Uusu-uusu A Pol Hurula'aa Hunie Mo Rom 10 - Tataroha Diana

¹ Maeni eesiku maaꞌi, mei neꞌisaenga e paine i laona manataku na mei ola no ko aarea a God hunie oto tarau, nge hunie a God ke haꞌa-uurie ahutana mo Jiu.

² Nou saie uri ikire mo Jiu ko eriꞌapasie toꞌohuu huni lulu i sulie a God, taꞌe kire kaꞌa hahuꞌei saie ike tohungei tala.

³ Kire kaꞌa saie ike tala a God e oalaꞌinie hunie mwala ke neꞌi iinoni oodotaꞌi i maana, oto kire ko eriꞌapasie mola hunie kire ke neꞌi iinoni oodotaꞌi aana lulu i sulilana mo Haꞌatolanga. Taꞌe aana kire ko norutoꞌo mola aana Haꞌatolanga urine, nge kire kaꞌa tola i sulie ike neꞌisaenga a God wa kire ke lae i sulie tala e oalaꞌinie hunie mwala ke neꞌi iinoni oodotaꞌi i maana.

⁴ Taꞌe a Kraes e haꞌa-oaie oto mo Haꞌatolanga taꞌingelu, na aena aana e haꞌamangoa oto tala takoie oodotaꞌinge aana mo Haꞌatolanga urine, nge ahutana mo iini kire norutoꞌo aana a Kraes, kire ko neꞌi iinoni oodotaꞌi oto i maana a God.

⁵ E toꞌohuu oto, aana a Mosis maraana e ere noꞌone i sulie aasanga aana tala takoie oodotaꞌinge aani lulu i sulilana mo Haꞌatolanga uuri, Iinoni nge ko sare toꞌo aana maurihe haahie tola i sulilana mo Haꞌatolanga ienini nge ke dau oto i sulie ahuteni haꞌalaa. Levitikas 18:5

^6-7 Taꞌe oodotaꞌinge nge ko uure mai aana hiiwalaimolinge, e aaopa. Mo Uusu-uusu Maaꞌi a Mosis ko ere i sulie oodotaꞌinge ngeena uri mei ola e mwadaꞌu hunie mwala ke toꞌo aana. E unue uri e kaꞌa neꞌie ike mei ola e tohungei aasa hunie iinoni ke asuie, mei ola e aasa mala hanetaanga taꞌau i Lengi huni toolea a Kraes mai aano, wa sihotolinge hao i laona kalinge kokoro mo iini e mae oto huni taꞌelaꞌinie poi a Kraes mwaanie maenga. !Haꞌike!

⁸ Taꞌe oodotaꞌinge nge ko uure mai aana hiiwalaimolinge aana a Kraes, e mwadaꞌu mola huni oodoie, aena aana mo Uusu-uusu Maaꞌi ko unue uuri, Mei wala a God e iiꞌo mola karaꞌiniꞌomu. Ingeie oto aana ngidumiu, na i laona manatamiu. Diutronomi 30:14 Ingeie oto Tataroha Diana melu ko tarohaꞌinie,

⁹ aana haꞌa-uurilemu ke lae mala uri o ko hiiwalaimoli toꞌohuu i laona manatamu uri a God e taꞌelaꞌinie a Jisas mwaanie maenga, na o ko houleꞌinie aana ngidumu uri a Jisas ingeie oto Aalaha iꞌoe.

¹⁰ A God kei unue uri iꞌoe iinoni oodotaꞌi i maana na kei haꞌa-uuriꞌo mwaanie maenga huu, mala uri o ko hiiwalaimoli urine toꞌohuu na o ko houleꞌinie hunie mwala.

¹¹ E toꞌohuu oto, aana mo Uusu-uusu Maaꞌi ko ere loꞌu i sulie a Kraes uuri, Taꞌena nga iini ko norutoꞌo aana e saꞌa roroꞌa norudile ike. Joel 2:32

¹² Leune e toꞌohuu hunie taꞌena nga iinoni, maꞌalana ikire mo Jiu wa ikire nga mo Jiu haꞌike. A Kraes ingeie oto taꞌa-taꞌa Aalaha haahie ahutana mo iinoni, na ko niie mo haꞌadianaꞌanga hunge hunie ahutana mo iini kire norutoꞌo aana.

¹³ Na mo Uusu-uusu Maaꞌi ko unue loꞌu uuri, Taꞌena nga iini ko sukaa peꞌinge mwaanie a Aalaha, nge haꞌa-uurilana kei lae hunie. Aesaea 52:7

¹⁴ ?Taꞌe mwala kei sukaa peꞌinge mwaanie a God uri taa, na kire kaꞌa manataꞌinie wa kire ke hiiwalaimoli aana? ?Na kire kei hiiwalaimoli aana loꞌu uri taa, na kire kaꞌa rongoa nga mei ola aana? ?Na kire kei rongoa uri taa, na tarohaꞌinilana mei wala ngeena e kaꞌa lae ike hunire?

¹⁵ ?Na tarohaꞌinilana mei wala ngeena kei lae hunire uri taa, na nga iini huni lae i saada haꞌike, wa nga iini uusungeꞌinilana haꞌike? Taꞌe a God e uusungeꞌinie ngaeta mo iini taane, na mo Uusu-uusu Maaꞌi ko ere i sulire maholo ko unue uuri, Hulanga mo iini ko tarohaꞌinie mai tataroha diana, mei ola ni ilenimwaꞌenga oto paine ni ngeena. Aesaea 52:7

¹⁶ Taꞌe maꞌalana e urine, tootaꞌi iini mola ko saetoꞌo aana Tataroha Diana, na e urihana mola nga taa a Propet Aesaea e unue aana e teꞌuri, Aalaha, e lio mala nga iini e kaꞌa hiiwalaimoli ike aana nga taa melu ko unu-unue oodoire. Aesaea 53:1

¹⁷ Oto nga taa no ko unue e uuri. Hiiwalaimolinge e uure oto mai mwaanie rongolana mei wala aana tataroha diana, na Tataroha Diana i sulie a Kraes ni otona.

¹⁸ ?Oto e ue aana mo Jiu kire kaꞌa lulu i sulie? ?Uri kire rongoa taane tataroha ngeena? !Iau! Kire rongoa taane, aana tataroha ngeena e loho hailiu urihana nga taa mo Uusu-uusu Maaꞌi e unue i sulie haꞌaholanga uuri, Mei tataroha ngeena e lae kalie walumalau, na mo wala ngeena kire hule oto aana ahutana mo henue i laona walumalau. Sam 19:4

¹⁹ ?Oto e ue kire kaꞌa lulu i sulie ike? ?Uri kire kaꞌa rongo saie ike? !Haꞌike! Kire rongo saie taane, aena aana mo Aapoloa Aaopa nge kire kaꞌa saenanau ike, taꞌe kire rongo saie mola. A God e holaꞌi ere i sulie leune aana pongine a Mosis aana e teꞌuri, Mo Aapoloa Aaopa, ikire mwala mwaakule mola, taꞌe maholo ne kei haꞌa-uurire, nge iꞌomu mo Jiu, omu kei heotaꞌinire mola. Na omu kei saewasu mola aana omu kei leesie ne kei peꞌie mwala nge hule aana kire kaꞌa saenanau ike mala iꞌomu. Diutronomi 32:21

²⁰ Na a Propet Aesaea noꞌone e kaꞌa maꞌu ike huni unue walana a God uuri, Mwala nge hule aana kire kaꞌa sai heitaleau ike, kire lio oodoieu kaꞌu mola. Na mwala nge kire kaꞌa sai dolosi hunieu ike, taꞌe nou haataꞌi maraaku mola hunire. Aesaea 65:1

²¹ Taꞌe a God ko ere i sulie mo Jiu uuri, Nou haꞌaweoau e tewa oto aana soi-soinge suli dinge huni peꞌie mwala nge kire kaꞌa sare aaliꞌu takoieu aana ikire mwala hai-heitohe na saeda e hau oto. Aesaea 65:2