Palonga 12 - Tataroha Diana

A Herod Inemauri E Neꞌie A Pita I Nume Ni Hoꞌo

¹ Aana maholona noꞌone nge a Herod Akripa Inemauri e aehota huni haꞌaloie ngaeta mo iini aana soihaadaꞌinge.

² E unue kire ke horo maesie a Jemes Hurulaꞌaa (aasine a Jon) aana naihi.

³ Na maholo e leesie mo rato ni Jiu kire ilenimwaꞌe haahie mei ola ienini, e si lae loꞌu aana mo dinge aana Houlaa Ni Liumwaanie na e tapolie noꞌone a Pita.

⁴ Na maholo kire tapolie a Pita, kire si lai neꞌie i laona nume ni hoꞌo. Na a Herod e neꞌie i nimana e hai pulitaa aani ramo huni lio i sulie, na e hai pulitaa ngeena kire mani ado aani hai ramo aani pulitaa. A Herod ko sare leie a Pita i maana mwala i purine mo dinge paine aana Liumwaanie e mango.

⁵ Oto kire ko si tohungei kakali diana aana a Pita i laona nume ni hoꞌo, taꞌe mo iini aana soihaadaꞌinge kire ko aarea mola a God hunie ke peꞌie a Pita.

A God E Luhesie A Pita Mwaanie Nume Ni Hoꞌo

⁶ I upui rodo aana hai rodo i naꞌona hai dinge a Herod e loꞌongaꞌinie hunie kei leie a Pita, a Pita ko maꞌahu i matolana e ro ramo. Kire hoꞌosie aana e ro iieli heu, na ngaeta mo kakalihe kire uure noꞌone i aena maa aana nume ni hoꞌo.

⁷ Oto ngaeta ensel a God e uure oto i laona nume ni hoꞌo, na raa-raa ko raa oto i laona nume ni hoꞌo. Oto ensel ngeena e hele wau i aalahana a Pita na ko haꞌalioa na ko teꞌuri, “!O ke taꞌelaꞌi lau-leu!” Na aana kele maholoi satona e ro iieli heu ko mou oto, na kire ko teke oto mwaanie kiꞌine a Pita.

⁸ Oto ensel ko teꞌuri loꞌu, “O ke hoꞌosie rorotoꞌoni na hoꞌohaahiꞌae iꞌoe.” A Pita ko deu-deu mola i sulie nga taa ensel ko unue. Na ensel ko teꞌuri loꞌu hunie, “O ke hoꞌosie loꞌu toꞌoni tetewa iꞌoe, na o ke lae mai i sulieu.”

⁹ Oto a Pita ko lae oto i sulie ensel ngeena, na kirerue ko lae oto i sinaha mwaanie duru ngeena. Taꞌe a Pita ko loꞌongaꞌinie uri nga mei ola toꞌohuu haꞌike na uri ko leesie mola nga mei haataꞌinge.

¹⁰ Kire liue eetana nga kakalihe aana nume ni hoꞌo, na kirerue ko lae loꞌu taꞌau i liue ruana nga iini. Na iini ooreta nge maai para hau i matolana nume ni hoꞌo ngeena na huilume paine ngeena. Na maholo kirerue lae poi hule i saana maai para ngeena na ko taha mola maraana taladarue. Oto kire lae i sinaha, na kire kele lae i sulie ngaeta tala, na a Pita ko si lio talea mola ensel e aiꞌaa oto mwaanie.

¹¹ Maholona nge a Pita ko si lio saie nga taa e rau aana. Oto ko teꞌuri hunie maraana, “!Haꞌike eena! !E toꞌohuu oto! A God e uusungeꞌinie ensel ingeie huni haꞌa-uurieu mwaanie nanamanga a Herod na mwaanie walu ola nge mo rato ni Jiu kire loꞌongaꞌinie uri kire kei esuiꞌi eeku.”

¹² Oto maholo e kele loꞌo-loꞌongaꞌi i sulie, e si lae wau i nume a Meri nikana a Jon nge ngaeta sata aana a Mak. Na mwala hunge nge kire ruru mei nume huni aarengaꞌi.

¹³ A Pita e lae wau, ko iiki-iiki i kolune maa na ngaeta keni euꞌesu, satana a Roda, nge ko lae mai huni tahanie maa.

¹⁴ Na maholo e rongo saie uri a Pita nge ko ere mai peꞌie, ko si tohungei ilenimwaꞌe na e aaliꞌu mola mwaanie maa. Taꞌe e huru eelihoꞌi mola hao i nume, na ko soi, ko teꞌuri, “!A Pita e uure oto i aena maa taꞌau i sinaha!”

¹⁵ Taꞌe mwala ko teꞌuri mola, “A keni ngeena ko pweu, ohe.” Taꞌe a keine ko rara oto uri a Pita toꞌohuu, kire ko si teꞌuri mola hunie, “Ohe nunune mola ni ngeena.”

¹⁶ Taꞌe a Pita ko iiki-iiki mola i kolune maa, na maholo kire tahanie maa na kire ko leesie, oto kire si tohungei pangataꞌi.

¹⁷ Taꞌe a Pita e salo haahire mola aana nimana hunie kire ke rohu, oto ko si lalado nada aana a God e haꞌa-iisitaangaꞌinie mwaanie nume ni hoꞌo uri taa. Mango urine, e si unue kire ke ladoa laladonga ienini nana a Jemes na mo eesine i lalo aana a Kraes. Oto e si lae mwaanire, na e lae loꞌu aana ngaeta leu.

¹⁸ Oto e dangi hoꞌowa, mo ramo ko si tohungei meꞌu, na kire ko dolosi aada hailiu uuri, “!Haꞌike eena! ?A Pita oto i tei?”

¹⁹ A Herod e unue kire ke haitale ohie a Pita, taꞌe kire kaꞌa lio oodoie ike. Oto a Herod e dodolosi aana mo ramo nge kire kakakalie a Pita. Mango urine, e si leire hunie maenga noꞌone. Oto purine walu ola ienini, a Herod e lae mwaanie i Jiudia e si lai iiꞌo wau aana huilume i Sisaria.

Maenga A Herod

²⁰ Aana maholona a Herod ko tohungei saewasulie mwala aana e ro huilume i Taea na i Saedon. Oto mo rato aana e ro huilume ngeena kire ruru, kire ko si lai leesie a Herod aena aana e ro huilume ngeena ko tohungei sare holi ngeulaa ada aana poꞌo ni henue nge a Herod ko inemauri haahie. Taꞌe i naꞌona kire lae i saana Herod, kire holaꞌi lai haꞌa-olaa a Blastas, poro paine haahie nume a inemauri hunie ke peꞌire. Oto mango urine nge kire si lai haꞌarongoa a Herod uri kire ko sare ere peꞌie hunie kire kei uure ruru peꞌie.

²¹ Oto aana dinge e lio hilisie huni ere-ere peꞌire, a Herod e hoꞌosie mo sala diana ingeie, e lai iiꞌo aana naunekume ni aalaha, ko si ere-ere nana mwala.

²² Na mwala kire ko soi oto paine, aana kire ko lahea a Herod uuri, “!Iꞌoe nga iinoni haꞌike ni ko ere-ere ngeena! !Taꞌe iꞌoe ngaeta god!”

²³ A Herod e saetoꞌo aana mwala ko lahea urine, na e kaꞌa unue ike hunire uri kire ke lahea mola a God. Oto mola aana kele maholoi satona, ensel a God e si da a Herod ke mataꞌi, na mo mwaa-mwaa kire ko ngeue hasiꞌona lae-lae hule aana e mae.

²⁴ Taꞌe walana God ko lai hule aana mo henue hunge, na mwala hunge kire ko hiiwalaimoli loꞌu.

²⁵ Oto maholo a Banabas na Sol kirerue asu mangoa asunge ikirerue aana niilana mei toꞌoha nge kirerue toolea mai hunie soihaadaꞌinge i Jerusalem, kire si eelihoꞌi loꞌu hunie i Antiok. Na maholona nge kirerue toolea noꞌone a Jon, nge ngaeta sata loꞌu aana a Mak.