Palonga 26 - Tataroha Diana

A Pol E Ere-ere I Naꞌona Akripa Inemauri

¹ Oto a Akripa Inemauri ko teꞌuri hunie a Pol, “No ko toliꞌaasiꞌo oto hunie o ke ere-ere honosiꞌo maraamu.” Oto a Pol e salo haahie mwala hunie kire ke pwaarongo hunie, ko si teꞌuri,

² “Akripa Inemauri, no ko tohungei ilenimwaꞌe aana nou toꞌo aana kele maholoi sato ienini huni uure i naꞌomu siꞌiri huni talo aasie mo wala nge mo rato ni Jiu kire ko unuꞌi takoieu.

³ Na no ko ilenimwaꞌe noꞌone sulie iꞌoe ngaeta mwane nge o saenanau i sulie tolahameelu mo Jiu, na o saenanau noꞌone i sulie walu ola nge melu ko haꞌa-haꞌa-ere haahiꞌi. Oto no ko eitanaiꞌo hunie o ke pwaarongo kaꞌu i sulie ere-erenga ineu.

⁴ “Ahutana mo Jiu kire mani saie tolahai ola nge nou oꞌoꞌo aana i naꞌo, aehota oto aana maholo nou neꞌi mwela ue peꞌie mwala ineu, lai hule aana maholo nou hoꞌalaꞌi hunie i Jerusalem.

⁵ Kire saieu taane oto uure mai, na mala uri kire ko mwaꞌe-mwaꞌe ni ere, kire sai unue mola uri ineu ngaeta iini oto aana mo tohungana mo Parise. Nou aehota lulu i sulie tolahada oto uure i mwei-mweihaꞌaku, na poꞌo ni iinoni iꞌemeelu ngeena melu tohungei uure aꞌailaꞌa huni lulu i sulie mo Haꞌatolanga a God loꞌu liutaa aana ngaeta mwala.

⁶ Ineu, nou hiiwalaimoli aana mei heiholotaꞌinge nge a God e asuie peꞌie mo weuwemami oto i naꞌo, na aena mei olana mola nge kire ko sare leieu haahie siꞌiri ie.

⁷ Taꞌe ahutamami, emi ko meni norutoꞌo mola aana taꞌa-taꞌa mei heiholotaꞌinge ngeena. Aawalai komu mwana rue iꞌemi mo Jiu maꞌalana rodo na emi ko palo-paloa mola a God aena aana emi ko maaꞌoohi susutoꞌo mola loosie mei heiholotaꞌinge ngeena kei oa. Oto Poro paine, aena mei olana nge mo rato ni mwane kire ko maaleledieu haahie siꞌiri, sulie nou tohungei hiiwalaimoli aana mei heiholotaꞌinge ngeena e toꞌohuu.

⁸ ?Oto loꞌongaꞌinge iꞌomu e uri taa? ?Uri omu ko loꞌo-loꞌongaꞌi uri e aasa hunie a God kei taꞌea loꞌu mo iini e mae oto? ?Aana e ue kaꞌu omu ko loꞌongaꞌi takalo urine?

⁹ “E toꞌohuu taane aana holaꞌinaꞌo, ineu noꞌone nou deu aahonga huni esuie mo ola huni waelie satana a Jisas ni Nasaret.

¹⁰ Na nga taa nge nou esuie taꞌau i Jerusalem ni ngeena. Nou toolea nanamanga mwaanie mo naꞌohai pris huni neꞌie hungelana mo iini maaꞌi i laona nume ni hoꞌo. Na maholo leilada e lae hunie maenga, ineu noꞌone nou unue uri e malisine kire ke mae.

¹¹ Na nou lae tarau noꞌone i laona ahutana mo nume ni palo-palo aana taꞌena nga leu huni haꞌaloire na huni da kire ke ere aaelasie loꞌu a Jisas. Saewasunge ineu e tohungei peine oto hule aana nou lae noꞌone aana ngaeta mo poꞌo ni henue aaopa huni haꞌaloire.”

A Pol E Ere I Sulie Maholo E Aehota Hiiwalaimoli

¹² Oto a Pol ko heꞌi ere loꞌu uuri, “Oto aena mei olana nge nou lae noꞌone wau i Damaskas aena aana mo naꞌohai pris kire uusungeꞌinieu na kire niie nanamanga hunieu huni lai esuie mei olana wau aana huilume ngeena.

¹³ Oto Poro paine, maholo no ko lae i sulie tala i upui aatowaa, na no ko leesie raa-raa hule aana e raa liue loꞌu sato. E raa kali-kelieu na mo mwane nge kire hakusieu.

¹⁴ Oto ahutameelu melu meni domu i aano, na no ko rongoa oto mei wala ko ere aana tohungana erenga mo Jiu ko teꞌuri, ‘!Sol, Sol! ?E ue ni o ko teungeꞌinieu? O ko tohungei haꞌaliꞌoiꞌo mola maraamu ni ngeena aana o ko lae huꞌisie loꞌongaꞌinge ineu urine.’

¹⁵ “Oto no ko dolosi uuri, ‘?Iꞌoe a tei ni ngeena, Aalaha?’ “Oto ko aalamieu ko teꞌuri, ‘Ineu a Jisas, iini nge o ko teungeꞌinie.

¹⁶ O ke taꞌelaꞌi, na o ke uure hala-hala. No ko haataꞌi huniꞌo siꞌiri hunie o ke neꞌie koni-konihe ineu. O ke laengaꞌinie nga taa o ko leesie aaku siꞌiri, na nga taa ne kei haataꞌinie loꞌu eemu mai puri.

¹⁷ Maholo mwala iꞌoe mo Jiu wa mo Aapoloa Aaopa kei sare horo maesiꞌo, nge ne kei haꞌa-uuriꞌo taane mwaanire. Oto no ko uusungeꞌiniꞌo oto takoie mo Aapoloa Aaopa

¹⁸ hunie o ke tahanie maada hunie kire ke leesie matapwanga na mwaanie kire iiꞌo loꞌu i laona rodohono. Na hunie kire ke lae takoie a God mwaanie nanamanga a Satan. Na maholo kire kei hiiwalaimoli eeku, a God kei saeꞌaasie mo oorahaꞌaanga ikire na kire kei iiꞌo oto peꞌie mo iini nge a God e lio hilisire.’

¹⁹ “Oto Akripa Inemauri, nou kaꞌa dau huꞌisie ike walu ola nge a God e haataꞌiniꞌi eeku.

²⁰ Taꞌe no ko tarohaꞌinie uri mwala ke aaliꞌu mwaanie mo oorahaꞌaanga ikire, na kire ke aaliꞌu takoie a God, na kire ke lae i sulie tala diana huni haataꞌinie uri kire oonisae toꞌohuu. Holaꞌinaꞌo, nou holaꞌi lae i saana mwala ni Jiu nge kire ko oꞌoꞌo i Damaskas na i Jerusalem na taꞌena nga leu i Israel, oto purihaꞌana nge nou si lae loꞌu weu i saana mo Aapoloa Aaopa.

²¹ Oto aena mei olana nge mo rato ni mwane ni Jiu kire tapolieu taꞌau i laona Nume Maaꞌi Peine i Jerusalem huni horo maesieu.

²² Taꞌe a God ko peꞌieu mola tarau hule mai siꞌiri. Oto aena urinena nou sai uure mola ni laeliwala nana mo iini mwai-mwei lae hule aana mo iini peine. Nou kaꞌa unue ike nga mei ola aaopa mwaanie nga taa mo propet na a Mosis kire unue kaꞌu kei reu.

²³ Ikire noꞌone kire unue uri a Haꞌa-uuri nge a God e haiholotaꞌinie kei lae mai kei sapesalu hule aana maenga, na aana ingeie oto eetana nga iini kei holaꞌi taꞌelaꞌi eelihoꞌi mwaanie maenga, ingeie oto ke si tarohaꞌinie raa-raa a God hunie mo Jiu na mo Aapoloa Aaopa.”

²⁴ Maholo a Pol ko ere-ere ue, a Festas ko tea oto paine ko teꞌuri, “!Pol, o ko hero-hero ni ngeena! Aena o ko heitalea saenanaunge hiitoꞌo mwaanie mo uusu-uusu nge o ko hero-hero urine.”

²⁵ Oto a Pol e aalamie ko teꞌuri, “Poro paine Festas, nou kaꞌa ere hero-heroꞌa ike, taꞌe no ko ere toꞌohuu, na e malisine mwala kei hiiwalaimoli eeku.

²⁶ A Akripa Inemauri e sai mangoa taane walu ola i sulie a Jisas ienini, na nou sai ere haadaꞌi mola noꞌone hunie urine. Na nou saie uri e rongoa taane tataroha i sulie walu ola ienini maholo kire rau, aena aana walu ola ienini kaꞌa rau mumuni ike.”

²⁷ Oto a Pol ko teꞌuri hunie inemauri, “Akripa Inemauri, nou saie iꞌoe noꞌone o hiiwalaimoli aana walu ola nge mo propet kire uusuꞌi.”

²⁸ Oto a Akripa Inemauri ko teꞌuri, “?Uri o ko loꞌongaꞌi o sai huꞌisie manataku hunie ne ke hiiwalaimoli oto mola aana kele maholoi sato oꞌoruꞌe urini?”

²⁹ Oto a Pol ko teꞌuri, “Maꞌalana kele maholoi sato e oꞌoruꞌe wa ke tewa loꞌu, taꞌe no ko aare-aarea God hunie mwala nge omu ko pwaarongo hunieu siꞌiri omu ke mani sada peꞌieu. Taꞌe hoꞌosilemiu aani iieli heu haꞌalaa nge nou sereꞌinie ke rau eemiu.”

³⁰ Oto aana maholona, a Akripa Inemauri e uure i lengi. Oto maholo kire leesie urine, a Benis, na a Festas Aalaha Paine, na ahutana mwala kire mani uure i lengi noꞌone,

³¹ na kire ko meni lae oto i sinaha. Na kire ko lai ere-ere oto hunire hailiu kire ko teꞌuri, “A mwane ngeena e kaꞌa asuie ike nga mei ola hunie horoꞌilana ke lae i tehulaꞌana, na e kaꞌa malisine loꞌu ke iiꞌo i nume ni hoꞌo.”

³² Oto a Akripa Inemauri ko teꞌuri loꞌu hunie a Festas, “Mala uri a mwane ngeena ke suꞌuri haaraie Inemauri Peine ni Rom hunie ke leie ere-erenga ingeie, haꞌalaa kolu sai toliꞌaasie oto ke iiꞌo luhetaꞌi mola.”