Uusu-uusu A Pol Hurula'aa Hunie Mo Rom 1 - Tataroha Diana

Mei Wala Ni Saediananga

¹ Saediananga mwaanieu a Pol, iinoni euꞌesu a Kraes Jisas. A God e lio hilisieu na e soieu hunie ne ke neꞌi hurulaꞌaa ingeie huni tarohaꞌinie Tataroha Diana a God.

² Tataroha Diana ngeena, a God e haiholotaꞌinie oto uure wau i naꞌo aana mo propet maaꞌi, mala uusulana e lae i laona mo Uusu-uusu Maaꞌi

^3-4 i sulie a Kalena, Aalaha ikie a Jisas Kraes. E neꞌi iinoni aana e hute mala iinoni aana komu a Deved Inemauri, taꞌe a Liꞌoa Maaꞌi e taꞌelaꞌinie loꞌu mwaanie maenga aana nanamanga paine a God, na urine e haataꞌi diana aana uri ingeie Kalena God toꞌohuu.

⁵ A Jisas e tohungei haataꞌinie hahuꞌana manata-diananga ingeie hunieu aana e lio hilisieu hunie ne ke neꞌi hurulaꞌaa ingeie, uri hunie ne ke naꞌona mwala aana taꞌena nga komu hunie kire ke haꞌapainaꞌaa satana, na hunie kire ke hiiwalaimoli aana, na hunie kire ke tola i sulie walana.

⁶ Na iꞌomu mo Rom, iꞌomu noꞌone ngaeta mo iini aana mo Aapoloa Aaopa nge a Jisas Kraes e lio hilisiꞌomu ngeena.

⁷ Oto ie no ko uusu-uusu hunie ahutemiu weu i Rom, mwala nge a God e manata diana huniꞌomu na e soiꞌomu hunie omu ke neꞌie oto mo tohungei iinoni maaꞌi ingeie. No ko eitanaie a God Aamaka na a Jisas Kraes Aalaha ikie, uri kire ke haataꞌinie hahuꞌana manata-diananga huniꞌomu, na uri ke niie hanuelamanga huniꞌomu.

A Pol Ko Sare Lae I Maatolie Mo Rom Aana Nga Maholo

⁸ No ko sare holaꞌi paalahea God haahiꞌomu aana ahutana walumalau ko rongoa oto hiiwalaimolinge iꞌomu. Na i tehulaꞌana a Jisas Kraes mone, nou saie uri a God ko rongo hunie paalahenga ineu ngeena.

⁹ No ko esu nana God aana ahutana saeku aani laeliwalanga aana Tataroha Diana i sulie a Kalena, na a God e leesie noꞌone uri nou kaꞌa mou-mou ike mwaanie aarengaꞌinge talamiu.

¹⁰ Suli maholo no ko aarengaꞌi, no ko eiꞌeitanaie a God uri ke asuie nga tala ke mwadaꞌu talaku hunie ne ke maatoliꞌomu aana nga maholo. Aana ko tewa oto na

¹¹ no ko tohungei sare leesiꞌomu oto, uri hunie ne ke peꞌie maurihaꞌamiu aana mei niinge uure aana a Liꞌoa Maaꞌi huni haꞌa-aꞌailaꞌaa hiiwalaimolinge iꞌomu.

¹² Nou tohungei sare leesiꞌomu hunie kolu ke mani ere haꞌasusukolu heiliu aana hiiwalaimolinge ikolu.

¹³ Maeni eesiku maaꞌi, omu ke saie mola uri mo maholo hunge oto no ko loꞌongaꞌi huni maatoliꞌomu, taꞌe mo ola oto hunge ko talei liu-liu honosieu mola tarau. Nou lae hule aana mo henue oto hunge huni peꞌie mwala hunie kire ke hiiwalaimoli aana Jisas, na saeku hunie uri ne ke teꞌurine noꞌone wau aana hanue iꞌomu.

¹⁴ Aana asunge ineu ie mei esunge huni peꞌie ahutana mwala, maꞌalana ikire mo iini manata wa haꞌike, na maꞌalana ikire mo iini puꞌosasu wa kire saenanau, taꞌe Tataroha Diana a Jisas ke lae hunie ahutana mwala.

¹⁵ Aena urinena nge no ko tohungei sare unu tahangaꞌinie Tataroha Diana noꞌone huniꞌomu wau i Rom.

Tataroha Diana E Sai Haꞌa-uurie Mwala Mwaanie Haꞌaletehinge A God

¹⁶ Nou tohungei norutoꞌo aana Tataroha Diana a Jisas na nou saꞌa roroꞌa masa ike huni tarohaꞌinie, aana e toꞌo aana nanamanga paine a God huni haꞌa-uurie ahutana mo iini e hiiwalaimoli aana, maꞌalana ikire mo Jiu wa ikire mo Aapoloa Aaopa nge ikire nga mo Jiu haꞌike.

¹⁷ Aana Tataroha Diana ngeena ko haataꞌinie hunie mwala uri a God e sai neꞌi oodohie mwala peꞌie maraana uri taa. Na tala ngeena mei ola aana hiiwalaimolinge mola, uure oto i aehotalana hunie haꞌamangolana. Na nga tala aaopa loꞌu, haꞌike oto ooꞌoo, mala mo Uusu-uusu Maaꞌi e unue uuri, Iinoni e oodotaꞌi i maana God i tehulaꞌana hiiwalaimolinge, nge haꞌalaa kei meuri huu. Habakuk 2:4

A God E Tohungei Saewasulie Oorahaꞌaa

¹⁸ Uure i Lengi a God e haataꞌinie oto uri e tohungei saewasu haahie ahutana oorahaꞌaa na tataꞌalanga mwala. A God kei haro haꞌaletehire taane, aena aana mo tataꞌalanga ikire ko deu honosie mola walaimolinge mwaanire maraada na mwaanie ngaeta mwala loꞌu.

¹⁹ Kire saie taane walaimolinge i sulie a God ngeena, aena aana nga taa uri huni saie i sulie a God e mwadaꞌu mola hunire, aana a God maraana e asuie ke mwadaꞌu hunie kire ke lio saie.

²⁰ E toꞌohuu taane uri iinoni e kaꞌa sai leesie ike a God, taꞌe uure oto i naꞌo aana haꞌaholalana walumalau, na mwala ko lee-leesie walutana nga ola e asuiꞌi. Oto i leune kire si lio saie mola nanamanga huu ingeie na tolahana e maaꞌi, aana leesileni ko tohungei lae matapwa oto hiitoꞌo aana walu ola nge a God e haꞌaholaꞌi ngeena. Oto mwala urine ngeena, nga mei ola hunie kire ke unue na haꞌike loꞌu.

²¹ Oto maꞌalana kire saie taane mola a God, taꞌe kire kaꞌa haꞌamaꞌu ike aana, wa uri kire ke paalahea na haꞌike loꞌu. Loꞌongaꞌinge ikire e loho aaopa mola aana mo ola mwaakule mola, na saeda e honu mola aana rodohono.

²² Kire ko unu-unue uri kire saenanau, taꞌe haꞌike. Kire neꞌi iinoni pweu-pweuaꞌa mola.

²³ Aana kire sereꞌi palo-paloa tohungei God e manikuluꞌe na e iiꞌo huu, oto kire ko si paloa mola mo nunui ola nge kire asuiꞌi huni lio mala mo iinoni, wa mo menu, wa mo mwaa, wa mo ola ni meꞌesu.

²⁴ Aena urinena nge a God e toliꞌaasie mola mwala ngeena hunie kire ke dau mola mala saeda aani esuilana mo loꞌongaꞌinge madaꞌa i saeda, oto kire ko da mola walu ola ni masanga aani aeni-olanga i matolada hailiu.

²⁵ Kire ko oolisie mola walaimolinge i sulie a God hunie eeronga. Oto kire ko haꞌaweora mola maraada aani palolana walu ola nge a God e haꞌaholaꞌi, na kire kaꞌa paloa ike iini e haꞌaholaa walu ola ngeena wa kire ke tola i sulie walana. Taꞌe ingeie a Haꞌahola maraana, iini nge lahelana ke lae taraꞌasi oto huu ni ngeena. Iau, ke urine oto.

²⁶ Oto aena aana kire ko da mola walu ola aaela urine, a God e toliꞌaasire mola hunie mo neꞌisaenga ni masanga. Maꞌalana mo huꞌe na kire ko oolisie oto tolahai ola huni iiꞌo ruru peꞌie mwane na kire ko aeꞌaeni ola mola peꞌie mo keni mala ikire.

²⁷ Aana mo mwane, na e urine loꞌu. Kire kaꞌa aapwasu ike loꞌu aana hikusilana mo huꞌe, taꞌe saeda e tohungei honu mola aana hari-hunilana aeni-olanga peꞌie mo mwane, oto kire ko aeni ola mola tarau peꞌie mo mwane mala ikire maraada. Na i tehulaꞌana mo tataꞌalanga kire ko esuiꞌine, nge mo haꞌaloinge e malisine kire ke tooleꞌi, kire ko si sapesalu eeni mola aana sapeda maraada.

²⁸ Oto aena aana mwala ngeena kaꞌa sare loꞌongaꞌinie ike loꞌu saenanaunge toꞌohuu aana God, a God e toliꞌaasire mola hunie kire ke dau mola mala saeda, maꞌalana kire ko da mola walu ola e kaꞌa malisine ike uri kire ke dauꞌi.

²⁹ Kire honu mola aana taꞌena nga ola aaela, na tataꞌalanga, na saehanalinge, na oorahaꞌaa. Kire honu mola aana heotaꞌinge, na horonga, na haiseuninge, na eeronga, na maaleledinge. Kire sai sihoai ola mola tarau,

³⁰ na kire ko ere-ere aaelasie mola mwala. Kire tohungei leledie a God, na kire kaꞌa haꞌamaꞌu ike aana nga iini. Kire ko ere mwakataꞌinie mwala oto tarau, na kire sai ere toohaꞌinire mola maraada. Saeda e painesie mola mo tolahai ola aaela haalu huni sapeie mo tolahai ola aaela lalahuꞌe nge kire sai esuiꞌi hunie aaelanga ke paine loꞌu. Kire sai heitohea mo aamada na mo nikada,

³¹ na nga mei manatanga haꞌike oto aada. Kire kaꞌa sai lae ike i sulie walada, na kire kaꞌa sai manata diana ike hunie nga iini wa kire ke aamasie nga iinoni.

³² Kire saie taane uri Haꞌatolanga a God e unue uri mwala nge iiꞌolada e urine kire malisine oto maenga. Taꞌe kaꞌa ike mola aana uri kire ko lae peꞌie asuilana walu ola aaela urine tarau, taꞌe hule aana kire ko ilenimwaꞌe huni peꞌie mwala loꞌu huni esuie mo aaelanga urine noꞌone peꞌire.