Palonga 28 - Tataroha Diana

A Pol E Iiꞌo Aana Mala-malau I Molta

¹ Maholo melu lai hule sapemawa oto i oone, nge melu ko si saie uri mala-malau ngeena satana i Molta.

² Na mwala aana mala-malau ngeena kire tohungei peꞌiꞌemeelu aani lio i sulilameelu. Maholona mone ko nemo na e tohungei wawai, oto kire rurue dunge hunie melu ke rakani.

³ Oto a Pol e lai soꞌohie noꞌone lokoi ei, na e lai neꞌie i laona dunge. Taꞌe ngaeta mwaa ala-ala e aakataa i sinaha mwaanie lokoi ei ngeena, aena aana dunge ko madorohie, na ko ala maꞌutaꞌa oto aana kiꞌine a Pol.

⁴ Maholo mwala aana mala-malau ngeena kire leesie mwaa ala-ala e uꞌu aana kiꞌine a Pol, oto kire ko ere-ere uuri hunire hailiu, “Mwane horo-horo ohe ni ngeena, kaꞌu maꞌalana kire hule sapemawa oto i oone mwaanie aasi, taꞌe god aana suꞌu-olanga ko sare horoꞌie loꞌu ngeena.”

⁵ Oto a Pol e tataaꞌinie mola kiꞌine wau i hahona dunge, oto mwaa ala-ala ngeena e teke mola i laona dunge, taꞌe nga mei ola kaꞌa rau ike loꞌu aana a Pol.

⁶ Oto mo mwane aana mala-malau ngeena kire ko maa-maaꞌoohi mola huni leesie sapena a Pol kei uupu wa huni leesie mola ko domu aana ko mae oto. Taꞌe kire lio-lio i sulie ko tewa oto, na nga mei ola kaꞌa rau-reu aana. Oto kire ko heꞌi loꞌongaꞌi aaopa loꞌu na kire ko teꞌuri, “!Ohe a mwane ie ngaeta iini aana mo god ni ngeena!”

⁷ Na aalaha aana mala-malau ngeena satana a Pablias, na e toꞌo aana hohola mola karaꞌinie leu melu iiꞌo aana ngeena. E unue melu ke lai iiꞌo kaꞌu weu i nume ingeie, na e oolu hei dinge nge melu iiꞌo peꞌie na e tohungei lio i suli diana aameelu.

⁸ Taꞌe aana maholona aamana a Pablias ko tohungei mataꞌi peꞌie iielae, na e eno mola i lengine tahe ingeie. A Pol e sili i saana hai duru ingeie, oto e hele wau i sapena peꞌie aarengaꞌinge hunie ke awaa loꞌu, na e rau oto urine hunie.

⁹ Oto purine mei ola ngeena e rau, ahutana mwala nge kire ko mataꞌi aana mala-malau ngeena kire lae mai saana Pol na e haꞌa-uurire noꞌone.

¹⁰ Na kire niie mo niinge hunge nameelu, na lae-lae maholo melu deu aakau huni lae mwaanire, kire ko heꞌi niie loꞌu mo ola nge melu saetoꞌo aani hunie laenga iꞌemeelu ngeena.

A Pol E Lai Hule I Rom

¹¹ Purine oolu waro-waro e mango melu si lae mwaanie mala-malau ngeena aana ngaeta haka nge e oꞌoꞌo kaꞌu mola i leune aana mo waro-waro ko mawa ngeena. Haka ngeena e uure mwaanie huilume i Aleksandria, na satana “E ro iu god.”

¹² Melu lai hule aana huilume i Sirakius, na melu iiꞌo loꞌu i leune hunie e oolu hei dinge.

¹³ Oto melu lalaaꞌinie loꞌu pwana, na melu aatoholo oto hule wau aana huilume i Rejiam. Na hai dinge i purine, iiru ko iiru mei mwaanie pwalo-pwalona pwaalana sato, na e taꞌa-taꞌa hai dinge loꞌu mola i puri nge melu si lihu mola i sulie mala-malau hunie suꞌu i Piutiolae.

¹⁴ Aana huilume ngeena nge melu leesie ngaeta mo mwaasine aana hiiwalaimolinge na kire saetoꞌo aana melu ke iiꞌo loꞌu peꞌire hunie e hiu hei dinge. Oto purihaꞌana nge melu si liu mola i tala hunie huilume paine i Rom.

¹⁵ Oto mo mwaasine aana hiiwalaimolinge wau i Rom kire rongo tarohana uri melu ko lae oto wau. Oto ngaeta mo iini aada kire si lae mai maaꞌoohiꞌemeelu aana leu ni uusiꞌe i Apias, na ngaeta mo iini aana leu kire haaraꞌinie aana “Oolu Nume Ni Awataa.” Maholo a Pol e leesire ko si tohungei ilenimwaꞌe, na ko ere ni paalahenga oto hunie a God.

A Pol E Iiꞌo I Nume Ni Hoꞌo I Rom

¹⁶ Maholo melu hule oto wau aana huilume paine i Rom, kire kaꞌa aasie ike a Pol i laona nume ni hoꞌo, taꞌe kire toliꞌaasie hunie a Pol ke iiꞌo mola maraana aana nga nume. Taꞌe ngaeta ramo ko oꞌoꞌo taane tarau peꞌie hunie ke kakakalie.

¹⁷ Oto purine e oolu hei dinge e mango aana a Pol e hule wau i Rom, e lokoa mo rato ni mwane ni Jiu huni ere-ere peꞌire. Maholo kire loko mango ko si teꞌuri hunire, “Maeni eesiku ni Israel, nou kaꞌa dau aaelasie ike nga mei ola aana mwala ikolu wa ne ke dau aaelasie nga mei ola aana tolahana mo weuwaka. Taꞌe i Jerusalem kire tapolieu mola na kire niieu i nimana mo Rom.

¹⁸ Oto mo mwane ni Rom kire tooleau i laona leinge, taꞌe kire ko sare luhesieu mola hunie ne ke iiꞌo luhetaꞌi sulie kire kaꞌa leesie ike nga mei ola ne ke dau huꞌisie hunie horoꞌileku ke lae i tehulaꞌana.

¹⁹ Taꞌe ahutana mo rato ni Jiu i Jerusalem kire tohungei sereꞌinie ne ke iiꞌo luhetaꞌi urine, oto aena mei olana nge nou sukaa mola Inemauri Peine ni Rom hunie ke leieu. Taꞌe nou saie nga mei ola ne ke haliwala peꞌie mwala ineu haahie haꞌike oto ooꞌoo.

²⁰ Oto aena mei olana nge nou lokoꞌomu mei hunie ne ke ere i sulie peꞌiꞌomu. Ineu nou hiiwalaimoli aana a Kraes, iini nge ahutaka ikie mo Israel kie mani hiiwalaimoli aana uri kei haro haꞌa-uurikie. Oto aena mei olana nge hoꞌosileku e lae peꞌie iieli heu ienini.”

²¹ Oto kire aalamie kire ko teꞌuri, “Nga uusu-uusu ke uure aana poꞌo ni henue i Jiudia hunie ke ere i suliꞌo kaꞌa hule ike aameelu, na mo mwane nge kire hule i leu mwaanie i Jiudia kire kaꞌa unue ike nga mei tataroha i suliꞌo wa ke haliwala peꞌiꞌo.

²² Na melu ko tohungei sare rongoa loꞌongaꞌinge iꞌoe sulie mwala aana taꞌena nga leu kire ko tohungei ere aaelasie hiiwalaimolinge aaopa ngeena.”

²³ Oto kire lio hilisie hai dinge kire kei loko loꞌu mei saana Pol wau i nume nge ko oꞌoꞌo aana, na aana hai dingena, mwala oto hunge kire loko. A Pol ko lado luhesie Aalahanga a God hunie ahutana mwala, aehota oto i maahuꞌo-huꞌo lai hule i seulehi. Na ko lado luhesie noꞌone mo wala i sulie a Jisas i laona mo Haꞌatolanga a Mosis na i laona mo Uusu-uusu Maaꞌi mo Propet. Na ko deu aahonga noꞌone huni huꞌisie saeda hunie kire ke aehota hiiwalaimoli oto aana a Jisas.

²⁴ Oto ngaeta mo iini ko hiiwalaimoli oto aana, taꞌe ngaeta mo iini haꞌike loꞌu.

²⁵ Oto maholo kire oopa hailiu, kire ko si lai da loꞌu wala hunire hailiu, taꞌe i naꞌona kire si oopa a Pol e unue mei wala ooreta ingeie e teꞌuri, “Liꞌoa Maaꞌi e tohungei ere toꞌohuu oto hunie mo weuwemiu aana a Propet Aesaea maholo e teꞌuri,

²⁶ Lae i saana mwala na o ke teꞌuri hunire, ‘Maꞌalana omu ke rongo-rongo kaꞌu i sulie erenga ineu, taꞌe omu saꞌa rongo saie ike nga mei ola. Wa maꞌalana omu ke lio-lio kaꞌu i sulie asunge ineu, taꞌe omu saꞌa lio saie ike nga mei ola.

²⁷ Sulie mwala ienini saeda e popono oto, na kire ponosie mola aalingada, na kire ulue mola maada. Haꞌalaa kire sai lio sai ola taane, na kire sai rongo sai ola taane, na kire sai loꞌongaꞌi saie taane walu ola. Oto kire sai ooli mola mai takoieu hunie ne ke haꞌa-uurire.’ ” Aesaea 6:9-10

²⁸ Na a Pol e teꞌuri loꞌu, “Oto aena mei olana, nge saeku hunie omu ke sai diana aana uri a God ko sare haꞌa-uurie noꞌone mo Aapoloa Aaopa, na kire kei rongo taane hunie.”

²⁹

³⁰ Na a Pol e iiꞌo hunie e ro halisi heꞌileku aana nume nge ko holi-holi haahie ngeena. E tolakonie taꞌena nga iini ko sare lae mai leesie,

³¹ na e kaꞌa maꞌu loꞌu huni laeliwala i sulie Aalahanga a God. Ko haꞌa-uusulie mola mwala aana taꞌena nga ola i sulie a Jisas, Aalaha ikie, na nga iini e kaꞌa uure honosie loꞌu erenga ingeie.