Palonga 10 - Tataroha Diana

A God E Ere Peꞌie A Konilias

¹ Ngaeta mwane ni Rom e oꞌoꞌo wau aana huilume i Sisaria, satana a Konilias na ingeie ngaeta naꞌohai ramo haahie tangalai ramo aana pulitaa ni ramo nge kire haaraꞌinie aana, “Pulitaa mo Ramo ni Itali.”

² Maꞌalana ingeie ngaeta mwane aana mo Aapoloa Aaopa, taꞌe e neꞌisae paine aana God na ahutana mwala aana uluhe ni iinoni ingeie kire ko lulu i sulie a God noꞌone. A mwaena ko nii-nii tarau hunie kira maitale, na ko aare-aarea God suli maholo.

³ Aana ngaeta hai dinge aana ola mala oolune nga maholoi sato i aapai sato, a Konilias e leesie mei haataꞌinge mwaanie a God, na ko leesie oto ngaeta ensel a God e sili mei nume ingeie na ko soie, oto ko teꞌuri, “Konilias.”

⁴ Oto a Konilias ko tohungei meꞌu, na ko lio hahuroto oto aana ensel ngeena, na ko teꞌuri, “?Nga taa eena, poro paine?” Oto ensel ko teꞌuri hunie, “A God e rongoa oto mo aarengaꞌinge iꞌoe, na ko leesie o ko peꞌie kira maitale, oto ko tohungei saemango haahiꞌo. Oto maholo ienini a God ko sare peꞌiꞌo noꞌone.

⁵ O ke uusungeꞌinie nga mo mwane wau hunie huilume i Jopa oto molana, hunie kire ke haaraie a Saemon, nge ngaeta sata aana a Pita.

⁶ E iiꞌo wau i nume ngaeta mwane loꞌu satana a Saemon mwane nge ko euꞌesu aana mo teꞌe-teꞌei puluke, na nume ingeie e iiꞌo karaꞌinie aasi.”

⁷ Maholo ensel ngeena e lae, a Konilias e si soie mai ngaeta ro mwane auꞌesu ingeie na ngaeta ramo. Na ramo ngeena a Konilias e tohungei norutoꞌo aana, aana ingeie noꞌone e tohungei neꞌisae paine aana God.

⁸ A Konilias e unue ahutana mo ola mango hunie oolu mwaena, e si uusungeꞌinire hunie i Jopa.

⁹ Oto i upui aatowaa aana hai dinge i puri, kire ko karaꞌinie oto huilume i Jopa. Na aana maholona a Pita ko lai aarengaꞌi taꞌau aana Leu Ni Haa-haanaku i koluhana nume.

¹⁰ Oto a Pita ko hiolo na saena ke ngau. Taꞌe maholo kire ko haꞌa-haꞌaliaa ue mo ngeulaa, ko si leesie mola haataꞌinge mwaanie a God.

¹¹ Na ko leesie oto ola mala mei sala paine nge kire ko haꞌasihoa aana e hai suꞌu-suꞌue ko siho mai aano uure mwaanie leu a God e iiꞌo aana.

¹² Na taꞌena nga ola mauri oto mola e iiꞌo i laona mei sala paine ngeena—taꞌe-taꞌena nga lulusane, na taꞌe-taꞌena nga mwaa, na taꞌe-taꞌena nga manu oto mola nge kire aapu hunie mo Jiu.

¹³ Na a Pita ko rongoa mei wala ko teꞌuri, “Pita o ke horoꞌie mo ola ngeena, na o ke ngauꞌi.”

¹⁴ Taꞌe a Pita ko teꞌuri mola, “!Haꞌike, Aalaha ineu! Nou kaꞌa ngaue ue nga mei ola nge mo Haꞌatolanga e uure honosie uri e madaꞌa.”

¹⁵ Na ko rongoa loꞌu mei wala uuri, “Mo ola nge a God e unue uri kire rereꞌa, suꞌuri loꞌongaꞌinie loꞌu uri kire madaꞌa.”

¹⁶ Walu ola ienini e rau haꞌa-oolu, oto sala paine ngeena e si ooli loꞌu taꞌau i Lengi.

¹⁷ Oto a Pita ko talei loꞌo-loꞌongaꞌi hiitoꞌo i sulie mei haataꞌinge ngeena, na aana maholona e oolu mwane nge a Konilias e uusungeꞌinire kire ko lio oodoie oto nume a Saemon. Kire uure i maana para taꞌau i sinaha.

¹⁸ Kire ko dolosi hunie a Saemon nge ngaeta sata aana a Pita ohe e iiꞌo taane i nume.

¹⁹ Taꞌe maholo a Pita ko loꞌo-loꞌongaꞌi hiitoꞌo ue i sulie mei haataꞌinge ngeena, a Liꞌoa Maaꞌi ko teꞌuri hunie, “Saemon e oolu mwane ko dolosiꞌo.

²⁰ O ke siho oto i aano lau-leu, na o ke suꞌuri meꞌu ni lae peꞌire aena aana ineu nge nou uusungeꞌinire mai ngeena.”

²¹ Oto a Pita e siho hao i aano, ko si teꞌuri hunire, “Ineu oto mwane nge omu ko heitalea. ?Nga taa nge omu saetoꞌo aana?”

²² Oto ngaeta iini aadaelu ko teꞌuri hunie, “A Konilias nge e uusungeꞌiniꞌemeelu mei ie, ingeie poro paine haahie mae. Na ingeie mwane e oodotaꞌi, na ko palo-paloa noꞌone a God, na ahutana mwala ni Jiu kire tohungei haꞌamaꞌu aana. Na ngaeta ensel a God e unue hunie ke unue huniꞌo uri o ke lae kaꞌu weu i nume ingeie hunie ke rongoa nga taa o kei unue hunie.”

²³ Oto a Pita e si unue kire ke lae kaꞌu mei nume, na kire ko maꞌahu oto aana hai rodona. E dangi hoꞌowa a Pita e dau aakau mango, kiraelu ko si meni lae, na ngaeta mo eesine i lalo aana Kraes i Jopa ko hekusire noꞌone.

²⁴ Na aana hai dinge loꞌu i puri, nge kire ko lai hule wau i Sisaria, na a Konilias ko maaꞌoohie oto a Pita. Na e lokoa noꞌone ahutana mwala aana uluhei iinoni ingeie na ngaeta mo malahune.

²⁵ Maholo a Pita e lai hule wau i nume a Konilias, nge poro paine aana mae ngeena e si lai pouruuru i naꞌona aani haꞌamaꞌunge aana.

²⁶ Taꞌe a Pita e haꞌa-uuresie na ko teꞌuri, “O ke uure i lengi, aana ineu iinoni noꞌone mola mala iꞌoe.”

²⁷ A Pita ko kele ere-ere peꞌie a Konilias, na ko sili hao i nume na ko leesie oto mwala hunge e loko.

²⁸ Oto a Pita ko teꞌuri hunire, “Omu saie oto haꞌatolanga iꞌemeelu mo Jiu e uure honosiꞌemi mwaanie emi heꞌimalahune peꞌie nga iini aana mo Aapoloa Aaopa wa emi ke sili i laona mo nume ikire urini. Taꞌe a God e haataꞌinie aaku uri ne ke suꞌuri unue loꞌu nga iini e madaꞌa na e kaꞌa malisine haꞌimalahunanga peꞌie a God.

²⁹ Na maholo omu hei uusungeꞌi hunieu, nou kaꞌa sare unue loꞌu nga mei ola, taꞌe nou lae mola mai. ?Oto no ko dolosi mola aamiu, e ue ni omu saetoꞌo aana ne ke lae mai?”

³⁰ Oto a Konilias ko teꞌuri, “Aana oolune nga maholoi sato i aapai sato mala maholo ienini aana e oolu hei dinge oto e mango haona, nou aare-aarengaꞌi mai nume ineu ie. Oto nou si aparaꞌi na nga mwane e toꞌoni aana mo toꞌoni rereꞌa e lae oto mai uure i naꞌoku.

³¹ Oto ko teꞌuri, ‘Konilias, a God e pwani rongoa oto aarengaꞌinge iꞌoe, na e lio saie oto nga taa o ko euꞌesuie huni peꞌie kira maitale.

³² Oto o ke uusungeꞌinie nga mo iini wau i Jopa hunie kire ke haaraie a Saemon, nge ngaeta sata aana a Pita, hunie ke lae mai. A mwaena ko oꞌoꞌo wau i nume a Saemon, mwane nge ko euꞌesu aana mo teꞌe-teꞌei puluke, na nume ingeie e iiꞌo mola karaꞌinie aasi.’

³³ Na oto mola aana maholona nge nou uusungeꞌinie mo mwane wau i seemu, na e diana oto liutaa aana o lae oto mai. Na maholo ienini melu meni ruru oto i naꞌona God huni rongoa mo ola a Aalaha e niiꞌi huniꞌo huni tola tahangaꞌiniꞌi huniꞌemeelu.”

A Pita E Tarohaꞌinie Tataroha Diana Hunie Mo Aapoloa Aaopa

³⁴ Oto a Pita ko si aehotaa ere na ko teꞌuri, “E tohungei toꞌohuu oto, maholo ienini nou si lio saie oto uri a God e kaꞌa saehaahie ike mola nga mo iini.

³⁵ Mala uri nga iini ko haꞌamaꞌu aana a God na ko esuie mo ola oodotaꞌi, nge a God kei ilenimwaꞌe haahie, maꞌalana e uure aana taꞌena nga poꞌo ni iinoni uri taa loꞌu i laona walumalau.

³⁶ Omu saie taane oto Tataroha Diana a God e uusungeꞌinie hunie mwala ni Israel uri ikie mo iinoni kie sai toꞌo aana hanuelamanga mola aena aana a Jisas Kraes, iini ko aalaha haahie walu ola.

³⁷ Na omu saie taane oto nga taa e rau aana ahutana mo leu i Israel, nge e aehota i Kalili peꞌie laeliwalanga a Jon i sulie loto-maaꞌinge aana oonisaenga.

³⁸ Na omu saie oto uri a God e lio hilisie a Jisas ni Nasaret na e da e toꞌo aana Liꞌoa Maaꞌi na nanamanga. Oto aena aana a God e iiꞌo susu peꞌie, a Jisas e lae-lae hailiu aana taꞌena nga leu, na e asuie mo ola diana, na e haꞌa-uurie mo iini nge kire iiꞌo i hahana nanamanga a Satan.

³⁹ Na iꞌemeelu mo hurulaꞌaa melu tohungei leesie oto aana maameelu ahutana mo ola nge a Jisas e asuiꞌi aana hanue iꞌemi mo Jiu lae-lae hule oto taꞌau i Jerusalem. Na melu leesie noꞌone kire uie i lengine poꞌu-poꞌu nge e mae.

⁴⁰ Taꞌe aana oolune nga hai dinge a God e taꞌea loꞌu a Jisas mwaanie maenga, oto purihaꞌana e haataꞌi maraana loꞌu aameelu.

⁴¹ E kaꞌa haataꞌi ike aana ahutana mwala, taꞌe mola hunie iꞌemeelu mo iini nge a God e holaꞌi lio hilisiꞌemeelu oto hunie melu ke leesie. Na maholo e mauri eelihoꞌi oto, melu ngeu-ngeu na melu inu-inu noꞌone peꞌie.

⁴² Na a Jisas e unue oto huniꞌemeelu uri melu ke tarohaꞌinie Tataroha Diana hunie mwala. Na melu ke tarohaꞌinie uri ingeie oto a God e lio hilisie hunie kei leie ahutana mwala maꞌalana kire mae oto wa kire mauri ue.

⁴³ Ahutana mo propet oto i naꞌo kire ere-ere noꞌone i sulie a Jisas, na kire laengaꞌinie uri nga iini ko hiiwalaimoli aana, nge a God kei saeꞌaasie mo oorahaꞌaa ingeie i tehulaꞌana.”

Liꞌoa Maaꞌi E Siho I Lengine Mo Aapoloa Aaopa

⁴⁴ Na maholo a Pita ko ere-ere ue, Liꞌoa Maaꞌi ko siho oto i lengine ahutana mo iini nge kire ko rongo hunie walana.

⁴⁵ Mo Jiu nge kire hiiwalaimoli oto na kire lae mai peꞌie a Pita, kire ko tohungei pangataꞌi aana a God e niie noꞌone Liꞌoa Maaꞌi hunie kira Konilias maꞌalana ikire mo Aapoloa Aaopa.

⁴⁶ Na kire saie uri e toꞌohuu oto, aana kire rongoa mwala ko tohungei lahea a God aana taꞌena nga erenga hai aaopaꞌi. Oto a Pita ko teꞌuri hunie mo iini peꞌie,

⁴⁷ “Liꞌoa Maaꞌi e siho i lengide mala e siho kaꞌu i lengikaelu. ?Oto uri nga iini e sai uure honosie mola mwala ngeena mwaanie loto-maaꞌinge noꞌone aani wei?”

⁴⁸ Oto e si unue hunie mo iini peꞌie uri kire ke loto maaꞌi aana kira Konilias aana satana Jisas Kraes. Na mwala ngeena ko eitanaie a Pita uri ke iiꞌo kaꞌu peꞌire nga mo dinge loꞌu.