Palonga 27 - Tataroha Diana

A Pol E Lae Aana Haka Hunie I Rom

¹ Maholo kire unue uri melu kei lae aana haka hunie poꞌo ni henue i Itali, kire si niie a Pol na ngaeta mo mwane nge kire ko iiꞌo i laona nume ni hoꞌo noꞌone hunie ngaeta ramo paine haahie nga tangalai ramo hunie ke kakalire. Ramo ngeena satana a Jiulias na ingeie aana pulitaa ni ramo kire haaraꞌinie “Pulitaa ni Ramo a Inemauri Peine ni Rom.”

² Ngaeta haka e uure aana huilume i Adramitiam, na ko deu aakau loꞌu huni lae aana ngaeta mo suꞌu aana poꞌo ni henue i Esia. Oto melu ko taꞌe aana haka ngeena peꞌie a Aristakas ngaeta mwane aana huilume i Tesalonaeka aana poꞌo ni henue i Masedonia aana ingeie ko hekusiꞌemeelu noꞌone. Melu meni taꞌe oto, na kire ko lalaaꞌinie oto pwana.

³ Oto aana dinge i puri nge melu si lai aarapuu aana huilume i Saedon. A Jiulias mone ko aamasie a Pol, oto e toliꞌaasie mola ke lai leesie mo malahune wau i leune hunie kire ke peꞌie aana taꞌena nga mei ola e saetoꞌo aana.

⁴ Oto melu lae mwaanie i Saedon na aena iiru ko iiru honosiꞌemeelu, nge melu lai liu aana ngaeta aapa aana mala-malau i Saepras nge iiru e kele rako aana.

⁵ Melu liu oto poꞌo i eesi aana e ro poꞌo ni henue i Silisia na i Pampilia, oto melu si lai aarapuu i oone aana huilume i Maera aana poꞌo ni henue i Lisia.

⁶ I leune nge a Jiulias e leesie ngaeta haka e uure i Aleksandria na ko lae hunie i Itali. Oto poro paine haahie tangalai ramo ngeena e unue melu ke lae loꞌu aana haka ngeena.

⁷ Na mo dinge hunge melu ko haro kele lae oto mola peꞌi esu hiitoꞌo huni lai aarapuu karaꞌinie huilume i Nidas. Na aena aana melu ko suehie mone ooru, oto melu eeliꞌu mola hunie mala-malau i Krit, hunie melu ke liu i purine mala-malau mwaanie ooru, na melu hule oto aana aapa hatarie i Salmoni.

⁸ Melu ko lihu oto mola i oone karaꞌinie mala-malau, taꞌe maꞌalana e urine na e aasa hunie melu kei lae takoie leu melu ko sare lae aana. Melu esu oto hiitoꞌo na lae-lae melu hule aana suꞌu kire haaraꞌinie “Suꞌu Diana” karaꞌinie huilume i Lasia.

⁹ Oto mo dinge hunge kire waetaꞌi mola urine, na aena aana Houlaa Ni Haꞌarereꞌanga Mwaanie Oorahaꞌaa e liu oto, melu saie uri e hule oto aana mo waro-waro aaela hunie aalidanga aena aana mawa e paine. Oto a Pol ko teꞌuri hunire,

¹⁰ “Mo mwane, mala uri kolu kei lae loꞌu, nge nou leesie laenga ikolu ienini e saꞌa diana ike, aana nou leesie uri haka na ludaa i laona kire kei meni eiꞌaa mango. Na hule aana ngaeta mo iini aakaelu kire kei mae noꞌone.”

¹¹ Taꞌe poro paine haahie tangalai ramo e kaꞌa sare rongo ike hunie a Pol, taꞌe ko rongo mola hunie poro paine aana haka na mwane nge e toꞌo aana haka ngeena.

¹² Na aena aana aasi ko mawa mola aana mo waro-waro ngeena, na suꞌu ngeena e kaꞌa diana ike huni iiꞌo aana, oto hungelana mwala saeda mola hunie melu ke lae taraꞌasi. Kire saetoꞌo aana melu ke dau aahonga huni lae hunie suꞌu i Piniks huni iiꞌo kohi wau i leune aana maholo daitaꞌaa. Aana suꞌu ngeena ngaeta suꞌu diana i Krit aana e saro takoie suulana sato.

Mawasidengi E Hite Aana Haka

¹³ Oto maholo kele mei iiru mwai-mwei ko aehota iiru oto uure mai mwaanie pwalo-pwalona pwaalana sato, nge kire ko si loꞌongaꞌinie uri nga taa kire hari hunie e rau oto na kire toꞌo aana maholo huni lae iiꞌo koni-koni aana suu kohi. Oto kire waꞌinie hau ni hune, na kire ko lae oto mola i sulie oone aana mala-malau i Krit ngeena.

¹⁴ E kaꞌa tewa na painehaꞌana mawasidengi ko iiru oto mai mwaanie mau-meuline pwaalana sato na ko iiruheꞌinie haka oto i eesi mwaanie mala-malau.

¹⁵ Oto melu toliꞌaasie mola iiru ke iiruheꞌiniꞌemeelu, aana e aasa oto hunie melu kei suehie iiru, aana iiru e waꞌu oto hiitoꞌo.

¹⁶ Maholo melu lae liu i purine kele mala-malau mwai-mwei i Kaoda mwaanie iiru, kire dau kasoa waꞌinilana iiola aana haka hunie ke iiꞌo lilikoni

¹⁷ poi laona haka, na lae-lae kire haro waꞌinie taane. Oto kire roroꞌie loꞌu haka aani walo hunie ke maꞌutaꞌa. Na aena aana iiru e paine, oto kire ko maarara mwaanie haka e lai aape i lengine mo poute ni oone karaꞌinie poꞌo ni henue i Libia. Oto kire aasie mo heu ni hune i eesi aana leu kokoro na ooru ko si iiru-iiruheꞌiniꞌemeelu mola.

¹⁸ Mawasidengi e tohungei hite aameelu lae-lae hule aana kire ko aasie ngaeta aapa aana ludaa oto i eesi.

¹⁹ Oto aana oolune nga hai dinge kire ko aasie loꞌu ngaeta mo ola kire ko euꞌesu eeni i laona haka i eesi.

²⁰ Na melu kaꞌa leesie loꞌu sato wa mo heeꞌu hunie mo dinge hunge. Na aana iiru ko peine oto mola tarau, melu ko meni loꞌongaꞌinie mola uri nga iini e saꞌa mauri loꞌu.

²¹ Melu kaꞌa ngau loꞌu hunie mo dinge hunge, oto a Pol e si uure i matolameelu ko teꞌuri, “Mo mwane, mala uri omu ke holaꞌi rongo oto hunie walaku hunie kolu ke suꞌuri lae mwaanie mala-malau i Krit, haꞌalaa kolu kaꞌa siꞌohaꞌa ike urine na kolu kaꞌa tekelaꞌinie ike nga mei ola.

²² Taꞌe siꞌiri no ko unue huniꞌomu uri omu ke suꞌuri meꞌu wa omu ke tolahiꞌe. Nga iini aakaelu e saꞌa mae ike taꞌe haka mola kei eiꞌaa.

²³ Aana nga rodo, ensel a God ineu nge no ko palo-paloa e hule aaku,

²⁴ oto ko teꞌuri, ‘Suꞌuri meꞌu Pol. O kei haro lai uure i naona Inemauri Peine ni Rom. Na aana a God e rongo hunie aarengaꞌinge iꞌoe, oto ke si haꞌa-uurie ahutana mwala nge kire ko lae peꞌiꞌo ngeena.’

²⁵ Oto mo mwane, omu ke suꞌuri meꞌu. Nou hiiwalaimoli a God kei esuie mola walu ola oto mala e unuꞌi hunieu.

²⁶ Taꞌe maꞌalana ke urine, kolu kei haro lai aape mola aana nga mala-malau.”

²⁷ Na e hule i rodo aana aawalai hei dinge mwana hai nge iiru ko talei iiru-iiruheꞌiniꞌemeelu mola ue i laona Aasi i Mediteria. Oto i upui rodo, mo mwane aana haka kire saie uri melu ko karaꞌinie oto ngaeta mala-malau.

²⁸ Oto kire toolea totoho na kire ko totohoa oto kokorohaꞌana aasi. Kire totohoa na e hule aana e ro aawalai tahanga haahuu. Oto kire ko maaꞌoohi loꞌu hunie kele maholo oꞌoruꞌe, kire ko totohoa loꞌu na e hule oto aana aawalai tahanga mwana lime.

²⁹ Kire ko maarara mwaanie haka e lai aape i lengine nga mo heu, oto kire haꞌareredea e hai hau ni hune i purine haka. Oto kire si iiꞌo mola peꞌie aarengaꞌinge hunie ke dangi lau-leu.

³⁰ Ngaeta mo mwane auꞌesu aana haka mone kire ko sare tahi oto mwaanie haka, oto kire dau huni haꞌasihoa iiola aana haka, na kire ko si eero uri kire ko lae huni neꞌie ngaeta mo heu ni hune loꞌu taꞌau i naꞌona haka.

³¹ Taꞌe a Pol ko teꞌuri hunie ramo paine haahie tangalai ramo ngeena na hunie mo ramo peꞌie, “Mala uri mo mwane aana haka kire kaꞌa iiꞌo peꞌie haka, nge a God e saꞌa roroꞌa haꞌa-uuriꞌomu ike.”

³² Oto mo ramo kire oloa mola mo walo nge kire pwasuꞌi aana iiola hunie iiola ke aahesie.

³³ Oto hatari dengi a Pol ko si deu rarahiꞌemeelu uri melu ke ngau na ko teꞌuri, “Aawalai hei dinge mwana hai e mango oto na omu kaꞌa hikana nga mei ngeulaa.

³⁴ Oto no ko unue huniꞌomu uri omu ke ngau keꞌu hunie sapemiu ke aꞌailaꞌa mwaanie omu mae. Na omu ke saie uri nga iini eemiu e saꞌa roroꞌa malakaꞌa ike, taꞌe omu kei meni iiꞌo sapemawa mola.”

³⁵ Oto a Pol e ere urine mango, e hele aana mei ngeulaa, ko si ere ni paalahenga hunie a God oto i naꞌomeelu, na ko nisie na ko ngeu oto.

³⁶ Saemeelu e mani dodo oto, na melu ko si meni ngeu oto eena.

³⁷ Ahutana mwala nge melu iiꞌo i laona haka ngeena melu hule aana e ro tangalai iinoni peꞌie hiu aawala mwana oono.

³⁸ Oto maholo melu ngeu mango, nge melu ko si aa mangoa ludaa aani wit i eesi hunie haka ke mwa-mwate.

Haka E Aape

³⁹ Oto e dangi hoꞌowa na nga iini e kaꞌa lio saie loꞌu hanue melu ko aarapuu aana. Taꞌe melu ko leesie mola ngaeta suꞌu na mei oone aana. Oto mo mwane aana haka ko si loꞌongaꞌinie uri ohe kire sai toolea haka ke lae aapengaꞌinire i oone aana suꞌu ngeena.

⁴⁰ Aena urine, e ro hote paine nge kire ko haꞌa-haꞌa-aaliꞌue haka aani kire luhesiꞌi oto huni esu loꞌu eeni, na kire ko lohea oto noꞌone pwana mwai-mwei taꞌau i naꞌona haka. Oto kire si oloa mola mo walo aana e hai heu ni hune, na kire toliꞌaasiꞌi mola i eesi.

⁴¹ Taꞌe iiru e iiruheꞌinie mola haka, oto e lai aape mola i lengine ngaeta poute ni oone na naꞌona haka e tari, hule aana e kaꞌa sai ada loꞌu. Na mo naho ko makasie oto purine haka.

⁴² Mo ramo kire ko meni neꞌisae tararuru oto huni horoꞌie mo mwane nge kire ko kakalire mwaanie kire oolo i oone na kire tahi.

⁴³ Taꞌe ramo paine haahie tangalai ramo ngeena ko sare haꞌa-uurie a Pol, oto e uure honosie mo ramo mwaanie kire asuie mei neꞌisaenga ngeena. Taꞌe e unue mola mo iini nge kire sai oolo, kire ke husu mola i eesi hunie kire ke oolo i oone.

⁴⁴ Na mo iini nge kire oore kire ke hele aana mo reu-reu nge naho e makasiꞌi mwaanie haka na taꞌena nga mei ola aana haka hunie kire ke oolo aani i oone. Oto melu lae urine, na melu meni lai hule sapemawa i oone, na hule aana nga iini e kaꞌa mae ike.