Uusu-uusu A Pol Hurula'aa Hunie Mo Rom 14 - Tataroha Diana

Suꞌuri Ere Aaelasie Mo Iini Nge Hiiwalaimolinge Ikire E Kaꞌa Susu Ue Aana A Jisas

¹ Omu ke takuhie taꞌena nga iinoni ko hiiwalaimoli aana Jisas, maꞌalana hiiwalaimolinge ingeie e kaꞌa susu ue. Na omu ke suꞌuri ere haitelili loꞌu peꞌie haahie mo ola ko neꞌisae rue-ruaꞌa aani uri kire aapu wa kire kohi taane mola.

² Ne ke haꞌamalaa aana mo iini nge hiiwalaimolinge ikire e kaꞌa susu ue, nge kire kaꞌa sai ngaa ike hasiꞌona taꞌena nga ola mauri aana kire loꞌongaꞌinie uri e aapu. Taꞌe mo iini nge hiiwalaimolinge ikire e susu kire saie taane uri e diana mola huni ngeue taꞌe-taꞌena nga mei ngeulaa.

³ Oto iinoni nge e sai ngaa mola taꞌena nga mei ola, ke suꞌuri leledie iini nge e kaꞌa sai ngeu urine. Na iini nge e kaꞌa sai ngaa ike hasiꞌona taꞌena nga ola mauri, ke suꞌuri leledie iini nge e sai ngaa mola taꞌena nga mei ola. Haꞌa-erenga urine ke suꞌuri, aana a God e takuhie mola ahutadarue.

⁴ ?Haꞌalaa o ko loꞌo-loꞌongaꞌinie uri iꞌoe a tei, aana o ko sare leie iinoni euꞌesu ngaeta iinoni? E kaꞌa malisi ike hunie o ke leie asunge iinoni euꞌesu ngaeta iinoni, taꞌe leu oto i sapena aalaha ingeie ni huni unue uri iinoni ngeena ko esu diana taane wa haꞌike. Na mo iinoni euꞌesu Aalaha ikie kire kei meni esu diana taane mola, maꞌalana kire ko ngeu-ngeu urine wa haꞌike, aena aana a Aalaha oto ko peꞌire hunie kire ke toꞌohie saena.

⁵ Oto loꞌu, ngaeta mo iini ko loꞌo-loꞌongaꞌi uri ngaeta hai dinge e maaꞌi liutaa aana ahutana dinge, na ngaeta mo iini ko loꞌo-loꞌongaꞌi uri ahutana mo dinge kire mani sada mola. Taꞌe a God ko ilenimwaꞌe mola peꞌie ahutadarue mala kire ko meni neꞌisae mouteꞌi i saeda maraada, na kire ko lulu i sulie toꞌohuu nga taa kire hiiwalaimoli aana i sulie leune.

⁶ Iinoni nge e loꞌongaꞌinie uri ngaeta hai dinge e maaꞌi, ko esuie leune aena aana e neꞌisae haꞌamaꞌu aana Aalaha ni ngeena. Na urine loꞌu, iinoni nge e sai ngaa mola taꞌena nga mei ngeulaa, ko esuie leune aena aana e neꞌisae haꞌamaꞌu aana Aalaha, na kie sai leesie uri leune e toꞌohuu aana ko paalahea God haahie mo ngeulaa ngeena. Na loꞌu iini nge e kaꞌa sai ngaa ike hasiꞌona taꞌena nga ola mauri, ko esuie leune aana e neꞌisae haꞌamaꞌu noꞌone aana Aalaha ni ngeena, na ingeie noꞌone ko paalahea God haahie mo ngeulaa ingeie.

⁷ Nga taꞌa-taꞌa iini aaka e kaꞌa iiꞌo mola maraana mai welumalau, na e kaꞌa mau-meuri ike mola nana maraana wa ke mae loꞌu mola nana maraana.

⁸ Maholo kie ko meu-meuri ue, kie ko eriꞌapasie huni deu i sulie saena a Aalaha. Oto aana kie ko mae, na kie kei iiꞌo oto urine. Oto aana maꞌalana kie ke mae wa kie ke mauri, ikie mo iinoni a Aalaha mola haliꞌite ni ngeena.

⁹ Aana a Kraes e mae na e taꞌelaꞌi eelihoꞌi loꞌu, uri hunie ke neꞌi Aalaha nana mwala nge kire mauri ue na mo iini e mae oto.

¹⁰ ?Oto, aana e ue kaꞌu o ko leie aasimu maaꞌi? ?Na e ue kaꞌu nge o ko leledie aasimu na o ko loꞌongaꞌinie uri iꞌoe o diana liutaa aana? Leilaka kei lae mola i sulie neꞌisaenga a God, aana ahutaka, kie kei meni uure mola i naꞌona a God hunie leilaka.

¹¹ Aana uusulana e lae i laona mo Uusu-uusu Maaꞌi uuri, A Aalaha e unue uuri, “!Toꞌohuu oto mala nou meuri ie! Ahutana mwala kei meni pouruuru i naꞌoku, na kire kei meni unu tahangaꞌinie uri ineu oto a God.” Aesaea 45:23

¹² Oto i leune kie saie uri a God hahaiteli ni kei leie ahutana mo iinoni.

Mwaanie O Haꞌa-haꞌatataroa Aasimu Hunie Ke Oorahaꞌaa

¹³ Aena urinena, kie ke rohu oto mwaanie leilaka hailiu. Na omu ke suꞌuri da loꞌu nga mei ola huni haꞌatataroa nga aasimiu maaꞌi hunie ke domu i laona oorahaꞌaa.

¹⁴ Nou tohungei sai diana aana oto uri nga taꞌa-taꞌa mei ngeulaa e kaꞌa aapu ike, aana a Jisas maraana ni e haataꞌinie leune aaka. Taꞌe mala uri nga iini ko loꞌongaꞌinie uri ngaeta mo taungei ngeulaa kire aapu hunie, nge ke suꞌuri ngaa loꞌu mo iini urine.

¹⁵ Mala uri nga iini hikana mo eesimiu ko hii aaela i sulie mo ngeulaa omu ko ngeuꞌi, nge omu kaꞌa lae oto i sulie tolaha ni manata-diananga huniꞌomu heiliu eena. A Kraes e mae noꞌone honotana iinoni ngeena. Oto omu ke suꞌuri waelie hiiwalaimolinge aasimiu aana Kraes haahie nga moi taa omu ko ngeu-ngeuꞌi.

¹⁶ Oto maꞌalana omu saie uri nga mei ola e diana taane mola, taꞌe omu ke suꞌuri esuie, mala uri aasimiu ko hiiwalaimoli uri leune e aapu. Mwaanie mwala kire ere aaelasiꞌomu haahie mei ola diana ngeena.

¹⁷ Aana mo ola mala ngaunge na inunge, kire kaꞌa roroꞌa ike i laona Aalahanga a God. Taꞌe mo ola nge Liꞌoa Maaꞌi ko niiꞌi mala oodotaꞌinge na hanuelamanga na ilenimwaꞌenga haꞌalaa kire roroꞌa.

¹⁸ Na taꞌena nga iini ko esu nana Kraes aana tala diana urine, nge a God kei ilenimwaꞌe haahie na hule aana mwala noꞌone kire kei haꞌamaꞌu aana.

¹⁹ Oto kie ke ariꞌapasie mola asuilana walu ola huni peꞌilaka hailiu hunie iiꞌonga ni henuelamanga na huni haꞌa-aꞌailaꞌaa hiiwalaimolinge ikie.

²⁰ Omu ke suꞌuri toliꞌaasie ngaunge iꞌomu ke waelie asunge a God. Ahutana mo ngeulaa kire mani diana mola hunie ngauleni. Taꞌe e kaꞌa diana ike uri hunie omu ke ngaue mei ola nge e sai haꞌatataroa nga iini hunie domunge i laona oorahaꞌaa.

²¹ Oto e lae otoi diana uri omu ke suꞌuri ngaa loꞌu nga mei sapei ola mauri, wa omu ke inuhie loꞌu nga ewei wei ni pweunge, wa omu ke da loꞌu nga mei ola nge e sai haꞌatataroa aasimiu takoie oorahaꞌaa.

²² Ohe iꞌoe maraamu o kaꞌa neꞌisae rue-ruaꞌa i sulie mei ola ngeena, uri e diana taane wa haꞌike, taꞌe o ke kinetaꞌinie mola hiiwalaimolinge iꞌoe i sulie mei ola ngeena hunie ke iiꞌo mumuni mola i matolamoreꞌi a God. Taꞌena nga iini ko sai diana aana uri nga taa ko esuie e oodo taane mola, nge iini urine kei ile-ilenimwaꞌe mola.

²³ Taꞌe nga iini nge ko neꞌisae rue-ruaꞌa aana nga taa ko ngaa, nge ko deu aaela oto eena, aana ko deu honosie hiiwalaimolinge ingeie. Na leune e aaela, aana taꞌena nga ola iinoni ko esuie honosie hiiwalaimolinge, nge oorahaꞌaa ni otona.