Palonga 5 - Tataroha Diana

A Ananaeas Na Sapaera Kirerue Eeroa Liꞌoa Maaꞌi

¹ Oto lae-lae ngaeta mwane satana a Ananaeas na huꞌe ingeie satana a Sapaera, kirerue ko haꞌaholingeꞌinie noꞌone ngaeta mei aano ikirerue.

² Taꞌe kirerue mani neꞌisae tararuru huni hele oorea ngaeta aapa aana mei toꞌoha ngeena. Oto a Ananaeas maraana e lae mai saana mo hurulaꞌaa, na ko unue uri ko nii taꞌingelu oto aana mei toꞌoha hunire.

³ Oto a Pita ko teꞌuri hunie a Ananaeas, “?Ananaeas, e ue ni o toliꞌaasie a Pwelu Eero-eero ke naꞌomu huni eeroa Liꞌoa Maaꞌi? Aana iꞌoe, o hele oorea ngaeta aapa aana mei toꞌoha nge o terie aana mei aano o haꞌaholingeꞌinie.

⁴ Maholo o kaꞌa haꞌaholingeꞌinie ue mei aano ngeena, mei aano iꞌoe mola ni ngeena, na maholo o haꞌaholingeꞌinie oto, ahutana mei toꞌoha mei ola oto iꞌoe. ?Oto e ue ni o si loꞌongaꞌi huni eero loꞌu urine? Aana o kaꞌa eeroa ike mola mo iinoni, taꞌe o eeroa oto a God ni ngeena.”

⁵ A Ananaeas e rongo mola urine, e ladamaꞌi hai aano na ko mae oto. Oto ahutana mwala kire rongoa leune kire ko si tohungei meꞌu oto liutaa.

⁶ Oto mo saanau kire lae mai uloa sapena, kire toolea i sinaha, kire si lai heitolingeꞌinie.

⁷ Na purine e oolu maholoi sato e mango, a Sapaera e lae loꞌu mei i nume, taꞌe e kaꞌa saie ike nga taa e rau aana poro ingeie.

⁸ Oto a Pita ko dolosi aana ko teꞌuri, “?O ke unue kaꞌu, uri ahutana mei toꞌoha more tarie aana mei mwakano more haꞌaholingeꞌinie ni oto ie?” A huꞌena e aalamie a Pita oto ko teꞌuri, “Iau, ahuteni oto ngeena.”

⁹ Oto a Pita ko teꞌuri loꞌu hunie, “?Oto e ue ni more neꞌisae tararuru huni haꞌangai-ngeie Liꞌoa Maaꞌi a God? !O ke rongo! Mo saanau nge kire lai heitolingeꞌinie poro iꞌoe, ikire oto taꞌau i aena maa, na kire kei aangaꞌiniꞌo oto noꞌone taꞌau urine.”

¹⁰ Na oto mola aana kele maholoi satona a huꞌena e ladamaꞌi hai aano na ko mae loꞌu mola i naꞌona Pita. Mo saanau kire sili mei nume, na kire ko leesie a huꞌena e mae oto noꞌone, oto kire aangaꞌinie, kire ko si lai heitolingeꞌinie loꞌu i sulie poro ingeie.

¹¹ Ahutana mo iini aana soihaadaꞌinge kire ko si tohungei meꞌu oto liutaa, na ahutana mo iini kire rongoa mei olana kire ko meꞌu oto noꞌone.

Mo Hurulaꞌaa Kire Asuie Mo Tolimaa Oto Hunge

¹² Na kira hiiwalaimoli kire ko loko tararuru tarau i laona Nume Maaꞌi Peine aana lolata kire haaraꞌinie “Leu Haa-haanaku a Solomon.” Mo hurulaꞌaa kire ko esuie mo huꞌi-huꞌite na mo tolimaa hunge i matolana mwala,

¹³ na ahutana mwala kire ko meꞌu ni uure peꞌire, taꞌe kire ko lae-lahera mola.

¹⁴ Na mo iini hunge aana mo mwane na mo keni kire lae peꞌi hiiwalaimoli aana Aalaha.

¹⁵ Oto aena aana mo huꞌi-huꞌite hunge nge mo hurulaꞌaa ko esuiꞌi, nge mwala kire lae peꞌi toolea mai mo mwei-mweriaꞌa oto i sinaha, na kire ko lai haꞌa-enosire i lengine mo tahe na mo niꞌe i sulie tala. Aana neꞌisaenga ikire uri maholo a Pita kei liu aana leune, maꞌalana nunune ko liu mola haahie mo iini ko mweri ngeena na kire sai awaa loꞌu.

¹⁶ Na mwala hunge aana mo kele huilume kali-kelie i Jerusalem kire ko lae noꞌone mai, aana kire ko too-toolea mai mo iini ko mweri na mo iini mo liꞌoa aaela e iiꞌo aada. Oto ahutada mango haꞌa-uurilada e si meni lae.

Ahutana Mo Hurulaꞌaa Kire Lae I Laona Leinge

¹⁷ Oto Naꞌohana Mo Naꞌohai Pris na pulitaa ingeie mo Sadiusi kire ko tohungei heotaꞌinie mo hurulaꞌaa aena aana mwala kire ko lulu i sulire oto. Oto mo Sadiusi kire neꞌisae mouteꞌi oto huni uure honosie mo hurulaꞌaa.

¹⁸ Oto kire lai tapolire, na kire si lai neꞌire i laona nume ni hoꞌo.

¹⁹ Taꞌe aana hai rodona, ensel a God e tahanie maa aana nume ni hoꞌo, e si naꞌoda i sinaha, oto ko si teꞌuri hunire,

²⁰ “Omu ke lae wau i Nume Maaꞌi Peine, oto omu ko haꞌarongoa mwala aana walu ola i sulie maurihe ienini.”

²¹ Kire tola i sulie nga taa ensel e unue, oto e dangi hoꞌowa kire lae taꞌau i Nume Maaꞌi Peine na kire ko aehota huni haꞌa-uusulie oto mwala. Oto Naꞌohana Mo Naꞌohai Pris na mo mwane ko esu peꞌie, kire lokoa mo rato ni mwane aana pulitaa lei-lei huni loko. Oto maholo ahutada kire mani hule, kire si uusungeꞌinie ngaeta mo mwane wau i nume ni hoꞌo huni toolea mai mo hurulaꞌaa i saana pulitaa lei-lei.

²² Taꞌe maholo mo ramo kire lai hule wau i nume ni hoꞌo, kire kaꞌa leesie ike loꞌu mo hurulaꞌaa. Oto kire aalihoꞌi, kire ko si teꞌuri hunie pulitaa ni lei-lei,

²³ “Melu leesie mo maa aana nume ni hoꞌo kire hono maꞌutaꞌa taane aani, na mo mwane kakakali kire ko kakalie taane mo maa. Taꞌe maholo melu tahanie mo maa, melu kaꞌa leesie loꞌu nga iini i laona nume ni hoꞌo.”

²⁴ Oto maholo naꞌohana pulitaa kakakali aana Nume Maaꞌi Peine na mo naꞌohai pris kire rongo urine kire ko si meni tohungei tolahiꞌe aana kire kaꞌa saie nga taa e rau aana mo hurulaꞌaa.

²⁵ Taꞌe ngaeta mwane e lae mai aana kele maholona oto ko teꞌuri hunire, “!Sei! Mo mwane nge omu neꞌire i laona nume ni hoꞌo, ikire mola taꞌau kire uure, kire ko haꞌa-uusulie mwala taꞌau i laona Nume Maaꞌi Peine oto molana.”

²⁶ Oto naꞌohana pulitaa kakakali na mo ramo ingeie, kire si lai tola aalihoꞌi aana mo hurulaꞌaa. Taꞌe kire kaꞌa dau ramo-ramoꞌa ike loꞌu huni tapolire, aana kire ko meꞌuteꞌinie mwala mwaanie kire uuꞌi maesire aani heu.

²⁷ Mo mwane kakakali kire toolea mai mo hurulaꞌaa, kire si haꞌa-uuresire i naꞌona pulitaa ni lei-lei. Oto Naꞌohana Mo Naꞌohai Pris e si ere aada uuri,

²⁸ “Melu tohungei ere hiitoꞌo oto huniꞌomu mwaanie omu haꞌa-uusulie loꞌu nga iini i sulie a mwane ngeena, taꞌe omu ko da haꞌa-uusulinge iꞌomu ko lae ahusie oto taꞌena nga leu i Jerusalem. Na omu ko haꞌaroroꞌaiꞌemeelu aana omu ko unue uri iꞌemeelu nge melu horo maesie a mwane ngeena.”

²⁹ Oto a Pita e ere oalana mo hurulaꞌaa e teꞌuri, “A God ni melu ko deu i sulie walana, mo iinoni haꞌike.

³⁰ Na iꞌomu nge omu horoꞌie a Jisas aana omu uie i lengine poꞌu-poꞌu, taꞌe God nge mo weuwaka i naꞌo kire palo-paloa nge e taꞌea loꞌu mwaanie maenga.

³¹ A God e taꞌea na e haꞌa-iiꞌosie aana naꞌohai iiꞌo-iiꞌoha i pwalo-pwalona hunie ke aalaha haahikie, na hunie ke haꞌa-uurikie, na hunie mwala ni Israel ke oonisae mwaanie mo oorahaꞌaanga ikire hunie a God ke saeꞌaasiꞌi mwaanire.

³² Na melu leesie walu ola nge a God e asuiꞌi ienini nge melu ko unu tahangaꞌiniꞌi huniꞌomu. Na e kaꞌa ike mola iꞌemeelu nge melu ko ere urine, taꞌe a Liꞌoa Maaꞌi noꞌone, iini nge a God e niie hunie ahutana mo iini ko deu i sulie walana.”

³³ Oto maholo mwala aana pulitaa ni lei-lei kire rongoa mo wala a Pita e unuꞌi ngeena, kire ko si tohungei saewasu hule aana kire ko sare horo maesie oto mo hurulaꞌaa.

³⁴ Taꞌe ngaeta mwane aana pulitaa ni lei-lei satana a Kamaliel e uure i lengi huni ere. A mwane ngeena ingeie aana pulitaa mo Parise na ingeie ngaeta haꞌa-uusuli noꞌone aana mo Haꞌatolanga, na hule aana mwala kire tohungei haꞌamaꞌu aana. E uure i lengi, oto e unue hunie mo mwane kakakali uri kire ke toolea mo hurulaꞌaa i sinaha mola hunie nga kele maholo.

³⁵ Oto purihaꞌana ko si teꞌuri hunie pulitaa ni lei-lei, “Mo mwane ni Israel, omu ke loꞌongaꞌi diana kaꞌu i sulie nga taa nge omu ko sare asuie aana mo mwane ngeena.

³⁶ Omu saie oto aana mo helisi e mango, a Tiudas e unue uri ingeie ngaeta naꞌohai mwane, oto lae-lae hai tangalai mwane ko lae loꞌu mei peꞌie. Taꞌe mae ni Rom kire horoꞌie, oto mo mwane ingeie kire tatanga hailiu mola na hari-huninge ingeie e kaꞌa oa ike.

³⁷ Oto lae-lae, aana maholo ni uusu-satanga, a Jiudas mwane ni Kalili e uure, na mwala hunge kire lulu noꞌone i sulie. Taꞌe kire horoꞌie noꞌone. Oto mo mwane kire lulu i sulie ngeena kire tatanga hailiu loꞌu mola.

³⁸ Oto aena mei olana, nge no ko unue huniꞌomu uri omu ke suꞌuri esuie loꞌu nga mei ola aana mo mwane ienini, taꞌe omu ke toliꞌaasire mola. Mala uri mo ola nge kire ko esuiꞌi ngeena nga mo ola ni iinoni mola, e saꞌa tewa na kire kei mango mola.

³⁹ Taꞌe mala uri mo ola ngeena e uure mwaanie a God, nge e aasa hunie omu kei uure honosire. Oto omu ke si saie mola uri omu ko sare haliwala peꞌie a God.”

⁴⁰ Oto pulitaa ni lei-lei kire rongo hunie uri kire saꞌa horo maesire ike aana maholona. Taꞌe aana kire ko sae-saewasulie ue mo hurulaꞌaa, kire si unue mo hurulaꞌaa ke aalihoꞌi loꞌu mei. Oto kire rapusire na kire ere hiitoꞌo loꞌu hunire uri kire ke suꞌuri unue loꞌu nga mei wala i sulie a Jisas. Oto purihaꞌana kire si toliꞌaasire.

⁴¹ Mo hurulaꞌaa kire lae mwaanie pulitaa ni lei-lei, kire ko tohungei ilenimwaꞌe oto liutaa, aena aana a Jisas e haataꞌinie uri kire ado taane huni sapesalu i tehulaꞌana satana.

⁴² Na kire ko haꞌa-uusulie mwala oto tarau i laona Nume Maaꞌi Peine na i laona mo nume ikire. Na kire ko lae peꞌi houleꞌinie Tataroha Diana i sulie a Jisas uri ingeie a Kraes, a Haꞌa-uuri nge a God e haiholotaꞌinie hunie ke uusungeꞌinie mai welumalau.