Palonga 4 - Tataroha Diana

A Pita Na Jon I Naꞌona Pulitaa Ni Lei-leilei

¹ Maholo a Pita na Jon kirerue ko ere-ere ue nana mwala, na ngaeta mo pris peꞌie naꞌohai mwane aana pulitaa ko kakakalie Nume Maaꞌi Peine, na ngaeta mo Sadiusi kire ko hule oto.

² Kire ko tohungei saewasulie e ro hurulaꞌaa aana kirerue ko haꞌa-uusulie mwala uri taꞌelaꞌinge a Jisas mwaanie maenga e haꞌawalaimoliꞌaa oto uri mo iini e mae kire kei haro mauri eelihoꞌi loꞌu.

³ Oto kire tapolirerue, kire ko neꞌirerue i laona nume ni hoꞌo loosie i maahuꞌo-huꞌo aena aana ko seulehi oto.

⁴ Taꞌe mo iini hunge nge kire rongoa walana e ro mwane, kire hiiwalaimoli oto aana. Na iidumilana mola mo mwane nge kire hiiwalaimoli aana a Jisas e lae hunie ola mala lime sinolai mwane.

⁵ Oto e dangi hoꞌowa, na ahutana mo mwane aana pulitaa lei-lei mo Jiu nge kire iiꞌo i Jerusalem mala mo naꞌohai mwane, na mo rato ni mwane, na mo haꞌa-uusuli aana mo Haꞌatolanga kire mani ruru oto.

⁶ Kire loko peꞌie a Naꞌohana Mo Naꞌohai Pris, a Anas, na peꞌie ngaeta mo iini loꞌu aana uluhe ingeie mala a Kaiapas na a Jon na a Aleksanda.

⁷ Oto kire toolea e ro mwane kire si haꞌa-uuresirerue i matolada na kire ko dolosi aadarue uuri, “?A tei ni e unue more ke asuie mei olana, wa aana nanamanga uri taa ni more asuie ngeena?”

⁸ A Pita mone e honu oto aana Liꞌoa Maaꞌi, e aalamire ko teꞌuri, “Mo aalaha ineu, iꞌomu mo iini nge omu ko naꞌona mo Jiu na iꞌomu mo rato ni mwane.

⁹ Omu ko dodolosi aamereꞌi i sulie mere aamasie mwane aeꞌaena e rarasi na omu ko sare saie mere haꞌa-uurie a mwane ngeena uri taa.

¹⁰ Oto no ko sare haꞌarongoꞌomu na oto ahutana mwala ni Israel, uri mwane ienini nge e uure oto i naꞌomiu, haꞌa-uurilana e lae mola aana satana a Jisas ni Nasaret na aana nanamanga ingeie. Na ingeie oto omu horoꞌie i lengine poꞌu-poꞌu, taꞌe a God e taꞌea loꞌu hunie ke mauri eelihoꞌi.

¹¹ Na a Jisas oto iini nge mo Uusu-uusu Maaꞌi e ere i sulie aana e teꞌuri, Hau nge iꞌomu kira tou-tohu nume omu leledie kaꞌu, e neꞌie oto poo-pootana nume eena. Sam 118:22

¹² Aana a Jisas mola e sai haꞌa-uurikie mwaanie mo oorahaꞌaa ikie, aena aana a God e kaꞌa niie ike loꞌu satana nga iini aaopa huni haꞌa-uurikie.”

¹³ Oto mo mwane aana pulitaa ni lei-lei ngeena kire ko si tohungei pangataꞌi aana kire leesie a Pita na Jon kirerue kaꞌa maꞌu loꞌu, maꞌalana uri kirerue e ro mei iinoni reu mola na kirerue kaꞌa sukulu diana ike. Na i leune nge kire si lio saie uri ikirerue ni kire lae-lae tarau peꞌie a Jisas holaꞌinaꞌo.

¹⁴ Na aana kire leesie mwane nge haꞌa-uurilana e lae e uure peꞌie a Pita na Jon, oto e aasa hunie kire kei unue loꞌu nga mei ola.

¹⁵ Oto kire si unue e oolu mwaena kire ke iisitaa i sinaha mwaanire hunie kire ke ere-ere loꞌu maraada i sulie leune.

¹⁶ Oto kire ko teꞌuri, “!Mwae! ?Nga taa ni kolu kei esuie aana e ro mwane ngeena? Aana ahutana mwala i Jerusalem kire saie oto uri e ro mwane ngeena kire asuie mei huꞌi-huꞌite oto paine, na e tohungei aasa hunie kolu kei unue uri e kaꞌa rau ike.

¹⁷ Taꞌe mwaanie nga mo iini hunge kire rongoa loꞌu haꞌa-uusulinge ngeena, nge kolu ke tohungei uure honosirerue na kolu ke haꞌapasulirerue oto mwaanie kire haꞌa-uusulie loꞌu nga mwala aana satana Jisas.”

¹⁸ Oto kire si unue kirerue ke lae loꞌu mei, na kire ko tohungei uure honosirerue oto mwaanie kire unue loꞌu nga mei wala wa kire ke haꞌa-uusulie loꞌu nga iini aana satana Jisas.

¹⁹ Taꞌe a Pita na Jon ko aalamire mola uuri, “Omu ke loꞌo-loꞌongaꞌi diana. ?Uri e diana mola i maana God huni heitohea walana na mere ke dau mola i sulie neꞌisaenga iꞌomu? !Haꞌike oto ooꞌoo!

²⁰ Aana ienini mere saꞌa rohu ike aani erenga i sulie nga taa mere leesie na mere rongoa oto maraamereꞌi.”

²¹ Mo mwane paine aana pulitaa ni lei-lei kire ko haꞌamauꞌorarue loꞌu liutaa, taꞌe lae-lae kire ko si heꞌi toliꞌaasirerue loꞌu hunie kirerue ke lae. Aana e aasa hunie kire kei leirerue aana kire lio saie uri mwala ko lae peꞌi lahea God oto haahie mei ola nge e raune.

²² Na mwane nge mei tolimaa e rau aana ngeena e liue oto e hai aawalai helisi.

Kira Hiiwalaimoli Kire Aarengaꞌi Mwaanie Kire Maꞌu

²³ Oto maholo kire toliꞌaasie a Pita na Jon hunie kire ke iiꞌo luhetaꞌi, kirerue si lae i saana pulitaa kira hiiwalaimoli na kire ko haꞌarongora oto aana mo ola nge mo naꞌohai pris na mo rato ni mwane kire unu-unuꞌi hunirerue.

²⁴ Oto maholo ahutada kire rongo urine, kire ko si meni aarea a God uuri, “Hahuꞌana Aalaha, iꞌoe oto o haꞌaholaa salo na aano huu na aasi na taꞌena nga ola i laloni.

²⁵ Iꞌoe nge o da Liꞌoa Maaꞌi hunie a weuwameelu a Deved koni-konihe iꞌoe hunie ke unue walamu aana e teꞌuri, ?E ue ni mo Aapoloa Aaopa ko tohungei saewasu? ?E ue ni mwala ngeena ko oalaꞌinie mo ola tataꞌala?

²⁶ Mo inemauri aana walumalau ienini kire ko deu aakau huni heiseuni. Na mo naꞌohai mwane aana walumalau kire ruru huni seunie a Iawe na a Haꞌa-uuri nge e lio-hilisie. Sam 2:1-2

²⁷ Na e toꞌohuu oto, aana a Herod Antipas peꞌie mo Israel, na a Pontias Paelat peꞌie mo Aapoloa Aaopa kire mani esu loko-loko huni horoꞌie a Jisas, koni-konihe maaꞌi iꞌoe nge o lio hilisie oto waite hunie ke neꞌie a Kraes.

²⁸ Kire loko urine nge kire hahuꞌei deu oto mola i sulie neꞌisaenga iꞌoe. Aana nanamanga iꞌoe nge o unue oto wau i naꞌo uri walu ola ienini kei reu.

²⁹ Na oto ie, Aalaha, o ke lio-lio diana aana mo naꞌohai mwane nge kire ko haꞌamauꞌoꞌemeelu ienini. O ke peꞌiꞌemeelu, mo koni-konihe iꞌoe mwaanie melu meꞌu ni houleꞌinie walamu.

³⁰ Na o ke haataꞌinie nanamanga iꞌoe huni haꞌa-uurie mo iini ko mweri, na huni esuie mo huꞌi-huꞌite, na mo tolimaa aana satana Jisas koni-konihe maaꞌi iꞌoe.”

³¹ Maholo kire aarengaꞌi mango, nge nume kire loko i laona ko si eenu-eenuleꞌi heiliu, na kire si honu oto aana Liꞌoa Maaꞌi. Oto purihaꞌana kire ko si tohungei aꞌailaꞌa loꞌu liutaa ni houleꞌinie walana God.

Kira Hiiwalaimoli Kire Peꞌire Hailiu

³² Oto ahutana mo iini kire hiiwalaimoli kire si meni neꞌisae tararuru i sulie walu ola. Nga iini e kaꞌa loꞌongaꞌinie ike uri mo ola e toꞌo aani uri mo ola oto ingeie maraana, taꞌe mo ola nge nga iini e toꞌo aani mo ola ahutada mango.

³³ Na mo hurulaꞌaa ko si houleꞌinie Aalaha ikie peꞌie nanamanga uri e mauri eelihoꞌi toꞌohuu mwaanie maenga. Na a God e si haꞌadianaꞌaa ahutana soihaadaꞌinge.

³⁴ Oto nga iini aana pulitaa ikire ngeena e kaꞌa tola talea ike loꞌu nga mei ola, aena aana mo iini nge kire toꞌo aana mo mei aano wa nga mo nume kire haꞌaholingeꞌiniꞌi. Oto mei toꞌoha nge kire tarie ngeena kire si niiꞌi

³⁵ hunie mo hurulaꞌaa. Oto mo hurulaꞌaa kire toolea mei toꞌoha ngeena, kire si haꞌa-adoa kira maitale i laona soihaadaꞌinge aana.

³⁶ Ngaeta mwane e nii urine oto a Josep, mwane aana komu a Livae nge e uure mai mwaanie mala-malau i Saepras. Mo hurulaꞌaa ko haa-haaraꞌinie aana a Banabas, loꞌongaꞌinge aana uri “Kale ni Haꞌasaedodo.”

³⁷ Ingeie e haꞌaholingeꞌinie ngaeta mei aano ingeie, oto e toolea mei toꞌoha aana, e si lai mai niie hunie mo hurulaꞌaa.