Uusu-uusu A Pol Hurula'aa Hunie Mo Rom 11 - Tataroha Diana

A God E Kaꞌa Aato Puri Ike Aana Mwala Ni Jiu

¹ Oto no ko heꞌi dolosi loꞌu. ?Uri a God e sereꞌinie oto mwala ingeie mo Jiu? !Haꞌike oto ooꞌoo! Ineu maraaku oto mwane ni Jiu aana nou hute mai aana komu a Ebraham uure aana poꞌo ni iinoni a Benjamin.

² A God e saꞌa tohungei sereꞌinie ike mwala ingeie nge e lio hilisire oto uure wau i naꞌo. Omu saie kaꞌu oto laladonga i sulie a Elaeja i laona mo Uusu-uusu Maaꞌi, aana maholo e aarea God na e tohungei ere aaelasie mwala ni Israel uuri,

³ Aalaha, kire horo mangoa oto mo propet iꞌoe na kire ohoie oto mo ora ni uunu-uunu iꞌoe. Taꞌe ineu oto mola nou oore, na kire ko sare horoꞌieu oto noꞌone. 1 King 19:10,14

⁴ ?Oto a God e aalamie a Elaeja uri taa? A God e aalamie mola uuri, Nou toꞌo aana ue e hiu sinolai mwane nge kire kaꞌa palo-paloa ike a Bal, god eero-eero. 1 King 19:18

⁵ E urine noꞌone mola siꞌirini. Aena aana aamasinge ingeie mone, a God e lio hilisie tootaꞌi iini aana mo Jiu hunie kire ke hiiwalaimoli aana a Kraes.

⁶ E kaꞌa lio hilisire ike aena aana mo esunge diana kire asuiꞌi, taꞌe i sulie niinge ni aamasinge ingeie mola maraana haliꞌite. Aana mala uri ke lio hilisire i sulie asunge ikire e diana, haꞌalaa aamasinge a God e neꞌie oto waaitana asunge na e kaꞌa neꞌi niinge loꞌu.

⁷ ?Oto e ue eena? E lio mala uri mwala ni Jiu kaꞌa lio oodoie ike mei oodotaꞌinge i maana God nge kire hai-heitalea aana lulu i sulilana mo Haꞌatolanga. Tootaꞌi iini mola kire lio oodoie, aana a God e lio hilisire. Taꞌe mo iini e kaꞌa lio hilisire kire hei-heitale lae-lae na saeda e hau oto.

⁸ Oto kire iiꞌo oto mola mala mo iini mo Uusu-uusu Maaꞌi e ere i sulire uuri, A God e toliꞌaasire mola hunie kire ke iiꞌo aana puꞌonga ikire maraada. Lae mai hule siꞌiri, kire kaꞌa sai lio oto aana maada, na kire kaꞌa sai rongo oto aana aalingada.

⁹ Na kire urihana noꞌone mo maelonga a Deved Inemauri nge e ere i sulire uuri, God o ke da kire ke pola mola peꞌie pwanu, na o ke da kire ke loꞌongaꞌinie uri walu ola e diana mola hunire, aana kire ko ngeu-ngeu pote mola tarau. O ke teꞌurine aada, mwaanie kire lio saie uri o kei suꞌue aaelanga ikire hunire.

¹⁰ O ke haꞌa-ulue maada mwaanie kire lio-lio, na o ke da sapeda ke maelaaꞌa oto mola tarau aana asunge e aasa. Sam 69:22-23

¹¹ Oto ne ke dolosi loꞌu uuri. ?Uri maholo mo Jiu kire teke i aano urine, loꞌongaꞌinge aana uri kire aaela taraꞌasi oto ni ngeena? !Haꞌike taane! Taꞌe i sulie mo Jiu kire dau aaela, oto a God ko lae peꞌi haꞌa-uurie mola mwala nge ikire nga mo Jiu haꞌike hunie mo Jiu ke saehanalie nga taa a God e asuie aada.

¹² A God e niie oto dianahaꞌana mo ola nana mo Aapoloa Aaopa maholo mo Jiu kire dau tekelaꞌinie oalaꞌinge a God aana kire sereꞌinie Tataroha Diana a Kraes. ?Taꞌe nga taa kei reu maholo mo Jiu kire kei hiiwalaimoli aana, na kire kei haꞌa-oaie neꞌisaenga a God? !Nou saie a God kei tohungei haꞌadianaꞌaa ahutana mwala aana walumalau loꞌu liutaa!

¹³ Ie no ko ere namiu mwala nge iꞌomu nga mo Jiu haꞌike. Ineu oto Hurulaꞌaa a Kraes huniꞌomu mo Aapoloa Aaopa nge iꞌomu nga mo Jiu haꞌike. No ko ere hiitoꞌo huniꞌomu i sulie mei esunge ineu ngeena,

¹⁴ aena aana no ko sare asuie mola mwala ineu mo Jiu ke saehanalie haꞌa-uuringe omu toꞌo aana, hunie uri nga mo iini aada ke aaliꞌu mei takoie a God hunie haꞌa-uurilada ke lae noꞌone.

¹⁵ Oto aana mo Jiu kire iiꞌo poꞌoi sinaha mala ie, nge e niie maholo oto hunie ahutana mwala loꞌu aana walumalau hunie kire ke uure ruru peꞌie a God. ?Haꞌalaa nga taa nge kei reu mala uri mo Jiu kire kei lae loꞌu mei i saana a God? !Ngeena kei urihana uri kire mauri eelihoꞌi loꞌu mwaanie maenga!

¹⁶ Loꞌongaꞌi keꞌu i sulie maholo kie ko niie nga kele makakaꞌai ngeulaa mala nga uuraaꞌinge hunie a God. Aena leune, nge ahutana oto ho ngeulaa ngeena haꞌamaaꞌilana e lae oto noꞌone. Na mala uri imi-imine nga ai e maaꞌi, nge ahutana mo sasarana na kire mani maaꞌi oto noꞌone. Oto mo Jiu kire urine noꞌone, aana a God e lio hilisie mo weuwada oto i naꞌo huni neꞌie mo iinoni ingeie, na nou saie lio-hilisinge ngeena e aaluhie oto komu nge e aehota aada.

¹⁷ Kira Ebraham kire urihana mo imi-imine nga tohungei ei hungu-hungu nge a God e saetoꞌo aana oto liutaa. Taꞌe maꞌalana mo Jiu kire neꞌie ai diana a God urine, a God e hali aasie oto mo sasarai ola hunge mwaanie ai ngeena, aena aana e leledie oto mo Jiu nge kire sereꞌinie a Kraes. Na iꞌomu, maꞌalana uri omu urihana mola mo sasarai ola aana ai ni meꞌesu, taꞌe a God e neꞌiꞌomu aana leu oolisie mo sasarai ola e taꞌaasiꞌi oto, na e ladoꞌomu oto aana ai diana ngeena. Oto aana maholo ienini, iꞌomu noꞌone omu sai helesie taꞌena nga ola diana ko lae-lae mai uure mwaanie mo Jiu.

¹⁸ Aana urine, mwaanie omu mwa-mwaka aana mo sasarai ola a God e taꞌaasiꞌi ngeena. Mwaanie omu ere toohaꞌiniꞌomu, aena aana iꞌomu, omu saꞌa roroꞌa niie ike mauringe hunie imi-imine ai diana ngeena, taꞌe imi-imi ola ngeena nge e sai niie mauringe namiu.

¹⁹ Na mwaanie omu ere toohaꞌiniꞌomu uuri, “A God e hali aasie mo sasarai ola aana tohungei ei diana ngeena hunie uri ke ladoꞌemi weu oolisie mo sasarai ola e hali aasiꞌi ngeena.”

²⁰ Leune e toꞌohuu taane, taꞌe a God e hali aasiꞌi aena aana kire kaꞌa hiiwalaimoli ike. Na iꞌomu oto, omu iiꞌo aana ai diana ngeena mola i sulie omu hiiwalaimoli. Oto mwaanie omu too-toohaꞌiniꞌomu haahie leune, taꞌe omu ke lio talamiu mola.

²¹ Loꞌongaꞌi keꞌu i sulie mo tohungei sasarai ola aana ai diana ngeena. Maholo kire dau huꞌisie oalaꞌinge a God, nge a God e kaꞌa toliꞌaasie ike uri kire ke iiꞌo mola aana ai diana ngeena, taꞌe e hali aasiꞌi mola. ?Oto mala uri omu kaꞌa lulu i sulie oto a Kraes, uri omu ko loꞌo-loꞌongaꞌi a God kei toliꞌaasie mola omu ke iiꞌo aana ai diana ngeena? !Haꞌike oto ooꞌoo!

²² Omu ke sai diana aana uri a God e tohungei diana oto liutaa hunikie, taꞌe e sai leikie noꞌone. Ko leie mwala nge kire toliꞌaasie tolahana, taꞌe e diana huniꞌomu. Na kei diana taraꞌasi huniꞌomu mala uri omu kei nou-norutoꞌo aana aamasinge ingeie. Taꞌe mala uri omu kaꞌa dau urine, nge kei heli aasiꞌomu noꞌone.

²³ Na mala uri mo Jiu kire ko aehota hiiwalaimoli loꞌu, a God kei lado aalihoꞌi loꞌu aada aana leu nge kire oꞌoꞌo kaꞌu aana holaꞌinaꞌo aana ai diana ngeena. Aena aana a God e toꞌo aana mola nanamanga huni lado aalihoꞌi aada.

²⁴ A God e lae peꞌi ladoꞌomu mola peꞌie tohungei ei diana ngeena, maꞌalana uri e aasa aana omu uure mola mwaanie ai ni meꞌesu. Aena urinena, kei mwadaꞌu mola hunie a God kei lado aalihoꞌi aana mo Jiu, nge kire urihana mo sasarai ola toꞌohuu aana tohungei ei diana ngeena.

²⁵ Maeni eesiku maaꞌi, saeku uri omu ke sai diana aana oalaꞌinge a God nge mwala kire kaꞌa saie ike oto i naꞌo. No ko ladoa namiu oto ienini mwaanie omu toohaꞌiniꞌomu maraamiu na omu loꞌo-loꞌongaꞌinie uri omu diana loꞌu liutaa aana mo Jiu. Tolahai ola nge e da saena mo Jiu e hau ngeena e kaꞌa maꞌutaꞌa ike, taꞌe kei iiꞌo haꞌawali mola. A God ko maaꞌoohie mola iidu-iidunge ke ahu aana mo iinoni e lio hilisire mwaanie mo Aapoloa Aaopa,

²⁶ nge aana maholona a God ke si haꞌa-uurie ahutada mo Jiu, oto mala e unue i laona mo Uusu-uusu Maaꞌi uuri, A Haꞌa-uuri kei uure mai mwaanie i Jerusalem, na kei taꞌaasie mo tolahai ola aaela mwaanie mo Jiu.

²⁷ Na ne kei haꞌa-oaie haiholotaꞌinge ineu hunire, aana ne kei taꞌaasie mo oorahaꞌaanga ikire. Aesaea 59:20-21, 27:9

²⁸ Mo Jiu, kire sereꞌinie Tataroha Diana, na aena urinena a God ko tohungei saewasulire oto. Taꞌe nga taa kire asuie ngeena ko peꞌiꞌomu, mwala nge iꞌomu nga mo Jiu haꞌike, aena aana maholo kire kaꞌa hiiwalaimoli, nge melu lae mai tarohaꞌinie a Kraes huniꞌomu. Taꞌe i sulie a God e lio hilisire mone oto, a God ko tohungei manata diana hunire ue, i sulie haiholotaꞌinge ingeie hunie mo weuwada.

²⁹ Aana maholo a God ko lio hilisie oto nga iini na ko niie haꞌadianaꞌanga oto hunie, e saꞌa heꞌi oolisie ike loꞌu saena.

³⁰ Oto wau i naꞌo, iꞌomu mwala nge nga mo Jiu haꞌike, omu kaꞌa sare lulu i sulie ike a God, taꞌe maholo ienini omu helesie oto aamasinge ingeie aena aana omu hiiwalaimoli aana Tataroha Diana. Na tarohaꞌinilana a Kraes e lae mola huniꞌomu aena aana mo Jiu kire sereꞌi rongoa oto.

³¹ Oto kei urine noꞌone hunire mo Jiu nge kire kaꞌa sare lulu i sulie a God aana maholo ienini. A God e sai aamasire noꞌone mala kaꞌu e aamasiꞌomu.

³² A God e haataꞌinie oto uri ahutana mo iinoni, maꞌalana ikire mo Jiu wa haꞌike, taꞌe kire mani hai-heitohea mola na e malisine ke haꞌaletehie ahutada. A God e haataꞌinie leune hunikie, hunie kie ke lio saie uri e oodo taane mola hunie a God ke haꞌa-uurie taꞌena nga iinoni aena aana aamasinge ingeie oto mola hahaiteli.

³³ No ko tohungei pangataꞌinie aamasinge a God. A God e tohungei diana hunie ahutana iinoni, na saenanaunge ingeie e tohungei peine liutaa, na sai-olanga ingeie e tohungei kokoro oto hiitoꞌo. Kie saꞌa roroꞌa ni lio saie ike ahutana mo loꞌongaꞌinge ingeie maholo ko lei-lei, na kie saꞌa loꞌongaꞌi susulie ike tolahana.

³⁴ Oto mala mo Uusu-uusu Maaꞌi e unue uuri, ?A tei keꞌu e saie mo loꞌongaꞌinge a Aalaha? ?A tei keꞌu e sai haꞌananaue aana nga mei ola? Aesaea 40:13

³⁵ ?A tei e niie kaꞌu nga mei ola hunie a God, hunie ke roroꞌaie a God mala uri e kaꞌa suꞌu eelihoꞌi aana hunie? Job 41:11

³⁶ A God oto e haꞌaholaa ahutana walu ola, na ahutana walu ola ngeena e uure mola aana nanamanga ingeie, na walu ola ngeena walu ola ingeie haliꞌite. !Oto kie ke haꞌamanikuluꞌaa God taraureꞌi! Ke urine oto.