Pilimon 1 - Tataroha Diana

Mei Wala Ni Saediananga Hunie A Pilimon

¹ Saediananga mwaaniꞌemereꞌi a Pol na a Timoti, huniꞌo Pilimon. Ineu a Pol, nou iiꞌo i nume ni hoꞌo i tehulaꞌana asunge a Jisas Kraes, na aasike maaꞌi a Timoti ko peꞌieu ienini huni uusu-uusu weu huniꞌo, Pilimon. Iꞌoe, o tohungei esu diana peꞌiꞌemeelu nana God, na iꞌoe oto tohungei malahumeelu.

² Mere ko uusu-uusu noꞌone hunie tohungei eesimeelu a Apia, na a Akipas, nge ko esu noꞌone nana a Jisas mala ikolu. Na mere ko uusu-uusu noꞌone hunie mo iini aana soihaadaꞌinge nge kire ko lae-lae mai huni aarea God noꞌone wau i nume iꞌoe.

³ No ko aarea God Aamaka na a Jisas Kraes Aalaha ikie uri hahuꞌana manata-diananga na hanuelamanga ke iiꞌo peꞌiꞌomu.

A Pol E Manata Diana Hunie A Pilimon

⁴ Ahutana maholo no ko aare-aarea God talamu, Pilimon, no ko paalahea God oto liutaa haahiꞌo.

⁵ No ko aama-aamasitoꞌo aamu sulie no ko rorongoa uri o ko tohungei manata diana liutaa hunie ahutana mwala a God, na hiiwalaimolinge iꞌoe e susu i lalo aana Jisas Aalaha ikie.

⁶ Na no ko aarea God uri o ke asu hiitoꞌo aana haꞌarongolana mwala i sulie a Jisas hunie ikire noꞌone kire ke hiiwalaimoli aana. Na aana o kei esu urine, nge o ke si saenanau oto hiitoꞌo loꞌu i sulie ahutana mo haꞌadianaꞌanga nge a God ko nii-niiꞌi mei hunikie aena kie lado oto peꞌie a Kraes.

⁷ Malahuku diana, manata-diananga iꞌoe hunie mwala a God e da kire ko tohungei hii diana, na aena mei olana o da ineu noꞌone, no ko tohungei ilenimwaꞌe na saeku e susu.

A Pilimon Ke Saeꞌaasi Hunie A Onesimas

^8-9 Oto aena urinena, no ko eitanaiꞌo hunie o ke asuie nga mei ola hunieu. Mala uri saeku hunie, nou sai unue mola huniꞌo aana nanamanga ineu mala nga hurulaꞌaa a Kraes hunie o ke asuie mola hunieu, taꞌe nou kaꞌa sare asuie ike urine. !Haꞌike! Nou saꞌa dau rarahiꞌo ike, taꞌe aena aana kure ko manata diana hunikure hailiu, nge no ko sare kele ai-eitanaiꞌo mola hunie o ke peꞌieu. Oto no ko ere huniꞌo ie mala ineu ngaeta repo, nge nou iiꞌo oto i laona nume ni hoꞌo siꞌiri aena aana no ko tarohaꞌinie walana a Jisas Kraes.

¹⁰ Oto no ko eitanaiꞌo hunie o ke aamasie loꞌu kaleku a Onesimas, sulie maholo nou iiꞌo i nume ni hoꞌo ie nou haꞌa-haꞌa-uusulie na e hiiwalaimoli oto aana Kraes. Oto e urihana e neꞌi kaleku toꞌohuu oto.

¹¹ Nou saie taane uri holaꞌinaꞌo e kaꞌa sai peꞌiꞌo ike, taꞌe maholo ienini kei sai peꞌikure oto hiitoꞌo.

¹² Oto no ko uusungeꞌi eelihoꞌi oto wau aana i seemu ie, maꞌalana uri nou tohungei sae paine taane haahie.

¹³ Nou sae haahie ue hunie ke iiꞌo kaꞌu peꞌieu oolisiꞌo hunie ke peꞌieu aana maholo nou iiꞌo i laona nume ni hoꞌo i tehulaꞌana tarohaꞌinilana a Jisas.

¹⁴ Taꞌe nou kaꞌa sare da ike leune na nou kaꞌa holaꞌi ere peꞌiꞌo, mwaanie uri o saꞌa ilenimwaꞌe ike haahie. Aana nou kaꞌa sare dau rarahiꞌo ike huni esuie mei ola diana urine, taꞌe saeku hunie iꞌoe mola maraamu o ke neꞌisae ni esuie.

¹⁵ Aana lio-lionga ineu, e karaꞌi lio mala ohe a God e toliꞌaasie a Onesimas ke oopa mwaaniꞌo hunie kele maholo urine, aena urine nge kei ooli loꞌu weu i seemu huni iiꞌo oto huu peꞌiꞌo.

¹⁶ E oopa mwaaniꞌo kaꞌu mala koni-konihe iꞌoe, taꞌe oto ie ingeie e diana oto liutaa aana nga koni-konihe mola, aana ingeie nga aasike oto i lalo aana Kraes. Nou tohungei sae haahie taane, taꞌe nou saie o kei sae haahie loꞌu liutaa aaku, sulie ingeie nga koni-konihe diana iꞌoe na nga aasimu noꞌone i lalo aana Kraes.

¹⁷ Mala uri o ko manata diana toꞌohuu hunieu mala ineu nga malahumu diana, nge o ke tola konie noꞌone a Onesimas mala o sai tola konieu.

¹⁸ Na mala uri e asuie nga mei ola aaela takoiꞌo wa e toolea nga mei ola mwaaniꞌo, nge o ke toliꞌaasie hunieu, na ineu ne ke si suꞌue huniꞌo.

¹⁹ Ineu a Pol nge no ko uusue uusu-uusu ienini weu huniꞌo maraaku huni haꞌawalaimoliꞌaa uri ineu nge ne ke si suꞌue oolisie a Onesimas nga mei ola urine. Taꞌe nou saie o kaꞌa pupulongosie ike mei meu-meuringe haalu nge o toolea noꞌone i tehulaꞌaku.

²⁰ Malahuku diana, aana kure mani lado peꞌie a Kraes, kaꞌu no ko eitanaiꞌo aana satana a Aalaha uri o ke peꞌieu urine hunie o ke haꞌamamaloa saeku.

²¹ No ko uusu-uusu weu huniꞌo urine sulie nou saie o kei deu mola i sulie nga taa nge no ko eitanaiꞌo hunie, na hule aana o kei esu diana aana loꞌu liutaa.

²² Ngaeta leu loꞌu, nou saetoꞌo aana o ke dau aakau aana nga leu talaku i nume iꞌoe, sulie nou norutoꞌo aana uri a God kei rongo mola hunie mo aarengaꞌinge iꞌomu hunie ne ke lae wau i seemiu.

Mei Wala Ni Saediananga Ooreta

²³ A Epapras ko iiꞌo noꞌone i nume ni hoꞌo peꞌieu i tehulaꞌana a Jisas Kraes, na ingeie ko niie noꞌone saediananga ingeie huniꞌomu.

²⁴ Na mo mwane loꞌu nge kire ko meni esu noꞌone peꞌieu, a Mak, na a Aristakas, na a Demas, na a Luk, kire ko meni niie noꞌone saediananga ikire huniꞌomu.

²⁵ Oto no ko eitanaie a Jisas Kraes Aalaha ikie uri hahuꞌana manata-diananga ingeie ke iiꞌo peꞌiꞌomu.