo Jiu. Aena aana omu ko lae peꞌi deu huꞌisie mola mo Haꞌatolanga, maꞌalana niilana mo Haꞌatolanga e lae oto huniꞌomu i laona mo Uusu-uusu Maaꞌi, na omu hele aana oto torihesiꞌonga.

²⁸ ?Oto kira tei nge mo tohungei iinoni ni Jiu? Mei ola mola poꞌoi sinaha haꞌike ni ngeena, aana iinoni nge ko iiꞌo i sulie tolahana mo Jiu, taꞌe ko lae huꞌisie mola mo Haꞌatolanga, ingeie nga tohungei iinoni ni Jiu haꞌike. Na tohungei haꞌa-ara mo iinoni a God e kaꞌa ola ike mola poꞌoi sinaha aana torihesiꞌonga ni sape.

²⁹ Tohungei iinoni ni Jiu oto iini nge manatana e oodo oto peꞌie a God, na tohungei haꞌa-ara aana iinoni a God, mei hei-oolisinge takoie a God nge a Liꞌoa Maaꞌi ko esuie aana saena iinoni. Leu ngeena e kaꞌa lae ike mai mwaanie mo Haꞌatolanga nge uusuleni e sai lae i laona mo puke, taꞌe Liꞌoa Maaꞌi a God oto mola hahaiteli ni e sai esuie. Taungei iinoni urine e kaꞌa saetoꞌo aana ike mwala ke lahea, taꞌe saena mola hunie a God ke lahea.