Tataroha Diana I Sulie A Jisas Kraes Nge A Mak E Uusue 7 - Tataroha Diana

Lulu I Sulilana Jisas E Roroꞌa Liutaa Aana Mo Haꞌatolanga Mo Weuwaka

¹ Oto ngaeta mo Parise na mo haꞌa-uusuli aana mo Haꞌatolanga a Mosis kire uure mwaanie i Jerusalem huni lae mai saana a Jisas.

² Na aana maholona kire ko leesie uri mo pwaarongoisuli a Jisas kire kaꞌa hodalie kiꞌide i sulie taungei hoda-kiꞌinge nge mo Parise kire saetoꞌo aana mo iinoni ke hele i sulie i naꞌona ngaunge.

³ Mo Parise na ahutana oto mo Jiu, kire ko lulu i sulie haꞌatolanga ngeena uure oto wau aana mo weuwada, nge kire saꞌa ngau na kire kaꞌa asuie taungei hoda-kiꞌinge kire unue e diana.

⁴ Aana maholo kire ko lae mai uure mwaanie uusiꞌe, kire saꞌa sare ngau ike ue na kire kaꞌa hodalie kiꞌide. Na mo haꞌatolanga hunge kire ko lulu i suliꞌi uure oto wau aana mo weuwada i sulie hoda-olanga aana mo kuki, na mo nime, na mo iini huni hoda-hoda ola, na mo taetahe huni ngeu-ngeu i lengini.

⁵ Oto mo Parise na mo haꞌa-uusuli aana mo Haꞌatolanga kire ko dolosi aana a Jisas uuri, “?Aana e ue ni mo pwaarongoisuli iꞌoe kire kaꞌa lulu i sulie ike haꞌatolanga mo weuwaka kire haꞌa-uuresie? Lio kaꞌu, kire ko ngeu mola na kire kaꞌa holaꞌi hodalie kiꞌide, na urine kire madaꞌa i maana God.”

⁶ Oto a Jisas ko aalamire uuri, “Walana a God nge a Aesaea e uusue i suliꞌomu e toꞌohuu oto. Iꞌomu mwala omu ko lupweꞌi deu-deu mola oto mala e uusue. Aana a God e unue uuri, Mwala ie kire ko haꞌamaꞌu eeku mola aana ngidude, taꞌe manatada e haꞌatau hiitoꞌo mola mwaanieu.

⁷ Mwala ngeena kire kaꞌa palo-paloau ike toꞌohuu. Kire ko esuie mola mo haꞌatolanga ikire maraada, na kire ko haꞌa-uusulie mwala huni lulu i suliꞌi. Oto kire ko si unue uri mo haꞌatolanga ineu eeni, taꞌe haꞌike.” Aesaea 29:13

⁸ Oto a Jisas ko heꞌi teꞌuri loꞌu hunire, “Omu toliꞌaasie mo Haꞌatolanga a God, oto omu ko si lulu i sulie mola mo haꞌa-uusulinge ni iinoni.

⁹ Omu tohungei saenanau liutaa mola huni lae mwaanie mo Haꞌatolanga a God, hunie omu ke lulu i sulie mo haꞌatolanga iꞌomu maraamiu.

¹⁰ Omu saie kaꞌu a Mosis e unue uuri, O ke haꞌamaꞌu aana aamamu na nikemu. Eksodas 20:12 Na e heꞌi unue loꞌu uuri, Nga iini nge kei ere aaelasie aamana wa nikana, nge horoꞌilana kei lae. Eksodas 21:17

¹¹ Taꞌe iꞌomu, omu ko haꞌa-uusuli mola uri mala nga iini ko toꞌo aana nga mei ola diana nge e sai niie huni peꞌie aamana na nikana, taꞌe ko unue uuri, ‘Mei ola ngeena nou niie oto hunie a God,’

¹² urine ke suꞌuri haꞌamaꞌu loꞌu aana aamana na nikana peꞌie niilana mei olana hunire.

¹³ Oto aana omu ko lae mola i sulie mo haꞌa-uusulinge mo weuwemiu, nge e haataꞌinie uri omu ko mwakataꞌinie mola walana a God. Na mo ola oto hunge urine omu ko esuiꞌi oto.”

Ngaulaa E Saꞌa Haꞌamadaꞌaa Ike Maurihaꞌana Iinoni, Taꞌe Oorahaꞌaa Haꞌalaa

¹⁴ Oto a Jisas e heꞌi soie loꞌu mwala i saana na ko teꞌuri hunire, “Omu ke pwaarongo diana aana nga taa ne kei unue hunie omu ke sai diana aana.

¹⁵ Mo ngeulaa nge iinoni ko ngeuꞌi kire kaꞌa haꞌamadaꞌaa ike iinonine i maana God, taꞌe mo wala nge ko iisitaa mwaanie ngidune ni ko haꞌamadaꞌaa.”

¹⁶

¹⁷ Oto maholo e lae mwaanie mwala na ko lai sili oto i nume, nge mo pwaarongoisuli ingeie kire ko si dolosie aalahuunge ngeena aana.

¹⁸ Oto a Jisas ko teꞌuri hunire, “!Iꞌomu na pwaumiu e aaela noꞌone mola mala mwala ngeena! ?Uri omu kaꞌa lio saie ike noꞌone? Mei ngeulaa nge ko lai sili i laona ngidune iinoni, mo ola ngeena kaꞌa haꞌamadaꞌaa ike iinoni,

¹⁹ i sulie kire kaꞌa lae ike i laona manatana, taꞌe kire lae taraꞌasi mola hao i laona oopwana. Oto ko si iisitaa loꞌu mola mwaanie sapena.” (Maholo a Jisas e ere urine e haataꞌinie uri ahutana mo ola ngau-ngeu kire mani rereꞌa mola i maana God.)

²⁰ Oto ko heꞌi teꞌuri loꞌu, “Taꞌe neꞌisaenga aaela iinoni haꞌalaa e sai haꞌamadaꞌaa iinoni i maana God.

²¹ Aena aana mo neꞌisaenga aaela ko meni uure oto mai mwaanie saena iinoni. Mo neꞌisaenga mala masinge, pelinge, horonga, aeni-olanga,

²² saehanalinge, tataꞌalanga, eeronga, dau-olanga taꞌewau, heotaꞌinge, ere-aaelasilana ngaeta iinoni, toohaꞌinge, na puꞌonga.

²³ Ahutana walu ola ienini, ikire i saena iinoni. Kire ko iisitaa, nge kire sai haꞌamadaꞌaa iinoni.”

Keni Ni Puꞌo E Hiiwalaimoli Aana Jisas

²⁴ Oto a Jisas na mo pwaarongoisuli kire uure i leune, kire ko lae loꞌu weu hunie hanue ni puꞌo i Taea, na ngaeta mwala i leune kire tolakonire i nume ikire. A Jisas e sereꞌinie uri mwala aaopa ke saie ingeie i leune, taꞌe e aasa oto huni mumuni.

²⁵ Na ngaeta huꞌe, liꞌoa aaela e hite aana kele pule ingeie, ingeie noꞌone i leune. Oto maholo e rongoa uri a Jisas e hule, oto ko tolana lae oto mai pouruuru i naꞌona.

²⁶ A huꞌena, ingeie nga huꞌe ni Jiu haꞌike, taꞌe e hute aana poꞌo ni henue i Ponisia i laona aalahanga i Siria. Na e lae mai ngarasie a Jisas hunie ke taꞌaasie liꞌoa aaela mwaanie kele pule ingeie.

²⁷ Taꞌe a Jisas ko ere ni aalahuunge mola i sulie mo Jiu na mo puꞌo hunie uuri, “Toliꞌaasie kaꞌu mo mwela kire ke holaꞌi ngeu, hunie kire ke pote. Aana e kaꞌa diana ike huni aasie mola mo ngeulaa mo mwela ana mo usu.”

²⁸ Oto a huꞌena ko aalamie loꞌu a Jisas, ko teꞌuri, “E toꞌohuu oto aalaha ineu. Taꞌe maꞌalana mo usu na kire sai ngaa mola mo eehuhuꞌei ngeulaa nge ko teke mwaanie taetahe mo mwela.”

²⁹ Oto a Jisas ko teꞌuri hunie, “Aena aana o ko ere kohi urine, taꞌelaꞌi na o ke lae oto taꞌi nume iꞌoe. Liꞌoa aaela ngeena e lae oto mwaanie pule iꞌoe.”

³⁰ Na maholo a huꞌena e ooli weu i nume ingeie, na ko leesie a kalena e eno i lengine hulite ingeie, na liꞌoa aaela ngeena e tahi toꞌohuu oto mwaanie.

A Jisas E Haꞌa-uurie Mwane E Pungu

³¹ Oto a Jisas na mo pwaarongoisuli ingeie kire uure mwaanie poꞌo ni henue i Taea, kire si lae i liu i Saedon, oto kire si lai hule aana aasi weu i Kalili hatarie poꞌo ni henue i Dekapolis.

³² Oto ngaeta mwala kire toolea mai nga mwane e pungu na e kaꞌa sai ere kohi ike noꞌone i saana a Jisas. Na kire ko eitanaie uri ke haꞌa-uurie.

³³ Oto a Jisas e toolea a mwaena mwaanie mwala, e si neꞌie riꞌi-riꞌine i laona e ro aalingana mwaena. Na e ngisuhie riꞌi-riꞌine, oto ko toongaꞌinie aana meana a mwaena.

³⁴ Oto e lio taꞌi lengi, na ko mango paine mala iinoni ko saehuu, na ko teꞌuri hunie a mwaena aana erenga ni Jiu, “!Epata!” Loꞌongaꞌinge aana uuri, “O ke taha oto.”

³⁵ Na oto mola aana maholona, aalingana a mwaena ko tolana taha oto, na meana e kohi oto noꞌone, na ko ere kohi oto loꞌu.

³⁶ Oto a Jisas e ere honosire mwaanie kire haꞌarongoa nga iini. Taꞌe maꞌalana e uure honosire kaꞌu urine, kire ko si laengaꞌinie mola hailiu.

³⁷ Na ahutana mwala nge kire rongoa tataroha ngeena, kire ko tohungei pangataꞌi oto hiitoꞌo, na kire ko ere uuri, “!Haꞌike eena! !Ahutana mo ola a mwane ngeena ko esuiꞌi kire tohungei kohi oto liutaa! E asuie mo pungu kire ko rorongo oto, na mo pweu kire manata loꞌu.”