Tataroha Diana I Sulie A Jisas Kraes Nge A Mak E Uusue 5 - Tataroha Diana

A Jisas E Haꞌa-uurie Mwane Nge Mo Liꞌoa Aaela Aana I Kerasa

¹ A Jisas na mo pwaarongoisuli ingeie kire lai aarapuu aana poꞌo ni eesi i Kalili poꞌo taꞌau aana poꞌo ni henue mo Kerasa.

² Na maholo a Jisas e siho mai mwaanie iiola, na ngaeta mwane ko maau oto mai mwaanie mo kilipweꞌu. Mwane ngeena liꞌoa aaela aana,

³ na iiꞌonga ingeie oto mola i saana mo kilipweꞌu. Nga iini e saꞌa hele aana, wa ke pwasue maꞌalana aani walo wa aani iieli heu.

⁴ Mo maholo hunge pwasulana aeꞌaena na kiꞌine ko lae oto, taꞌe ko mousiꞌi mola. Na nga iini ke aꞌailaꞌa hunie ke haꞌamanataꞌaa, na haꞌike loꞌu.

⁵ Na oto tarau suli rodo na aatowaa, ingeie mola i sulie mo uuwo na mo kilipweꞌu peꞌi aawaranga na hunulana sapena mola aani ngedi.

⁶ Na maholo e leesie a Jisas ue wau haꞌatau, e huru mei i saana, na ko pouruuru oto i naꞌona.

^7-8 Oto a Jisas ko teꞌuri hunie, “!Iꞌoe, liꞌoa aaela, o ke iisitaa mai mwaanie mwane ngeena!” Oto a mwaena ko soi oto paine uuri, “!Ai Jisas, Kalena a God, iini e paine liutaa! ?Nga taa oto o kei esuie aaku? No ko eitanaiꞌo aana satana God, o ke suꞌuri haꞌaletehieu.”

⁹ Oto a Jisas ko dolosi aana uuri, “?Satamu a tei?” A mwaena e aalamie oto ko teꞌuri, “Sataku a Hunge, aena aana emi hunge oto hiitoꞌo i laona mwane ie.”

¹⁰ Na ko eitanaie oto a Jisas uri ke suꞌuri uusungeꞌinire mwaanie hanuena.

¹¹ Na ola mala e ro sinolai poo kire ko susude i lengine uuwo oto poꞌo wau.

¹² Oto mo liꞌoa aaela ngeena ko eitanaie a Jisas uuri, “O ke toliꞌaasiꞌemi ke lae i laona amaa ni poo taꞌaune hunie emi ke iiꞌo aani.”

¹³ Maholo e toliꞌaasire, kire si iisitaa huni lai sili i laona mo poo. Oto amaa ni poo paine ngeena, kire mani loutaa pwau i aano i sulie uuwo, na kire ko lai pola tala oto aana maoꞌi hunie i eesi, na kire ko meni inu oto.

¹⁴ Oto mwala nge kire lio-lio i sulie mo poo ngeena kire tahi, na kire lai tarohaꞌinie tataroha oto wau i laona huilume ikire na aana mo henue kali-kelie. Oto mwala kire huru hunie kire ke lai leesie nga taa e rau.

¹⁵ Maholo kire lae mai i saana Jisas, kire ko meni meꞌu aana kire ko leesie mwane nge mo liꞌoa aaela e hite-hite aana, e iiꞌo i aano, na e hoꞌo sala, na manatana e taha oto.

¹⁶ Na mo iini nge kire leesie nga taa e rau ngeena, kire unue oodoie mwala uri nga taa e rau aana mwane nge mo liꞌoa aaela e oꞌoꞌo aana, na aana mo poo.

¹⁷ Oto kire ko eitanaie mola a Jisas hunie ke lae oto mwaanie poꞌo ni henue ikire.

¹⁸ Oto maholo a Jisas ko taꞌe i laona iiola, na mwane nge mo liꞌoa aaela e iisitaa mwaanie ngeena ko eitanaie a Jisas uri ke hakusie.

¹⁹ Taꞌe a Jisas e kaꞌa toliꞌaasie ike. E unue mola hunie uuri, “O ke aalihoꞌi mola i saana uluhe iꞌoe na o ke haꞌarongora aana walu ola diana nge a God e asuiꞌi huniꞌo aana e tohungei aamasiꞌo.”

²⁰ Oto a mwaena e aalihoꞌi mola, na e laehie ahutana mo huilume aana poꞌo ni henue i Dekapolis peꞌi tarohaꞌinie mei ola paine ngeena a Jisas e asuie hunie. Na ahutana mwala kire ko si meni pangataꞌinie oto hiitoꞌo.

A Jisas E Haꞌa-uurie Huꞌe Nge E Hele Aana Toꞌoni Ingeie, Na Pule Kalena A Jaeras

²¹ Oto a Jisas e aatoholo aalihoꞌi loꞌu aana iiola hunie poꞌo ni eesi taꞌau. E si siho mola i reune aasi i leune, na mwala oto hunge kire loko oto mai kali-kelie.

²² Na aana maholona, ngaeta naꞌohai mwane paine aana nume ni palo-palo, satana a Jaeras, e hule noꞌone. Maholo e leesie a Jisas, e pouruuru oto i naꞌona,

²³ na ko eitanaie uuri, “Kele pule kaleku e eno oto hunie maenga. No ko eitanaiꞌo hunie o ke lae mai hele aana hunie ke awaa na ke mauri.”

²⁴ Oto a Jisas e lae oto peꞌie, na mwala hunge kire ko lae i sulie oto peꞌi uusuleꞌinire hailiu.

²⁵ Na ngaeta keni i leune, apu raha-raha ko seunie oto hunie aawalai helisi mwana rue.

²⁶ A keine ko lae oto i saana mwala kure-kure hunge, taꞌe hunie uri ke awaa mola haꞌike. Na e waiahea tari-olanga ingeie aana e holi-holi talana, taꞌe nga mei ola hunie ke toꞌo hoorana haꞌike, ko si peine mola.

²⁷ Maholo a keine e rongo tarohana a Jisas, oto e lae liu i purine mola i matolana mwala, na e kopi aana toꞌoni a Jisas.

²⁸ Aana e loꞌongaꞌinie uuri, “Mala ne ke kopi mola aana toꞌoni ingeie, na ne kei awaa oto.”

²⁹ Na maholo a keine e kopi aana toꞌoni a Jisas, oto apu raha-raha ngeena e mango oto mwaanie aana maholona, na e hiingeꞌinie uri e awaa oto taꞌingelu.

³⁰ Na a Jisas, oto lau-leu e hiingeꞌinie maraana uri nanamanga ingeie e haꞌa-uurie nga iini, oto e aaliꞌu ko teꞌuri, “?A tei e kopi aana toꞌoni ineu?”

³¹ Oto mo pwaarongoisuli ingeie ko teꞌuri hunie, “!Lio kaꞌu! Ahutana mwala ko meni uusuleꞌiniꞌo. ?Aana e ue nge o ko dolosie uri a tei e kopi aana toꞌoni iꞌoe?”

³² Taꞌe a Jisas ko lio hailiu mola huni leesie uri a tei nge e kopi aana toꞌoni ingeie.

³³ A keitaꞌaa ko si tohungei meꞌu oto na ko eriri i sulie e saie uri ingeie oto mei olana e rau aana. Oto e lae mai, ko pouruuru i naꞌona a Jisas, na ko unue oodoie nga taa nge e rau aana.

³⁴ Oto a Jisas ko teꞌuri hunie, “Kaleku, hiiwalaimolinge iꞌoe e haꞌa-uuriꞌo oto. O awaa oto mwaanie mei maelaa ngeena. Lae mola aani henuelamanga.”

³⁵ Na maholo a Jisas ko ere-ere ue urine, ngaeta mo iini kire lae mai uure mwaanie nume a Jaeras, kire ko teꞌuri hunie a Jaeras, “Kele pule iꞌoe e mae oto. O ke suꞌuri haꞌaweoa loꞌu a Haꞌa-uusuli.”

³⁶ A Jisas e rongoa mola nga taa kire ko unue, taꞌe e unue mola hunie a Jaeras uuri, “O ke suꞌuri tolahiꞌe, taꞌe o ke hiiwalaimoli mola aaku.”

³⁷ Oto a Jisas e kaꞌa toliꞌaasie ike loꞌu nga iini aaopa hunie ke lae peꞌie, taꞌe a Pita mola haliꞌite, na a Jemes, na a Jon aasine a Jemes.

³⁸ Na maholo kire hule oto aana nume a Jaeras, na a Jisas ko leesie mwala hunge kire ko eꞌengo i leune na nga mo iini ko ngara-ngara na uulo-uulo oto paine.

³⁹ Oto maholo a Jisas e sili hao i laona nume, ko teꞌuri hunire, “?E ue ni omu ko eꞌengo na omu ko ngara-ngara urine? Kele pule ie kaꞌa mae ike, taꞌe ko maꞌahu mola.”

⁴⁰ Taꞌe kire ko mwesi mola mwaanie, na kire ko haꞌa-eero mola aana. Oto a Jisas e oohe aasire i sinaha, e si toolea aamana pulena na nikana, na oolu pwaarongoisuli ingeie, kire ko si lae i laona duru nge a pulena e iiꞌo aana.

^41-42 A pulena e hule oto aana aawalai helisi mwana rue, na a Jisas e hele i nimana, ko si teꞌuri hunie aana erenga ni Jiu, “Talitha, koum.” Loꞌongaꞌinge aana uuri, “Kele pule, no ko unue huniꞌo o ke taꞌelaꞌi oto.” Na oto lau-leu a pulena e taꞌelaꞌi, ko lae hailiu oto. Oto maholo kire leesie urine, kire ko si tohungei pangataꞌi oto hiitoꞌo.

⁴³ Taꞌe a Jisas e si ere honosire uuri, “Omu ke suꞌuri haꞌarongoa loꞌu nga iini aana leune.” Na ko heꞌi unue loꞌu uuri, “Omu ke nii ngeulaa mola ana.”