Palonga 6 - Tataroha Diana

Kire Lio Hilisie E Hiu Mwane Huni Peꞌi I Laona Soihaadaꞌinge

¹ Aana maholona soihaadaꞌinge ko peine lau-leu oto mola, oto kira hiiwalaimoli nge kire ko ere-ere mola aana erenga ni Krik, kire ko aehota upwesie mo iini nge kire sai ere aana tohungana erenga mo Jiu. Oto kire ko teꞌuri, “Suli dinge maholo omu ko haꞌa-adoa kira maitale aana mo niinge kolu meni niiꞌi, omu kaꞌa tohungei peꞌi-peꞌi diana aana ike mo nao iꞌemeelu mala mo iini iꞌomu.”

² Oto aawalai hurulaꞌaa mwana rue kire lokoa ahutana mwala aana soihaadaꞌinge, kire ko si teꞌuri hunire, “E kaꞌa diana ike hunie melu ke toliꞌaasie houleꞌinilana walana God na melu ke lio mola i sulie toꞌoha na ngaulaa.

³ Oto mo mwane, kei lae oto i diana liutaa hunie omu ke lio hilisie nga hiu mwane aamiu nge omu saie uri kire saenanau liutaa na kire honu aana Liꞌoa Maaꞌi hunie melu ke niie mei esunge ngeena hunire.

⁴ Taꞌe iꞌemeelu, melu kei iiꞌo mola peꞌie aarengaꞌinge na peꞌi houleꞌinilana walana God.”

⁵ Oto ahutana mwala kire rongoa mei wala ngeena kire ko si ilenimwaꞌe haahie. Oto kire si lio hilisie a Stivin, na a Pilip, na a Prokoras, na a Nikeno, na a Timon, na a Pamenas, na a Nikolas. Hiiwalaimolinge a Stivin ngeena e tohungei susu, na e honu aana Liꞌoa Maaꞌi. Na a Nikolas ngeena e hute aana mo Aapoloa Aaopa aana huilume i Antiok, taꞌe e talamaꞌinie tolahana mo Jiu na e neꞌie oto ngaeta iini aada.

⁶ Oto kire haꞌa-uuresie e hiu mwane ngeena i naꞌona mo hurulaꞌaa, na kire si hele i pweude peꞌi aarengaꞌinge haahire.

⁷ Oto walana God mone ko lae ahusie oto mo henue hunge, na mo pwaarongoisuli i Jerusalem kire ko hunge loꞌu liutaa, na hungelana mo pris ko lulu i sulie oto a Jisas noꞌone.

Mo Naꞌohai Mwane Ni Jiu Kire Tapolie A Stivin

⁸ A God mone ko haꞌadianaꞌaa a Stivin na ko nii-niie nanamanga hunie, oto ko esuie mo huꞌi-huꞌite na mo ola ni pangataꞌinge i matolana mwala.

⁹ Taꞌe ngaeta mo mwane ni Jiu kire ko leledie mola a Stivin. Mo mwane ngeena kire uure mwaanie mo huilume haꞌatau i Saerin na i Aleksandria na e ro poꞌo ni henue i Silisia na i Esia. Na kire mani sai loko aana nume ni palo-palo mo Jiu nge kire haaraꞌinie aana Nume Ni Palo-palo Mwala Kire Iiꞌo Luhetaꞌi Loꞌu. Oto mo mwane ngeena kire ko aehota haꞌa-ere oto peꞌie a Stivin,

¹⁰ taꞌe Liꞌoa Maaꞌi ko peꞌie a Stivin hunie erenga ingeie ke aꞌailaꞌa liutaa aana mo mwane ngeena.

¹¹ Oto lae-lae kire si lai waaie ngaeta mo mwane hunie kire ke eerotaꞌinie a Stivin uuri, “Melu rongoa a mwane ie e ere mwakataꞌinie a Mosis na a God.”

¹² Oto aana kire ko ere urine, kire ko da ahutana mwala, na mo rato ni mwane aana mo Jiu, na mo haꞌa-uusuli aana mo Haꞌatolanga a Mosis, kire ko meni tohungei saewasulie a Stivin. Oto kire tapolie na kire ookea wau oto i naꞌona pulitaa ni lei-lei.

¹³ Oto mo mwane ngeena kire uure i lengi huni eero, na kire ko teꞌuri, “A mwane ngeena, ko ere-ere aaelasie Nume Maaꞌi Peine ikolu na ko ere-ere aaelasie mo Haꞌatolanga a Mosis oto tarau.

¹⁴ Na melu rongoa e unue uri a Jisas, mei ola ni Nasaret ngeena, kei ohoie Nume Maaꞌi Peine ikolu, na kei oolisie mo tolahai ola nge a Mosis e niiꞌi mei hunikie.”

¹⁵ Oto aana maholona ahutana mwala nge kire loko ngeena, kire ko si lio hahuroto oto aana a Stivin aana kire ko si leesie maana e lio oto mala ensel.