Palonga 19 - Tataroha Diana

A Pol E Iiꞌo I Epesas

¹ Maholo a Apolos e iiꞌo ue aana huilume i Korinit i laona poꞌo ni henue i Akaea, a Pol e hane holo i henue e si lai hule aana huilume paine i Epesas, na ko oodoie ngaeta mo pwaarongoisuli.

² Oto ko dolosi aada ko teꞌuri, “?Maholo omu aehota hiiwalaimoli aana Jisas, uri Liꞌoa Maaꞌi e siho noꞌone i lengimiu?” Kire aalamie kire ko teꞌuri, “Haꞌike. Melu kaꞌa rongoa nga mei ola i sulie Liꞌoa Maaꞌi, na hule aana melu kaꞌa saie Liꞌoa Maaꞌi nga ola uri taa.”

³ Oto a Pol ko dolosi aada ko teꞌuri loꞌu, “?Mala uri ko urine, nga tolahai loto-maaꞌinge uri taa nge omu loto maaꞌi aana?” Oto kire ko aalamie a Pol kire ko teꞌuri, “Melu loto maaꞌi aana tolahai loto-maaꞌinge nge a Jon e ere i sulie.”

⁴ Oto a Pol ko teꞌuri loꞌu, “A Jon e loto maaꞌi aana mwala nge kire oonisae mwaanie mo oorahaꞌaa ikire. Na e unue hunie mwala uri kire ke hiiwalaimoli aana iini nge kei lae loꞌu mei puri, na ingeie oto a Jisas.”

⁵ Maholo kire rongo urine, kire ko loto maaꞌi oto aana satana Jisas Aalaha ikie.

⁶ Na maholo a Pol e neꞌie nimana i pweude, nge Liꞌoa Maaꞌi e si siho i lengide, na kire ko ere oto aana taꞌena nga erenga hai aaopaꞌi na kire ko laengaꞌinie oto walana God.

⁷ Na ola mala aawalai mwane mwana rue nge loto maaꞌilada e lae.

⁸ A Pol e lae-lae i laona nume ni palo-palo mo Jiu, na e lae peꞌi ere hiitoꞌo hunie mwala i sulie e oolu waro-waro. Aana ko deu aahonga noꞌone huni haꞌa-aaliꞌue mwala hunie kire ke aaliꞌu mei takoie Aalahanga a God.

⁹ Taꞌe ngaeta mo iini aada kaꞌa sare hiiwalaimoli ike aana mei wala ienini. Na kire ko aehota ere aaelasie oto Tala Ni Meurihe i naꞌona mwala. Oto a Pol e lae mwaanire na ko toolea noꞌone mo pwaarongoisuli peꞌie. Na ko lai haꞌa-uusulire i sulie tolahana a Jisas mola susue dinge wau i laona nume ni sukulu a Tiranas.

¹⁰ A Pol e asuie urine hunie e ro halisi, hunie ahutana mo Jiu na mo Aapoloa Aaopa nge kire ko oꞌoꞌo aana poꞌo ni henue i Esia kire ke mani rongoa walana Aalaha.

Liꞌoa Aaela E Kaꞌa Haꞌamaꞌu Aana E Hiu Mwela Mwane A Seva

¹¹ A God e niie nanamanga hunie a Pol hunie ke asuie mo huꞌi-huꞌite hunge nge mwala kaꞌa leesiꞌi ue.

¹² Maꞌalana taꞌena nga mei sala e toꞌorie mola sapena Pol, na kire kei toolea hunie mo iini ko mataꞌi wa mo iini nge mo liꞌoa aaela e iiꞌo aada, kire sai awaa oto, na mo liꞌoa aaela ngeena ko tehi oto mwaanire.

^13-14 Na ngaeta mo mwane ni Jiu kire ko lae hailiu noꞌone huni oohe aasie mo liꞌoa aaela mwaanie mwala. Ngaeta mo iini aada, e hiu mwane kalena Seva, nga naꞌohai pris. Oto ikire noꞌone kire ko sare oohea mo liꞌoa aaela aana satana Jisas Aalaha ikie. Na kire ko teꞌuri, “Aana satana Jisas nge a Pol ko lae peꞌi tarohaꞌinie, o ke iisitaa.”

¹⁵ Taꞌe liꞌoa aaela e aalamire ko teꞌuri mola, “Nou saie taane a Jisas, na nou saie a Pol. ?Taꞌe iꞌomu, kira tei ni iꞌomu?”

¹⁶ Oto mwane nge liꞌoa aaela e oꞌoꞌo aana, e taꞌelaꞌi mola na ko seunire oto, lae-lae hule aana ko seu aaelasire oto. Na kire mani malakaꞌa mango, na mo sala ikire kire haka aaela oto. Oto kire si tehi mwaanie nume ngeena, na nga sala haꞌike loꞌu i denumada.

¹⁷ Maholo tataroha i sulie mei ola ienini e lai hule aana mwala ni Epesas, oto mo Jiu na mo Aapoloa Aaopa, kire ko meni meꞌu oto, na kire ko si haꞌamaꞌu aana satana Jisas Aalaha ikie.

¹⁸ Na mo iini hunge aana mo iini kire hiiwalaimoli kire lae mai naꞌona ahutana mwala, kire ko si haꞌahoue mo oorahaꞌaa kire dauꞌi keꞌu.

¹⁹ Na mo iini hunge nge kire ko esuie mo ola aana nanamanga mo liꞌoa aaela, kire rurue mo uusu-uusu ikire nge kire ko kure-kure na kire ko siꞌo-siꞌo i suliꞌi, kire ko uunuꞌi i laona dunge oto i maana mwala. Na maholo kire iidumie holitana mo uusu-uusu ngeena e hule aana mei toꞌoha hunie waaitana nga mwane ko esu hunie e ro tangalai helisi.

²⁰ Oto aena walu ola paine urine ko reu, nge walana Aalaha e si lai hule aana mo leu hunge, na mwala hunge kire ko hiiwalaimoli oto aana.

Mwala Oto Hunge Kire Maaola-ola I Epesas

²¹ Purine walu ola ngeena e rau mango, a Pol e hiingeꞌinie uri a Liꞌoa Maaꞌi ko sare uusungeꞌinie huni holaꞌi lae aana e ro poꞌo ni henue i Masedonia na i Akaea, nge ke si lae loꞌu hunie i Jerusalem. Na a Pol ko teꞌuri loꞌu, “Maholo ne kei lai liuhie mo leu ngeena mango, ne kei lai hule loꞌu aana huilume paine i Rom.”

²² Oto ko uusungeꞌinie a Timoti na Erastas, e ro mwane ko euꞌesu peꞌie hunie i Masedonia, na a Pol e kele iiꞌo loꞌu huni haꞌamangoa ngaeta mo ola aana poꞌo ni henue i Esia.

²³ Taꞌe i naꞌona e lae mwaanie leune nga maaola-olanga paine e rau i tehulaꞌana Tala Ni Meurihe.

²⁴ Na maaola-olanga ngeena, mwane ni Epesas satana a Demitrias nge e aehotaa. A mwane ngeena asunge ingeie oto huni eedu haꞌamalaa nume ni palo-palo a Atemis, mei god keni mo Epesas. Ko eedumie mo kele nume ngeena aani siliva huni haꞌaholingeꞌiniꞌi, na ngaeta mo iini hunge loꞌu ko terie mei toꞌoha oto paine mwaanie taungei eedunge mala ie.

²⁵ Oto a Demitrias a soie mai ahutana mo mwane aadu-eedu ngeena, na e soie mai noꞌone ngaeta mo mwane kire ko teri ola aana taꞌa-taꞌa taungei esungena, ko si teꞌuri hunire, “Mo mwane, omu ke saie tari-olanga diana ikolu ko lae mai mola mwaanie taꞌa-taꞌa taungei esunge.

²⁶ Oto mala omu leesie na omu rongoa oto maraamiu, a Pol ko laengaꞌinie uuri, ‘Mo god nge asuileni e lae aani nimana iinoni, nga mo god toꞌohuu haꞌike.’ Na a Pol e huꞌisie oto manatana ahutana mwala aana huilume ikolu i Epesas, na karaꞌinie oto noꞌone ahutana mwala aana mo henue i laona poꞌo ni henue ikolu i Esia ienini.

²⁷ Mala uri kolu kaꞌa loꞌongaꞌi diana, nge mwala kei mwesi mola mwaanie mei esunge ni teri-toꞌohanga ikolu, na nume ni palo-palo a god Atemis kei neꞌie nume mwaakule mola. Holaꞌinaꞌo ahutana mwala i laona poꞌo ni henue i Esia na ahutana mo leu i laona walumalau kire ko palo-paloa god ikolu ngeena. Taꞌe walana Pol ie kei da oto nga iini saꞌa haꞌamaꞌu loꞌu aana naꞌohai god ikolu ngeena.”

²⁸ Oto maholo ahutana mwala e rongo urine, kire ko si tohungei saewasu, na kire ko soi oto paine kire ko teꞌuri, “A Atemis god iꞌemeelu mo Epesas e paine liutaa.”

²⁹ E kaꞌa tewa na ahutana mwala aana huilume ngeena kire ko maaola-ola oto. Oto kire mani huru weu i saana leu ni maa-maani ola, na ngaeta mo iini aada ko tapolie oto a Gaeas na Aristakas, na kire ko ookerarue oto wau aana leu ni maa-maani ola ngeena. E ro mwane ngeena, kirerue hakusie a Pol uure mwaanie poꞌo ni henue i Masedonia.

³⁰ A Pol ko sare lai ere hunie mwala, taꞌe mo pwaarongoisuli kire uure honosie.

³¹ Na ngaeta mo naꞌohai mwane aana poꞌo ni henue ngeena nge kire ko haꞌi malahune peꞌie a Pol, ikire noꞌone kire uusungeꞌinie mei wala hunie uri ke suꞌuri lae loꞌu weu i laona leu ni maa-maani ola.

³² Mwala e ruru ngeena kire ko tohungei da mahuro oto hiitoꞌo hunie saena mwala. Nga pulitaa ni e ere-ere oto i sulie saeda na nga pulitaa loꞌu ni e ere-ere oto i sulie saeda sulie mo iini hunge aada kire kaꞌa manataꞌinie ike nga taa kire lae mai hunie.

³³ Oto mo Jiu kire ko uusungeꞌinie ngaeta iini aada, satana a Aleksanda, huni lai uure taꞌau i naꞌona mwala, na ngaeta mo iini kire ko loꞌongaꞌinie uri a mwaena ni oto e aehotaa maaola-olanga ngeena. Na a Aleksanda e salo haahie mwala aana nimana hunie kire ke pwaarongo kaꞌu hunie, aana ko sare ere hunire.

³⁴ Taꞌe maholo mwala kire lio saie mola uri ingeie ngaeta mwane ni Jiu, kire ko si meni soi oto paine hunie e ro maholoi sato kire ko teꞌuri, “!A Atemis god iꞌemeelu mo Epesas e paine liutaa!”

³⁵ Oto lae-lae, naꞌohai mwane aana pulitaa oaꞌoalaꞌi aana huilume i Epesas e haꞌamamalora ko teꞌuri, “!Mo Epesas! Ahutana mwala i laona walumalau kire mani saie oto uri huilume paine i Epesas nge ko lio i sulie nume ni palo-palo a god paine ngeena, a Atemis. Na kire saie oto noꞌone uri ikolu nge kolu ko lio i sulie ho heu maaꞌi ingeie, nge e teke mai uure i Lengi.

³⁶ Oto e aasa hunie nga iini kei unue uri mei ola ienini e kaꞌa toꞌohuu. Oto omu ke iiꞌo hahuroto mola mwaanie omu esuie loꞌu nga mei ola e aaela loꞌu liutaa.

³⁷ E ro mwane nge omu toolerarue mai ngeena kirerue kaꞌa pelie ike nga mei ola i laona nume ni palo-palo ikolu wa kirerue ke ere mwakataꞌinie god ikolu.

³⁸ Mala uri a Demitrias na mo mwane auꞌesu kire ko toꞌo aana nga mei wala ni ere-haitelilinge peꞌie nga iini, kire sai toolea mola i naꞌona pulitaa ni lei-lei. Kire saie taane uri mo rato ni mwane huni leie ere-erenga kire iiꞌo oto aana maholo ienini, na uri kire mwaꞌe-mwaꞌe huni leie taꞌena nga ere-erenga i matolana nga ro iinoni.

³⁹ Taꞌe mala uri omu ko toꞌo aana loꞌu nga mei ola huni ere i sulie peꞌie ruruhaa, nge haꞌa-oodohilana kei lae oto aana tohungana maholo huilume kei loko ni ngeena.

⁴⁰ Taꞌe kie ke lio talaka, mwaanie inemauri ni Rom e haꞌaloikie aena aana maaola-olanga paine kie asuie siꞌiri. Na nga mei wala diana kie saꞌa unue ike i sulie nga taa kie loko mai hunie.”

⁴¹ Oto maholo e ere urine mango, nge e si unue hunire uri kire ke mani oopa hailiu.