Palonga 17 - Tataroha Diana

A Pol E Laeliwala I Tesalonaeka

¹ A Pol na Saelas kirerue lae i liu i huilume i Ampipolis na huilume i Apolonia kire si lai hule wau aana huilume i Tesalonaeka. Na mo Jiu kire toꞌo aana nga nume ni palo-palo noꞌone i leune.

² Na i sulie tolahana a Pol aana taꞌena nga huilume, e lae oto ko lai aare-aarengaꞌi peꞌire na ko lai ere-ere peꞌire, na ko saaie Uusu-uusu Maaꞌi nada. Na e iiꞌo i leune hunie e oolu Dinge Maaꞌi Mo Jiu,

³ na ko lado luhesie mo neꞌisaenga hunire aana mo wala i laona mo Uusu-uusu Maaꞌi. Na e tohungei haataꞌi diana aana hunire uri a God e oalaꞌinie oto uri a Kraes kei sapesalu, na purihaꞌana kei heꞌi meuri eelihoꞌi loꞌu mwaanie maenga. Na e teꞌuri, “A Jisas nge no ko houleꞌinie huniꞌomu ienini, ingeie oto a Kraes nge omu ko maa-maaꞌoohie.”

⁴ Oto ngaeta mo Jiu kire hiiwalaimoli oto aana mei wala ngeena, na kire ko lulu i sulie oto a Pol na Saelas. Na mo iini hunge aana mo Aapoloa Aaopa nge kire ko palo-paloa God, na ngaeta mo iini hunge aana mo naꞌohai keni peine kire ko lulu i sulie oto noꞌone a Pol na Saelas.

⁵ Taꞌe mo rato ni Jiu kire ko tohungei heotaꞌinire, oto kire lai rurue mo iini hunge aana kira holo-holo amaa, kire ko si aehotaa maaola-olanga. Oto kire huru weu i nume ngaeta mwane satana a Jeson aana kire ko lio hunie a Pol na Saelas huni toolerarue i naꞌona mo rato ni mwane.

⁶ Taꞌe maholo kire kaꞌa lio oodoie e ro mwane ngeena, oto kire si tapolie mola a Jeson na ngaeta mo mwaasine i lalo aana Kraes, na kire ko weꞌi ookera oto wau i naꞌona mo rato ni mwane aana huilume ngeena. Na kire ko soi oto paine, kire ko teꞌuri, “E ro mwane nge kire ko hurosie ahutana mo henue, kirerue hule loꞌu mei laona huilume ikolu ie.

⁷ Na a Jeson e toliꞌaasirerue hunie kirerue ke iiꞌo i nume ingeie. Oto ahutada kire ko meni lae huꞌisie mo haꞌatolanga inemauri ni Rom aana kire ko unue uri ngaeta mwane aaopa, ingeie oto naꞌohai inemauri, na satana a Jisas.”

⁸ Oto mo Jiu kire tohungei da mahuro oto hiitoꞌo peꞌie mo wala urine hunie saena ahutana mwala aana huilume ngeena na oto mo rato ni mwane noꞌone.

⁹ Lae-lae kire ko deu rarahie oto a Jeson na ngaeta mo mwaasine i lalo aana Kraes hunie kire ke hiri aani toꞌoha, oto purihaꞌana kire si toliꞌaasie kire ke lae.

A Pol Na Saelas Kire Laeliwala I Berea

¹⁰ Oto maholo na ko si rodo, mo mwaasine i lalo aana Kraes kire si uusungeꞌi mumuni aana a Pol na Saelas hunie huilume i Berea. Maholo kirerue hule taꞌau i Berea kirerue lae oto hunie nume ni palo-palo mo Jiu.

¹¹ Na aana huilume ngeena, tolahana ahutana mwala e tohungei diana, liue mwala i Tesalonaeka. Mo Berea kire tohungei mwaꞌe-mwaꞌe ni rongo i sulie walana Pol peꞌi heitalea mo wala ngeena i laona mo Uusu-uusu Maaꞌi, ohe kire toꞌohuu wa haꞌike.

¹² Na hungelana mo Jiu na mo Aapoloa Aaopa na ngaeta mo naꞌohai keni aada kire mani hiiwalaimoli oto noꞌone.

¹³ Taꞌe maholo mo rato ni Jiu weu i Tesalonaeka kire rongoa uri a Pol ko tarohaꞌinie loꞌu walana God taꞌau i Berea, kire lae mai kire ko si ere i saena mwala hunge loꞌu aana huilume ngeena hunie kire ke saewasulirerue.

¹⁴ Oto mo mwaasine i lalo aana Kraes kire uusungeꞌinie a Pol mwaanie hanue ngeena hunie nga leu karaꞌinie aasi, taꞌe a Saelas na Timoti kirerue oore mola i Berea.

¹⁵ Na mo iini nge kire hakusie a Pol kire lae taraꞌasi oto peꞌie hule aana huilume i Atens. Oto purihaꞌana kire lae mwaanie a Pol aana huilume ngeena, kire si lae peꞌie mei wala a Pol hunie a Saelas na Timoti uri kirerue ke lae lau-leu i saana Pol.

A Pol E Laeliwala I Atens

¹⁶ Maholo a Pol ko maaꞌoohie a Saelas na a Timoti wau i Atens, saena ko tohungei huu aana ko leesie huilume ngeena e honu mola aana nunune mo pweai god.

¹⁷ Oto e lae i laona nume ni palo-palo mo Jiu huni ere-ere nada na taꞌena nga iini ko lae noꞌone mai huni palo-paloa God peꞌire. Na suli dinge ko lae-lae noꞌone aana leu ni uusiꞌe huni ere peꞌie mwala nge kire ko lae-lae mai i leune.

¹⁸ I Atens mo pulitaa oto hunge mala mo Epikiurian na mo Stoek kire ko ere-ere oto hiitoꞌo i sulie nga taa e tohungei roroꞌa hunie maurihaꞌana iinoni. Oto ngaeta mo haꞌa-uusuli aana e ro pulitaa ngeena kire rongoa ere-erenga a Pol, oto kire ko teꞌuri, “?Nga taa ni e rongo mala wisi ko nore-nore ngeena? ?Nga taa ni a mwaena ko sare unuena?” Na ngaeta mo iini ko teꞌuri, “Ohe ko ere i sulie ngaeta god aana mo poꞌo ni henue hai aaopaꞌi ni ngeena.” Kire ko ere urine aena aana a Pol ko tarohaꞌinie Tataroha Diana i sulie a Jisas na taꞌelaꞌinge ingeie mwaanie maenga.

¹⁹ Oto kire toolea a Pol i naꞌona pulitaa ni lei-lei nge kire haaraꞌinire aana Ariopagas, na kire ko dolosi aana, kire ko teꞌuri, “Melu ko sare saie mei haꞌa-uusulinge haalu nge o ko laengaꞌinie ngeena.

²⁰ Aana mo wala o ko unuꞌi ngeena, kire kele rongo aaopa huniꞌemeelu. Oto melu ko tohungei sare sai diana aana mei haꞌa-uusulinge haalu ngeena.”

²¹ Aana mwala ni Atens na mo awataa nge kire lae mai iiꞌo aana huilume ngeena kire sai teꞌurine tarau. Aana kire iiꞌo oto mola huni rongo hunie taꞌena nga mei ola haalu ko reu huni lalado i sulie.

²² Oto a Pol e uure i naꞌona pulitaa ngeena, ko si teꞌuri, “Mo Atens, nou lio saie uri omu tohungei diana aani palonga.

²³ No ko ere urine aena aana maholo nou lae-lae hailiu i laona huilume iꞌomu, nou leesie mo leu oto hunge nge omu ko aare-aarengaꞌi eeni, na nou leesie omu uusue noꞌone mo wala aana ngaeta ora ni uunu-uunu e teꞌuri, ‘Ora ni uunu-uunu i saana liꞌoa kolu kaꞌa saie.’ Oto liꞌoa nge omu ko palo-paloa urine, maꞌalana omu kaꞌa saie, taꞌe ingeie nge no ko ere-ere i sulie huniꞌomu ienini.

²⁴ Liꞌoa ngeena ingeie oto God nge e haꞌaholaa walumalau na ahutana mo ola i lalo aana, na ingeie nge e aalaha haahie i Lengi na mai aano. Oto e kaꞌa oꞌoꞌo ike i laona mo nume maaꞌi ikie mo iinoni nge kie ko euꞌesuiꞌi.

²⁵ Na e kaꞌa hari hunie ike nga mei ola hunie kie ke peꞌie aana. !Haꞌike! Ingeie maraana ni e niie mauringe hunikie, na e niie walu ola nge kie toꞌo aani.

²⁶ A God e haꞌaholaa eetana nga mwane a Adam, na mwaanie mola taꞌa-taꞌa iinoni ngeena nge a God e si esuie mo taungei iinoni hai aaopaꞌi hunie kire ke lai iiꞌosie walumalau. Na e totohoa oto mo leu hunie kire kei iiꞌo aani, na e pongie oto mauringe ikire.

²⁷ A God e asuie walu ola ngeena aena aana e saetoꞌo aana kie ke haitalea, na maholo kie kei heitalea, kie kei haro lio oodoie taane, aena aana e kaꞌa iiꞌo haꞌataulie ike nga iini aaka.

²⁸ Mala kaꞌu ngaeta mwane saenanau iꞌomu e uusue wau i naꞌo uuri, ‘Aena aana a God mola e da kie iiꞌo i laona walumalau, na kie ko meu-meuri, na kie sai lae hailiu.’ Na e uusue noꞌone uuri, ‘Ahutaka kie mani neꞌie mo mwela ingeie haliꞌite.’

²⁹ Oto aena a God e niie mauringe hunikie mala mo mwela ingeie, nge kie ke suꞌuri neꞌi-neꞌisae uri a God nga ola kie sai eedumie mola aani kol wa aani siliva wa aani heu. Aana a God e kaꞌa urihana ike ola nge nimana iinoni wa saenanaunge iinoni e sai esuie.

³⁰ Wau i naꞌo maholo mwala kire kaꞌa lio saie ue a God, e kaꞌa haꞌaloire ike. Taꞌe maholo ienini nge ko tohungei ere hiitoꞌo hunie ahutana mwala i laona walumalau uri kire ke oonisae mwaanie mo oorahaꞌaa ikire.

³¹ Aana e pongie oto hai dinge hunie kei leie walumalau aana, na kei leie mwala oto i sulie nga taa e saie e oodo taꞌingelu. Na e lio hilisie oto iini nge kei leie mwala urine, na e haataꞌi diana aana oto hunie ahutana mwala aana e taꞌea kaꞌu iinine mwaanie maenga.”

³² Maholo mwala kire rongoa uri a Pol ko ere i sulie taꞌelaꞌinge mwaanie maenga, oto ngaeta mo iini ko haꞌamwasi mola aana. Taꞌe ngaeta mo iini kire ko teꞌuri, “Melu saetoꞌo aana o ke ere i sulie mei neꞌisaenga ngeena loꞌu aana nga maholo.”

³³ Oto a Pol e si lae mwaanie pulitaa ngeena.

³⁴ Taꞌe ngaeta mo iini kire ko lulu i sulie oto walana a Pol na kire ko hiiwalaimoli oto aana a Jisas. Na ngaeta mo iini aada nge a Daeonisias ngaeta mwane noꞌone aana pulitaa Ariopagas ngeena, peꞌie ngaeta huꞌe satana a Damaris, na ngaeta mwala loꞌu.